Yakobo 1 - UTESITAMENTI UMPYA

¹ Nene Jakobu ndili nkivaga va Nguluve nuva nkuludeva UJesu Kilisiti, ndikuvavigila ńi va sivumbuko kitsigo nasivili ńi muhambile mwoni-mwoni, ndikuvapembetsa.

² Ńi vajitu ngave mbwene luvavumbile kwoni nakwoni ulugelo lwoni umwu luvelye, pwu muhekelage.

³ Mwimańage ukuta ulwidiko lwińo lungave lwivonitse ukuva lwa jilweli, pwu lwipela ukusihaluvipo.

⁴ Ukusihaluvipo kwu upita kuvombe imbombo induti, pwu ukuta mbetsage valuti, musilage vunnonu ndasigalaga ponu.

⁵ Uvi asigye uluhala, vi adove kwa Nguluve vi alampa. Mańa umwene ikuvapa voni avidova nikuvenzelukila.

⁶ Mańa upita pwu adove nulwidiko, lilavetsagakwo nilinge ilya kwinana mwitumbu. Mańa uvi ikwinana mwitumbu, vi ali ndilijiga lya muńanza ilihambulanya ilikuluguta, ililahila kunu nakunu.

⁷ Umunu uvi ali vuvule-vule vi alisagilaga ukuta pange alupilila isinge kuntwa.

⁸ Mańa inumbula jya mwene kwu kuva jisańike vuvule, panzila tsa mwene tsoni nalumańili ukugolosa.

⁹ Umwene unkilisiti uvi ndebe nkilunga umu vi iginyage uvuvaha vwa mwene.

¹⁰ Umwene umosu vi iginyage uvudebe vwa mwene, mańa ijagaga nduvuluva vwa lińasi.

¹¹ Mańa vwu lihumile ilitsuva nulutsuva lwa lyene pwu likapya ilińasi nuvuluva vwa lyene vukalagala, nuvunnonu uvwale kumiho vukajaga. Vwu alagaha vuvule-vule numosu nukuńala munzila tsa mwene tsa kukavilamwo.

¹² Vi vandugataluko umunu uvi isiha uluvipo vwu ali ndugelo. Mańa apene upwu angave avonike ukululema, pwu alupilila uludiṅulilo lwa mwene ulwu unkuludeva mwidiṅine atye alavapa voni avanganile. Nditsova vwu vwumi.

¹³ Nujyunge alatsovaga ukuta ikungela Unguluve angave avwene isinge sikungela, ulwakuva Unguluve imbivi natsikungela. Pwu namwene nikungela nimbivi ujyunge umunu.

¹⁴ Voni mpamato-mpamato vukuvagela uvunogwe vwa mwene upwu vukuvahonga vukuvagela nulugelo.

¹⁵ Pwu uvunogwe vwu vwinogile umwana mwitumbu, pwu vwihola uvutulanongwa. Pwu uvutulanongwa vwu vukulile vusilile, pwu vwihola uvuswe.

¹⁶ Ndajagaga ńi vajyango ńi vagane.

¹⁷ Mańa syoni isipevwa isinnonu, syoni nisigavilwa isiluti sitso syu sya kukyańa sikwika kumoli va muli uvi nikijandulanya lusiku, uvi nikitsunguhitsa mbusemelo ndilitsuva.

¹⁸ Umwene vwu anogilwe jujwa pwu atuholile nilimeńu lya. Jilweli, ulwakuva atetsaga vave ndisya kuluvukila nsipelwa sya mwene syoni.

¹⁹ Pwu ńi vajyango ńi vagane pwu ndita: Voni avanu upita vave vańańyango pakupulika, upita vave mola-mola napakutsova, vave mola-mola napakuvipa.

²⁰ Ulwakuva twi vanu gungave guvipile pwu natuvomba itsu Unguluve ita tsu ngolosu.

²¹ Pwu ndita ndumańage iliku lyoni lya munumbula nuvuvivi uvulapuka. Ilimeńu ilivyalwa mwitumbu mwańe lyu mwupilile ńi vanikungwava ulwakuva lyu livumańile ukutsipoka inumbula tsińo.

²² Pwu mwipelage ukuva va kulivomba ilimeńu. Ndavetsaga vapuliki vuvule. Mańa mwu mukitekela.

²³ Mańa ungave vi munu ilimeńu vupulika ku kupulika kwene, ungave navukulivomba vwu uli ndumunu uvi ilolaga nkilolelo umwu apelilwe kumiho.

²⁴ Ulwakuva ivona ilolile pwu ivuka. Pwu isamwa baho uvwu alivwu (kumiho).

²⁵ Mańa uvi ilolesa jilweli ulusimilitso ululuti ulupela uvuvopoli, uvi ilinda munkulolesa, uvi nikipela ukuva mpuliki va kisamwa, uvi ikipela ukuva mbombambombo jilweli, vi imbombo tsa mwene tsikumpetsaga ulugataluko.

²⁶ Umunu uvi ita ndili mbungalivungo lya Nguluve vwu ululimi lwa mwene nikunga nikyuma kya ndutitula, vi ikiteka mwene munumbula jya mwene. Vi ilivungo lya mwene lya vuvule.

²⁷ Ilyene ilivungo ilivalatse ilitsilakalami akange nakwa Nguluve kwa dada lyu ilyu: Valolage avapina navadala avaswile upwu vabańilitsivwe, nuve vwijuvatilage ikilunga kilakulamyaga nuvulami.