ᓂᐢᑕᑦ ᑭᐦᒋ ᐅᑭᒫᐊᐧᐠ 1 - Kanāci Kihci Masinahikan

¹ ēkwa māka kihci okimāw tēpit ki kisēyātisiw mina ki nēsowikihkāw; ēkosi ki akwanawēwak nipākana ohci māka namawiya ki kisosiw.

² ēwako ohci ot atoskēyākana ki itik, kiyām kita natonāmāwa nit okimām kihci okimāw oskinikiskwēwa; kita nipawistākot kihci okimāw mina kita pamihikot; mina kiyām kita pimisin ki piyomowinihk, nit okimām kihci okimāw kita kisosit.

³ ēkosi māka ki nanātonawēwak ē katawasisiyit oskinikiskwēwa misiwē isko ē ot askiyit isrēil, ki miskawēwak māka āpisāk ana sonamait, ēkosi ki pētamawēwak kihci okimāwa.

⁴ ana māka oskinikiskwēw ayiwāk ki katawasisiw; ēkosi ki pamiēw kihci okimāwa, mina ki atoskawēw; māka kihci okimāw namawiya kiskēyimēw.

⁵ ēkwa ātanaica okosisa hākiht ki kistēyitākoiso ē itwēt, ni ka kihci okimāwin; ki wawēyiēw māka titipitāpānaskwa mina otētapiwa mina niyānanomitanaw nāpēwa kita nikānipatāyit.

⁶ otāwiya māka namawiya wikāc ohci nayēhtāwiyawēik, nāntaw iyikohk kita itikot, tānēhki oma kā itotaman? mina mitoni ki takahkāpēwiw; ki askowiskawēw māka āpsalama.

⁷ ēkosi ki wicipikiskwēmēw coāpa okosisa siryoāya, mina apāyatar ayamihēwiyiniw; ēkosi ēwakonik ē pimitisaācik ātanaicawa ki wicēēwak.

⁸ māka sētāk ayamihēwiyiniw, mina pināya okosisa cihāyata, mina nēhtān ana okiskiwēhikēw, mina simiay, mina riay mina okihcihtāwa tēpit kā ayāwāt, namawiya wicēwēwak ātanaicawa.

⁹ ēkosi ātanaica ki nipaēw māyatihkwa mina mostoswa mina tācipoākana ēkota sihārēt asinihk, kisiwāk ēnrākēl kā ayāk; ki natomēw māka kahkiyaw ociwāma kihci okimāw okosisa, mina kahkiyaw cota ayisiyinia kihci okimāw ot atoskēyākana;

¹⁰ māka nēhtāna okiskiwēhikēwiyiniwa mina pināyawa, mina anihi okihcihtāwa, mina sālamana ociwāma, namawiya natomēw.

¹¹ ēkwa nēhtān ki ayamihēw pāhtsipawa okāwiyiwa sālaman, ē itwēt, nama ci koh pēhtēn ātanaica okosisa hākiht ē kihci okimāwit, ēkosi tēpit kit okimāminaw ēkā ē kiskēyitahk?

¹² ēkwa māka ki pakosēyimitin kiyām ki ka kakēskimitin, kita pimācihtāyān tipiyaw ki pimātisiwin mina o pimātisiwin kikosis sālaman.

¹³ natawi pitokaw kihci okimāw tēpit, omisi māka ki ka itāw, nama ci kiya nit okimām kihci okimāw ki ki kihciitāw kit atoskēyākaniskwēm, ē itwēyan, kēhcinā sālaman kikosis ni ka āniskēskamāk kihci okimāwiwin, ēkosi kita tēhtapiw ni kihci okimāwapiwin? tānēhki māka ātanaica kā kihci okimāwit?

¹⁴ mātika, mēkwāc kēyāpic ayamihaci kihci okimāw, nista ni ka ati nāwayo pitokān, ēkosi ni ka āyātastān kit itwēwina.

¹⁵ pāhtsipa makā ki pitokawēw kihci okimāwa nipēwikamikohk; mistahi māka kisēyiniwiw kihci okimāw; ēkosi āpisāk ana sonamait ki pamiēw kihci okimāwa.

¹⁶ pāhtsipa māka ki nawakiw mina ki atamiskawēw kihci okimāwa. kihci okimāw māka ki itwēw, kēkway nētawēyitaman?

¹⁷ ki itēw māka, ki ki kihciitāw kit atoskēyākaniskwēm kā tipēyihcikēt ki kisēmanitom ē aspimoyan, kēhcinā sālaman kikosis ni ka āniskēskamāk kihci okimāwiwin ēkosi kita tēhtapiw ni kihci okimāwapiwin.

¹⁸ ēkwa māka mātika, ātanaica kihci okimāwiw; ēkosi kiya nit okimām kihci okimāw ēkā ē kiskēyitaman;

¹⁹ ki nipaēw māka mostoswa mina tāhcipoākana, mina māyatihkwa nāspic mihcēt, mina ki natomēw kahkiyaw kihci okimāwa okosisiyiwa, mina apāyatara ayamihēwiyiniwa, mina coāpa kākihcisimākanisiwikimāwit; māka sālamana kit atoskēyākana namawiya ohci natomēw.

²⁰ ēkosi kiya nit okimām kihci okimāw, kahkiyaw isrēil ki kanawapamikwak, kita wihtamawacik awēna kē apit o kihci okimāwapiwinihk nit okimām kihci okimāw kita āniskēskamākot.

²¹ kispin ēkā, kita ki ayikin ispi nit okimām kihci okimāw wicinipāmāci otāwiya niya mina nikosis sālaman owanitotamowak ni ka itakimikawinān.

²² ēkosi mātika, mēkwāc kēyāpic ē ayamihāt kihci okimāwa, nēhtān okiskiwēhikēw ki pē pihtokēw.

²³ ēkosi ki wihtamawēwak kihciokimawa, ē itwēcik, mātiki nēhtān okiskiwēhikēw. ispi māka kā pitokawāt kihci okimāwa, ki nāmiskwēyiw ohtiskaw kihci okimāwa mocihk ē itiskwēyit.

²⁴ nēhtān māka ki itwēw, nit okimām kihciokimaw, ki ki itwān ci, ātanaica ni ka āniskēskamāk kita kihci okimāwit, ēkosi kita apiw ni kihci okimāwapiwinihk?

²⁵ cikēmā ki itohtēw anohc kā kisikāyik, ēkosi ki nipaēw mostoswa mina tāhcipoākana mina māyatihkwa nāspic mihcēt, ki natomēw māka kahkiyaw kihci okimāwa okosisiyiwa, mina simākanisiwikimāwa, mina apāyatara ayamihēwiyiniwa; cist māka micisowak mina minihkwēwak ētāstamapiyit, mina itwēwak, kita wi pimātisiw kihci okimāw ātanaica.

²⁶ māka niya, niya oti kit atoskēyākan, mina sētāk ayamihēwiyiniw, mina pināya okosisa cihāyata, mina kit atoskēyākan sālaman, ēwakoni namawiya ohci natomēw.

²⁷ wiya ci oma kā totahk nit okimām kihci okimāw, ēkosi ēkā ē ki ohci wāpahtaacik kit atoskēyākanak awēna aniskē kē apit o kihci okimāwapiwinihk nit okimām kihci okimāw kita āniskēskamākot?

²⁸ ēkwa kihci okimāw tēpit ki naskwēwasimēw, natomihk pāhtsipa. ki pē pihtokēw māka kihci okimāwa ita ē ayāyit, mina ki ohtiskawikāpawistawēw kihci okimāwa.

²⁹ kihci okimāw māka ki kihciitwēw mina ki itwēw, ē pimātisit kā tipēyihcikēt kā ki wikwaciāt nit ahcāhkwa kahkiyaw āyimisiwinihk ohci,

³⁰ tāpwē kā ki isi kihciititān ē aspimoyān kā tipēyihcikēt o kisēmanitoma isrēil, ē itwēyān, kēhcinā sālaman kikosis kita kihci okimāwiw ē āniskēskamawit, ēkosi kita apiw ni kihci okimāwapiwinihk ē tāpiskamawit; tāpwē ēkosi kē itotamān anohc kā kisikāk,

³¹ ēkwa pāhtsipa ki nāmiskwēyiw mohcihk isi, mina ki atamiskawēw kihci okimāwa, mina ki itwēw, nit okimām kihci okimāw tēpit kākikē kita wi pimātisiw.

³² kihci okimāw tēpit māka ki itwēw, natomihk sētāk ayamihēwiyiniw, mina nēhtān okiskiwēhikēw, mina pināya okosisa cihāyata. ki pē ohtēskawiskawēwak māka kihci okimāwa.

³³ kihcikimāw māka ki itēw, otinimāhk ot atoskēyākana kit okimāmiwāw, tēhtapiihk māka sālaman nikosis tipiyaw niya nisosomistatimoma, ēkosi kaihan itotahihk;

³⁴ kiyām māka sētāk ayamihēwiyiniw mina nēhtān okiskiwēhikēw kita tominēwak ēkota kita kihci okimākatawāyit isrēila; ēkosi potātamok pipikwan, mina itwēk, kita wi pimātisiw kihci okimāw sālaman.

³⁵ ēkwa ki ka pēnāwayoskawāwāw, mina kita pē natawi apiw ni kihci okimāwapiwinihk; cikēmā kita kihci okimāwiw ē tāpiskamawit; ēkosi ni ki oyakimāw kita okimākatawāt isrēil mina cota.

³⁶ ēkosi pināya okosisa cihāyata ki naskwēwasimēw kihci okimāwa, mina ki itēw, āmēn; kā tipēyihcikēt o kisēmanitoma nit okimām kihci okimāw ēkosi kitā wi itwēw.

³⁷ kā tipēyihcikēt kā ki isi wicēwāt nit okimāma kihci okimāwa, ēkosi kita wi isi wicēwēw sālamana, mina kita wi ayiwāk kistēyitākotāwēw o kihci okimāwapiwiniyiw iyikohk o kihci okimāwapiwin nit okimām kihci okimāw tēpit.

³⁸ ēkosi sētāk ayamihēwiyiniw, mina nēhtān okiskiwēhikēw, mina pināya okosisa cihāyata, mina aniki kēritaitak mina pēlitaitak, ki itohtēwak, ēkosi ki tēhtapiēwak sālamana kihci okimāwa tēpita o sosomistatimomiyiwa, ēkosi ki pēsiwēwak kaihanihk.

³⁹ sētāk māka ayamihēwiyiniw ki otēnam pimiwasiwacikanis mikiwāpihk ohci, ēkosi ki tominēw sālamana. ki potātamwak māka pipikwan; ēkosi kahkiyaw ayisiyiniwak ki itwēwak, kita wi pimātisiw kihci okimāw sālaman.

⁴⁰ kahkiyaw māka ayisiyiniwak ki pē nāwayoskāk, ēkosi ayisiyiniwak ki potātamwak kitohtākanisa, mina ki kihci miyawātamwak, ēkosi aski ki nanamipayiw ē isi kisiwētācik.

⁴¹ ēkosi ātanaica mina anihi kā ki wikomāt ki pēhtamwak ē ki poni micisocik. ispi māka coāp piyēhtahk ē pētākwaniyik pipikwan, ki itwēw, kēkway oma kā pētākwahk otēnāhk ē matwē nāntaw itakamikahk?

⁴² mēkwāc kēyāpic ē pikiskwēt, poti cānahtan okosisa apāyatar ayamihēwiyiniw ki takosin; ēkosi ātanaica ki itwēw, pē pihtokē; cikēmā ki kihci ayisiyiniwin, mina ki pētān miyo ācimowin.

⁴³ cānahtan māka ki naskwēwasiēw mina ki itēw ātanaicawa, tāpwē kokimāminaw kihci okimāw tēpit ki kihci okimākēw sālamana;

⁴⁴ mina kihci okimāw ki asici isitisawēw sētāka ayamihēwiyaniwa, mina nēhtān okiskiwēhikēwa, mina pināya okosisa cihāyata, mina kēritaita mina pēlitaita, ēkosi ki tēhtapiēwak kihci okimāwa o sosomistatimomiyiwa;

⁴⁵ sētāk māka ayamihēwiyiniw mina nēhtān okiskiwēhikēw ki tominēwak ē kihci okimākēcik kaihanihk; ēkota māka pē ohtotēwak ē miyawātahkik, ēkosi otēnaw pikwiyikohk pēhtākwan. ēwakoma ē pēhtākwahk kā ki pēhtamēk.

⁴⁶ sālaman māka apiw kihci okimāwapiwinihk kihci okimāwiwinihk,

⁴⁷ mina māka kihci okimāw ot atoskēyākana ki pē natawi atamiskawēwak kokimāminawa kihci okimāw tēpit, ē itwēcik, kisēmanito nawac kita wi ayiwākēyitākotāwēw o wiyowiniyiw sālamana iyikohk kiya ki wiyowin, mina o kihci okimāwapiwiniyiw iyikohk kiya ki kihci okimāwapiwin; ēkosi kihci okimāw ki nāmiskwēyiw nipēwinihk.

⁴⁸ mina omisi ki itwēw kihci okimāw, kita nanāskomāw kā tipēyihcikēt o kisēmanitoma isrēil, kā ki miyit awiya kita apiyit ni kihciapiwinihk anohc kā kisikāk, niskisikohk mina ē ohci wāpahtamān.

⁴⁹ kahkiyaw māka ātanaica o wihkomākana ki sēkisiwak, ēkosi ki pasikowak mina ki sāsipwētēwak kahkiyaw awiyak.

⁵⁰ ātanaica māka ki sēkisiw ē kostāt sālamana; ēkosi ki pasiko ē ki natawi otihtinahk ē ot ēskāniwahk pakitināsowināpisk.

⁵¹ ki wihtamawāw māka sālaman ē itwēhk, mātika, ātanaica kostēw kihci okimāwa sālamana; ayis, cist ki natawi otihtinam ē ot ēskaniwahk, pakitināsowināpisk, ē itwēt, kiyām kihci okimāw sālaman ni ka kihciitik anohc kā kasikāk ēkā kita nipahāt ot atoskēyākana isawēsk ohci.

⁵² sālaman māka ki itwēw, kispin isi nokohisoci ē tēpakēyitākosiwi ayisiyiniwit, namawāc pēyak wēstakay kita pahkitiniyiw askihk; māka kispin macāyiwin miskikātēki ē kikiskākot kita nipiw.

⁵³ ēkosi māka kihci okimāw sālaman ki isitisahowēw ki pēsiwēwak māka pakitināsowināpiskohk ohci. ēkosi ki pē itohtēw ki atamiskawēw māka kihci okimāwa sālamana; ēkosi sālaman ki itēw, kikihk isi kiwē.