ᓂᐢᑕᒼ ᓵᒼᔪᐃᓬ 1 - Kanāci Kihci Masinahikan

¹ ki ihtāw māka nāpēw rēmatēyim sāpim ohci ēlkēna māka ki isiyihkāso, okosisa cērāhām, okosisa ilāyo okosisa tohyo, okosisa sahp, iparēimait.

² ki nisoskwēwēw māka, pēyak hāna ki isiyihkāsoyiwa, ēkosi kotaka pinina ki isiyihkāsoyiwa; pinina māka ki ot awāsimisiw, māka hāna namawiya ot awāsimisiw.

³ awa māka nāpēw ki sipwēhtēw māna ot otēnāhk ohci tahto aski kita natawi ayamihāt mina kita pakitināsostawāt kā tipēyihcikēyit māmawēyas siyohkātisiyit sailōihk. anihi māka ē nisiyit ilāy okosisa, hāpnay mina piniyās, kā tipēyihcikēt ot ayamihēwiyinima ēkota ki ayāyiwa.

⁴ ispi māka kisikāw wētihcipayik ita ēlkēna kā pakitināsot ki miyēw wiwa pininawa mina kahkiyaw okosisiyiwa mina otānisiyiwa mātinamākēwina;

⁵ māka wiya hānawa miyēw niswāw iyikohk, cikēmā sākihēw hānawa, māka kā tipēyihcikēyit namawiya ki pakitinamākoyiwa awāsisa kita ayāwāyit.

⁶ hāna māka wiskwa ki natonamiyiwa kita isi pikwēyitamiikot anima ohci ēkā ē pakitinamākot kā tipēyihcikēyit kita ot awāsimisit.

⁷ omisi māka ē ihtotākot o nāpēma tahto aski ētohtēci o wāskāhikaniyihk kā tipēyihcikēyit, ēkosi isi ki pikwēyitamihik; ki māto māka, mina namawiya miciso.

⁸ ēkwa māka o nāpēma ēlkēnawa ki itik, hāna, tānēki kā mātoyan? tānēhki mina ēkā kā micisoyan? mina tānēhki kā wisakitēhēyan? nama ci nawac niya ki miyo totātin iyikohk āta mitātasicik kikosisak?

⁹ hāna māka ki pasiko ispi kā micisocik ēkota anima sailō, mina ispi kā minihkwēcik. ilāya māka ayamihēwiyiniwa ki apiyiwa apiwinihk ciki cimacikanihk o kihciayamihēwikamikoyihk kā tipēyihcikēyit.

¹⁰ ki wisaki kaskēyitam māka ot ahcāhkohk, ēkosi ki ayamihēstawēw kā tipēyihcikēyit mina mistahi ki māto.

¹¹ ki kihciitwēw māka kihciitwēwin, omisi ē ki itwēt, tēpēyihcikēyan māmawēyas siyokātisiyan kispin tāpwē kē kanawāpahtamwāwatē o kaskēyihtamowin kit atoskēyākaniskwēm, mina kē kiskisitotawiwanē, mina ēkā wanikiskisitotawaci kit atoskēyākaniskwēm māka miyaci kit atoskēyākaniskwēm nāpēw awāsisa, ni ka pakitinaw kita atoskawāt kā tipēyihcikēyit iyikohk kē pimātisikwē mina namawiya kāskipāson kata sāmitiniyiw ostikwanihk.

¹² ki ispayiw māka oma ē itasi ayamihēstawāt kā tipēyihcikēyit ilāya ki pisiskāpahtamwēw o toniyiw.

¹³ hāna māka o tēhihk ayamiw; piko ē waskawitonēpayit, ēkā māka ē pēhtākosit; ēwako ohci ilāya kiskwēpēw ki itēyimik.

¹⁴ ilāya māka ki itik, tāniyikohk kē ihtasi kiskwēpēyan. ikatēstā ki somināpom.

¹⁵ hāna māka ki naskwēwasimēw ē ki itāt, namawiya, nokimām, niya oma iskwēw kā o mikoskātēyitamowinit; namawiya noh minikwān somināpo ahpo ē maskawāk minihkwēwin, māka ni ki sikinamawāw kā tipēyihcikēt ē isi moskinēyit nit ahcāhkwa.

¹⁶ ēkāwiya maci iskwēw itakimin kit atoskēyākaniskwēm cikēmā ē isi osāmi ayāk ni mawimoscikēwin mina ni mikoskātēyitamihikowin kā ki ohci ayamiyān.

¹⁷ ilāy māka ki naskwēwasimēw ē ki itwēt, pēyahtakēyimowinihk sipwēhtē; o kisēmanitoma isrēil ki ka wi pakitēyitamāk ki natotamākēwin kā ki kakwēcimat.

¹⁸ wiya māka ki itwēw, kiyām ki ka wi miyo kitāpamāw kit atoskēyākaniskwēm. ēkosi māka ana iskwēw ki sipwēhtēw, ki miciso māka, ēkosi namawiya ēkwa kāmwācinākosiw.

¹⁹ wipac māka kēkisēpā ki waniskāwak, ēkosi ki ayamihēstawēwak kā tipēyihcikēyit, ēkwa ki kiwēwak, mina ki ati takosinwak wikiwahk rēmaihk: ēlkēna māka ki kiskēyimēw hānawa wiwa; ēkosi kā tipēyihcikēyit ki kiskisitotākoyiwa.

²⁰ ki ayikin māka ispi kā otihcipayik hāna ē kikiskawāt awāsisa, ki nokosiyiwa okosisa, ēkosi sāmyoil ki isiyikātēw, ē itwēt, cikēmā ni ki natotamaāw kā tipēyihcikēt.

²¹ ana māka nāpēw ēlkēna mina kahkiyaw wikihk ē ayāyit, ki itohtēwak kita pakitinamawācik kā tipēyihcikēyit tahto aski pakitināsowin mina kā ki kihciitwēt.

²² māka hāna namawiya ki itohtēw, cikēmā ki itēw o nāpēma, namawiya ni ka itohtān pātimā iyikohk poni nonici, ēkwa ni ka itohtaāw ēkota kita wāpamikot kā tipēyihcikēyit mina ēkota kita ayāt kākikē.

²³ o nāpēma māka ēlkēnawa ki itik, ē isi miywēyihtaman ihtota; kiyām ota ayā isko kita poni nonit, tēpiyāhk kā tipēyihcikēt āyātastāci ot itwēwin. ēkosi awa iskwēw ki apiw, mina ē ki nohyāt okosisa piyis ē poni noniyit.

²⁴ ispi māka kā poni nohyāt, ki itohtaēw, ēkosi ki kiki itohtaēw nisto yāpēsisa, mina pēyak ihpa iyikohk pahkwēsikana, mina pēyak asiwacikan somināpo, ki pihtokahēw māka okosisa o wāskāhikaniyihk kā tipēyihcikēyit sailōihk: oskātisiw māka ana awāsis.

²⁵ ēkosi ki nipaēwak yāpēsisa, mina ki itohtaēwak anihi awāsisa ita ē ayāyit ilāya.

²⁶ omisi māka ki itwēw hāna, ā nit okimām, ē isi kēhcinā pimātisit kit ahcāhk, nit okimām, niya ēwako ana iskwēw ōta kā kih nipawistātān ē ayamihēstawak kā tipēyihcikēt.

²⁷ awa awāsis kā ki natotamāyān; kā tipēyihcikēt māka ni ki miyik ni natotamāwatihtisowin kā ki isi kakwēcimak.

²⁸ ēwako ohci māka ni ki awihāw kā tipēyihcikēt; isko kē pimātisikwē kata awihāw kā tipēyihcikēt. ki ayamihēstawēw māka ēkota kā tipēyihcikēyit.