ᓂᐢᑕᒼ ᑌᓴᓬᐋᓂᔭᓇ 1 - Kanāci Kihci Masinahikan

¹ pāl, mina silpēnas, mina timatī, ē masinahamawācik tēsalāniyana otayamihāwak kisēmanito isi wēyotāwihk mina kā tipēyihcikēt cisas Christ: kisēwātotākowin mina pēyatakēyimowin ki ka wi ayānāwāw.

² mosak ni nanāskomānān kisēmanito kahkiyaw kiyawāw ohci, ē māmiskomitāhk nit ayamihāwinināhk;

³ ēkā ē poni kiskisitotamāhk kā isihcikēyēk tāpwēyēyitamowin ohci mina kā atoskēyēk sākihiwēwin ohci mina kā sipēyitamēk ē aspēyimoyēk kā tipēyimikoyahk cisas Christ, ē isi wāpamikoyēk ki kisēmanitominaw mina kotāwinaw;

⁴ ē kiskēyitamāhk, niciwāmitik kā sākihikoyēk kisēmanito, ki wawēyēyimikowiniwāw,

⁵ kā ki isi otihtikoyēk ni miywācimowininān namawiya piko itwēwinihk, māka mina maskawisiwinihk, mina kā kanātisit ahcāhk, mina mistahi kēcināowinihk; kā isi kiskēyitamēk tānisi ē ki isi ayisiyiniwiyāhk ita kā ayāyēk kiyawāw ohci.

⁶ ēkosi ki ki kiskinawāpaminān niyanān, mina kā tipēyihcikēt, mistahi āyimisiwinihk ē ki otinamēk itwēwin, kiki o mamahtākoiwēwin kā kanātisit ahcāhk;

⁷ ēkosi ki ki kiskinawāpahtaāwāwak kahkiyaw kā tāpwētahkik māsitāniyaihk mina ākēyaihk.

⁸ cikēmā kiyawāw ohci kā ki pētākwaniyik ot itwēwin kā tipēyihcikēt, namawiya piko māsitāniyaihk mina ākēyaihk, māka misiwē ita ki tāpwēyēyitamowiniwāw kisēmanitohk isi sipwē pēhtākwan; ēkosi namawiya katāc ēwako kita tasitamāhk.

⁹ ayis wiyawāw kēhciwāk nit ācimikonānak kā ki isi pitokātāhk; ēkosi kā ki isi kwēskistawāyēk kisēmanito ē poniāyēkok manitokānak, kita atoskawāyēk kā pimātisit mina tāpwē kā kisēmanitowit,

¹⁰ mina kita pēimāyēk okosisa kihcikisikohk ohci, anihi kā ki waniskānāt nipowinihk ohci, cisasa oti, ana kā paspiikoyahk ēkā kita pakamiskakoyahk kisiwāsiwin nikān kā ayāk.