ᓂᐢᑕᒼ ᑲᕒᐃᐣᑎᔭᓇ 1 - Kanāci Kihci Masinahikan

¹ pāl kā ki natomiht kita ot apāstilimit cisas Christ ē itēyitahk kisēmanito, mina sāstinis kiciwāminaw,

² kā otayamiāwiyinimit kisēmanito anita kārint kā ayāyit, aniki oti kā kanāciihcik Christ cisasihk, okanātisiwak kā isiihcik, asici kahkiyaw kā mawimostamwācik o wiyowiniyiw kā tipēyimikoyahk cisas Christ misiwē ita, wiyawāw mina kiyānaw kā tipēyimikoyahk:

³ nisokamākowin mina pēyatakēyimowin ki ka wi ohcistamākowāw kisēmanito kotāwinaw mina kā tipēyimikoyahk cisas Christ.

⁴ ni nanāskomāw ni kisēmanitom kākikē kiyawāw ohci, o nisokamākēwin ohci kisēmanito kā ki miyikawiyēk Christ cisas ē wicēwāyēk;

⁵ kahkiyaw kēkway ē ki isi wēyoci ohtinamākoyēk, kahkiyaw pikiskwēwinihk mina kahkiyaw kiskēyitamowinihk;

⁶ ēkosi ot ācimowin Christ kā ki isi sokastamākawiyēk:

⁷ ēkosi nama nāntaw mēkiwin ki notēpayināwāw; ē pētāwāyēk o kiskēyihtākohkēwin kā tipēyimikoyahk cisas Christ;

⁸ ēwako mina kē āyāciikoyēk piyis kisipanohk, ēkā kitā ānwēyitākosiyēk ispi o kisikāmici kā tipēyimikoyahk cisas Christ.

⁹ kisēmanito tāpwēw, kā ki isi natomikoyēk o wicēwākanikāwiniyihk okosisa cisas Christ kā tipēyimikoyahk.

¹⁰ ēkwa māka ki pakosēyimitināwāw, niciwāmitik, o wiyowinihk kā tipēyimikoyahk cisas Christ, kahkiyaw kita pēyakotāyēk ē itwēyēk, mina ēkā paskēwihitowina kita ayāyēk; māka kita māmawi mamitoniikawiyēk pēyak mamitonēyicikanihk mina pēyak oyasowāsiwēwinihk.

¹¹ cikēmā ni ki ācimostākwak kiyawāw ohci, niciwāmitik, aniki wikihk kaloi kā ohcicik, māyi wicētowina ē ayāyēk.

¹² ēwako oma kā itamān, ē itasit ayisiyiniw pāpitos kit itwānāwāw, niya pāl ni wicēwāw; ēkwa niya apālas ni wicēwāw; ēkwa niya sipās ni wicēwāw; ēkwa niya Christ ni wicēwāw.

¹³ nanānisci ayāw ci Christ? pāl ci kā ki cistahāskwātiht kiyawāw ohci? ahpo ci pāl o wiyowinihk kā ki pāptaisiwiikawiyēk?

¹⁴ ni nanāskomāw kisēmanito namawāc awiyak kohci pāptaisiwihitināwāw, piko karispas mina kēyas;

¹⁵ ēkā nāntaw ayisiyiniw kita ki itwēt ē ki paptaisiwiikawiyēk niya ni wiyowinihk.

¹⁶ mina ni ki pāptaisiwiimāwa ē ihtasiyit wikihk istipanās: ayiwāk, namawiya ni kiskēyitēn kā pāptaisiwiāwakē awiyak kotak.

¹⁷ cikēmā namawiya kita pāptaisiwiiwēyān kā ki pē isitisahot Christ. māka kita kakēskikēmoyān miywācimowin: namawiya mina iyinisiwi ayamiwina ohci, ēkā o pimitāskoikan Christ kita notaw itakitēk.

¹⁸ cikēmā ē tasitamihk pimitāskoikan pikonata ititamwak kā nisiwanācihocik; māka wiya kiyānaw kā pimāciikawiyahk ēwako o maskawisiwin kisēmanito.

¹⁹ cikēmā itasinahikātēw, ni ka nisiwanācitāwān ot iyinisiwin kā iyinisit, mina ot ayākwāmisiwin kā ayākwāmisit ni ka ātawēyitamwān.

²⁰ tāniwā kā iyinisit? tāniwā masinahikēwiyiniw? tāniwā kā āyāsitēmiwēt ota askihk? nama ci kisēmanito ki itakitam pikonata askiwi iyinisiwin?

²¹ cikēmā ē wāpahtamihk ot iyinisiwinihk kisēmanito aski ē iyinisimakahk ohci namawiya ki kiskēyimik kisēmanito, ki isi miywēyitam kisēmanito ē isi ēkā iyinisiwiniwāhk kakēskwēwin kita pimācihāt anihi kā tāpwētamiyit.

²² cikēmā cowak natawēyitamwak kiskinawāci wāpahtahiwēwina, mina karikak natonamwak iyinisiwin:

²³ māka ni kakēskimiwānān Christ kā ki cistahāskwātiht, cowak wiya ēwakwēyiw pisokēsinowin, ēkosi cēntailak wiya ēkā kā iyinisiwakēyitahkik;

²⁴ māka wiya aniki kā natomihcik, tāpiskoc cowak mina karikak, Christ o maskawisiwin kisēmanito mina ot iyinisiwin kisēmanito.

²⁵ cikēmā anima ēkā kā iyinisiwakēyimiht kisēmanito awasimē iyinisiw iyikohk ayisiyiniw; mina o nēsowisiwin kisēmanito awasimē maskawisimakaniyiw iyikohk ayisiyiniwak.

²⁶ cikēmā wāpahtamok kā isi natomikawiyēk, niciwāmitik, anima ēkā mihcēt kā iyinisicik wiyāsiwinihk isi, ēkā mihcēt ē kihcāyiwicik, ēkā mihcēt ē okimāwēyitākosicik, kā natomihcik:

²⁷ māka kisēmanito ki nawasonam ēkā kā iyinisiwakēyitamihk askihk, kita nanēpēwitāt anihi kā iyinisimakaki; mina kisēmanito ki nawasonam kā nēsowaki askihk, kita ki nanēpēwitat anihi kā maskawisimakaki;

²⁸ mina notaw kā itakitēki ota askihk, mina anihi kā piwēyitākwaki, kisēmanito ki nawasonam, mina ahpo anihi ēkā kā ayāki, ēkā kita itakwaki anihi kā ki ayāki:

²⁹ ēkā awiyak kā o wiyāsit kita mamihcimot ē isi kitāpatahk kisēmanito.

³⁰ māka ēwako ohci kit ayānāwāw Christ cisasihk, ana kā ki isiikot kisēmanitowa kiyānaw ohci iyinisiwin, mina kwayaskitātisiwin mina kanātisiwin, mina tipahikēstamākēwin:

³¹ ēkosi māka, kā itasinahikātēk, ana kā mamicimot, kiyām kā tipēyihcikēyit kita mamihcimēw.