ᓃᓵᐧᐤ ᐊᑭᓀ ᐋᒋᒧᐃᐧᓇ 1 - Kanāci Kihci Masinahikan

¹ sālaman māka okosisa tēpit ki maskawisiāw o kihci okimāwiwinihk, mina kā tipēyihcikēyit o kisēmanitoma ki wicēwik, ēkosi ayiwāk ki kistēyitākoik.

² sālaman māka ki ayamihēw kahkiyaw isrēila, kā kihcisimākanisiwikimākatawāyit kihcimitatatomitanaw mina māmitātahtomitanaw, mina oyasowēwiyiniwa, mina kahkiyaw kā okimāwiyit misiwē isrēil, kā nikānēyitākosiyit otāwiwāwa o wāskāhikaniyihk.

³ ēkosi māka sālaman mina kahkiyaw kā māmawi māwacihitoyit ē wicēwikot, ki itohtēwak ispayanohk kipiyanihk kā ki ayāk; cikēmā ēkota ki ayāw o māwacihitowi mikiwāp kisēmanito, anima mosis ot atoskēyākana kisēmanito kā ki osihtāt pikwataskihk.

⁴ māka wiya o kiskinawāciowiniwāt kisēmanito tēpit ki pētāw kiriyāhtciarim ohci ē itotatāt ita tēpit kā ki kwayācitamawātahk; cikēmā ki mānokātam cērosalamihk.

⁵ ēkosi mina anima osāwāpisko pakitināsowināpisk, pēsalil okosisa yoray, okosisa har, kā ki osihtāt, ēkota ki ayāw ohtiskaw o mikiwāpiyihk kā tipēyihcikēyit; sālaman māka mina kā māwacihitocik ki natoskamawatamwak.

⁶ sālaman māka ki nātam osāwāpisko pakitināsowinapisk ohtiskaw kā tipēyihcikēyit, kā ayāyik māwacihitowi mikiwāpihk, mina ki pakitināso ēkota kihci mitātahtomitanaw macostēhamākēwina.

⁷ ēwako ē tipiskāk kisēmanito ki nokohisostawēw sālamana, mina ki itēw, natota kēkway kē miyitān.

⁸ sālaman māka ki itēw kisēmanitowa, ki ki wāpahtahāw mistahi kisēwātisiwin tēpit notāwi, mina ki ki kihci okimākāsin kita tāpiskamawak.

⁹ ēkwa tēpēyihcikēyan kisēmanito, kiyām kā ki asotamawat tēpit notāwi kita wi āyātastēw; cikēmā ki ki isiin kita kihci okimākatawakik ayisiyiniwak tāpiskoc ē piwāakāk aski ē itēyaticik.

¹⁰ miyin ēkwa iyinisiwin mina kiskēyitamowin, kita wayawiyān mina kita pihtokēyān ē wāpamicik oko ayisiyiniwak; cikēmā awēna kē ki oyasowātat ohi kit iyinima kā isi mihcēticik?

¹¹ kisēmanito māka ki itēw sālamana, cikēmā oma ē ki ayāk kitēhihk, mina ēkā ē ki ohci natotaman wēyotisiwin, miyoayāwin, ahpo kistēyitākosiwin, ahpo o pimātisiwiniwāw aniki kā pakwātiskik, ahpo ēkā ē natotaman kinwēs pimātisiwin; māka ē ki natotēstamāsoyan iyinisiwin mina kiskēyitamowin, kita oyasowātacik nit ayisiyinimak, kā ki kihci okimākātitān kita tipēyimacik;

¹² iyinisiwin mina kiskēyitamowin ki miyikawin; mina ki ka miyitin wēyotisiwin mina miyoayāwin, mina kistēyitākosiwin, iyikohk ēkā ē ki ohci ayācik kihci okimāwak nikān kā ki ayācik, mina namawiya aniki kē askowiskāskik ēkosi kita isi ayāwak.

¹³ sālaman māka ki pē kiwēw kā ki itohtēt ispāyanohk kipiyanihk kā ki ayāk māwacihitowi mikiwāpihk, cērosalamihk kāwi ē takosihk; ēkosi ki kihci okimākatawēw isrēila.

¹⁴ sālaman māka ki māwacihēw titipitāpanāskwa mina otētapiwa; ēkosi ki ayāwēw kihci mitātahtomitanaw ayiwāk nēwāw mitātahtomitanaw titipitāpanāskwa, mina mitātaht nisosāp tahto kihci mitātahtomitanaw otētapiwa, ēwakoni māka ki itatēw titipitāpanāsko otēnāhk, mina ita ē ayāt kihci okimāw cērosalamihk.

¹⁵ ēkosi kihciokimāw ki isiwēyociēw wāpiskisoniyāwa mina osāwisoniyāwa piyis tāpiskoc asiniyak cērosalamihk, mina māsikiskātikwa tāpiskoc sikamār mistikwa wāyatināhk kā ayāyit, ē isi osāmēyatiyit.

¹⁶ anihi māka mistatimwa sālaman kā ki ayāwāt iciptihk ki ohtināwak; kihci okimāw ot atāwēwiyinima ki otinēyiwa ē pēcitisaomiht, ē māmawi tipawācik ē pēcitisaomiht.

¹⁷ ki nātēwak māka, mina ki pēsiwēwak iciptihk ohci titipitāpanāsk nikotwāswāw mitātahtomitanaw sēkila wāpiskisoniyāw ē tipaoht, ēkosi mistatim mitātahtomitanaw niyānanomitanaw ayiwāk; ēkosi mina kita āpaciāyit kahkiyaw hitaitak o kihci okimāmiwāwa mina siriya kihci okimāwa ki pēsiwēwak ē pētamawācik.