ᓃᓵᐧᐤ ᑭᐦᒋ ᐅᑭᒫᐊᐧᐠ 1 - Kanāci Kihci Masinahikan

¹ moāp māka ki pasikostawēw isrēila ispi ē ki poni pimātisit ēhāp.

² ēhāsāya māka ki pohcipayiw ē tawakotēyik ispimihk o piskicikamik samēriyaihk, ēkosi ki wisakēyitam; ki isitisawēw māka itwēhākana, ēkosi ki itēw, niyāk, natawi kakwēcimihk pēalsipap o manitomiwāwa ēkaran, māhti kē miyoayāwānē oma wisakēyitamowin.

³ māka okisiko kā tipēyihcikēt ohci ki itēw ilaicawa ana tispait, pasiko, natawi nakiskām ot itwēhākana samēriya kihci okimāw, isik māka, ēkā ci ē ihtāt kisēmanito isrēilihk, kā ohci natawi kakwēcimāyēk pēalsipap o manitomiwāwa ēkaran?

⁴ ēkwa māka omisi itwēw kā tipēyihcikēt, namawiya ki ka yāsātawin ki nipēwinihk ohci anima kā ki nahisiniyan, māka kēhcinā ki ka nipin. ēkosi ilaica ki sipwētēw.

⁵ itwēhākana māka kāwi ki pē nātik, ēkosi ki itēw, tānēhki kā pē kiwēyēk?

⁶ ēkosi ki itik, ni ki pē natawi nakiskākonān nāpēw, ēkosi ni ki itikonān, niyāk, kāwi mina nātihk ana kihci okimāw kā ki pē isitisahokoyēk, omisi māka itāhkēk, ēkā ci kisēmanito ē ihtāt isrēilihk, kā natawi kakwēcimat pēalsipap o manitomiwāwa ēkaran? ēwako ohci namawiya ki ka nisātawin ki nipēwinihk ohci ita kā ki naisiniyan, māka kēhcinā ki ka nipin.

⁷ ki itēw māka, tānitowi ayisiyiniw ana kā ki pē natawi nakiskākoyēk, mina kā ki wihtamākoyēk ohi itwēwina?

⁸ ki naskwēwasimik māka, mihyawēsiw ana nāpēw, ēkosi pakēkinowi pakwatēhon āpitosiyaw pakwatēho. ēkwa ki itwēw, ēwakwāna ilaica ana tispait.

⁹ ēkwa kihci okimāw ki isitisahamawēw simākanisiwikimāwa kā tipēyimāyit niyānanomitanaw ē kikiyit anihi niyānanomitanāw. ki ati nātik māka ilaica; ēkosi poti ki apiw tahkotāmatin wacihk. ki itik māka, kiya kisēmanito ot ayisiyinima, kihci okimāw ki itwēw, pē nihtaciwē.

¹⁰ ilaica māka ki naskwēwasimēw mina ki itēw anihi simākanisiwikimāwa niyānanomitanaw kā tipēyimāyit, kispin tāpwē niya kisēmanito ot ayisiyinima, kiyām iskotēw kisikohk kita pē ohci yāsipayiw kita mēstikasokoyan kiya asici kā wicēwacik niyānanomitanaw. ki pē yāsipayiw māka iskotēw kisikohk ohci mina ki mēstikasok wiya mina anihi niyānanomitanaw.

¹¹ ēkwa mina ki isitisahamāk kotaka simākanisiwikimāwa niyānanomitanaw kā tipēyimāyit asici anihi niyānanomitanaw. ki naskwēwasimik māka mina ki itik, kiya kisēmanito ot ayisiyinima, omisi ki itwēw kihci okimāw, kiyipa pē nitāmaciwē.

¹² ilaica māka ki naskwēwasimēw mina ki itēw, kispin niya kisēmanito ot ayisiyinima kiyām iskotēw kisikohk kita pē ohci yāsipayiw kita mēstikasokoyan kiya mina aniki niyānanomitanaw kā ayāwacik. ēkosi ot iskotēm kisēmanito kisikohk ki pē ohci yāsipayiw mina ki mēstikasok wiya mina anihi niyānanomitanaw kā ayāwāt.

¹³ mina māka ki isitisawēw simākanisiwikimāwa, ēkwa nistwāw, ē tipēyimāyit niyānanomitanaw kiki anihi niyānanomitanaw. ana māka nisto simākanisiwikimāw ē tipēyimāt niyānanomitanaw, ki itohtēw, ēkosi ki pē natawi ohtiskawi ocihcihkwanapistawēw ilaicawa, ki kākisimototawēw māka, ē itāt, kiya kisēmanito ot ayisiyinima, ki natotamatin, kiyām ni pimātisiwin mina o pimātisiwiniwāw oki niyānanomitanaw kit atoskēyākanak kita wi ahkwakitēw ē itāpisiniyan.

¹⁴ mātika, iskotēw ki pē yāsipayiw kisikohk ohci, mina ki mēstikasokwak aniki nistam simākanisiwikimāwak niyānanomitanaw kā tipēyimācik kiki anihi niyānanomitaw; māka ēkwa kiyām ni pimātisiwin kita wi āhkwakitēw ē itāpisiniyin.

¹⁵ okisikowa māka kā tipēyihcikēt ohci ki itik ilaica, kiyām wicēw, ēkāwiya ki ka kostāw. ki pasiko māka ēkosi ki wicēwēw ē natawāpamāt kihci okimāwa.

¹⁶ ki itēw māka kihci okimāwa, omisi itwēw kā tipēyihcikēt, cikēmā ē ki isitisahwacik itwēhākanak kita kakwēcimācik pēalsipapa o manitomiwāwa ēkaran, ēkā ci ē ihtāt kisēmanito isrēilihk kita ki kakwēcimat ot itwēwin? ēwako ohci namawiya ki ka nisātawin ki nipēwinihk ohci ita kā nahisiniyan, māka kēhcinā ki ka nipin.

¹⁷ ēkosi tāpwē ki nipiw, ē itastēyik ot itwēwin kā tipēyihcikēt ilaica kā ki wihtahk, cihārām māka ki māci kihciokimawiw ē miskotiskamawāt, niso aski ē ati ayāt cihārām okosisa cihāsapāt, cota kihci okimāw; ayis namawiya ki okosisiw.

¹⁸ kotaka māka ot isihcikēwina ēhāsāya kā ki itotahk, nama ci masinaikātēwa masinahikanihk ē akinē ācimihcik isrēil kihci okimāwak?