Valooma 9 - UTESITAMENTI UMPYA

¹ Nditsova itsa jilweli ndi ndili mwa Kilisiti, nanditsova itsa vunwasi, kukuńidikila ukwivona kwango mwa Mepo Umbalatse

² upwu ndita: Ndisusuvye ulususuvalo uluvaha, ninumbula jyango najilindila jikumbava sikutsoni.

³ Mańa nditye ndingave ndikoto-livwagwe une ulukoto ulwa kumbusa kwa Kilisiti vangave mwu vaponelaga avajyango uvwutuli kivumbuko kipamato navo ummana.

⁴ Mańa avene vwu vańa-Isilaeli. Vwavene uvwana uvwa kuva vana va Nguluve. Vwavene uvuvaha. Lwavene ulwidiṅano. Tsavene isimilitso itsu avapye. Lyavene ilivungo. Tsavene ińidiṅano itswu vidiṅine Unguluve navanu,

⁵ Vavene avadadajitu mwu ahumile namwene UKilisiti ummana uvi vi Nguluve va syoni umwimikivwa sikutsoni nasikutsoni vuvule. Ameni.

⁶ Lola ndatetsaga pange kwu kuva livusivwe vuvule ilimeńu lya Nuguluve. Ndatetsaga voni avahumile mwa Isilaeli vwu vańa-Isilaeli voni.

⁷ Nimbeju jya Abulahamu ndatetsaga vwu vańa-Abulahamu vene jyoni. Bako, mańa umwene atye: Imbeju jyako jilatambulwagwa mwa Isikaka.

⁸ Kwu kuta ndatetsaga vwu vana va Nguluve avaholilwe mummana. Bako avene vwu avaholilwe ulwakuva vidiṅine ulwidiṅano umwene, vwu lweli vwu vitsovwagwa ukuva ju mbeju.

⁹ Mańa lyu limeńu lya lwidiṅano ilyu atye: Pamwaka nda bahapa nditsikwitsaga, pwu nditsivonaga USala aholile umwana undume.

¹⁰ Ndatetsaga pwu tsisilile. Bako namwene nu-Lebeka ali ṅimali mpamato mwene ju Isikaka dadajitu twivoni.

¹¹ Mańa vwu vakanale ukuholwa, vwu vakanale nukuvomba itsinge ninnonu nimbivi,

¹² pwu akambulila ṅani ULebeka akata: Umbaha alambombela undebe. Ulwakuva Unguluve atetsaga: Tsimage itswu ndisagye ṅani ndimwene itsa kumala ujyunge, itswu natsihumili mumbombo itsinge itswu vavombaga avene. Bako itsene tsahumile mbunogwe uvwu anogilwe jujwa uvi ikuvilanga.

¹³ Nduvwu livigilwe ilita: UJakobu vi ndinganile, Esau mańa vi ndinsulile.

¹⁴ Tutetsage kiki lino patsitsitsi? Nda pange tutetsage: Unguluve vi vitsilavugolosu? Kwu bako.

¹⁵ Mańa umwene ikumbula UMose ita: Ndiva nuluhungu kumwene uvi ndinogilwe ukuva nuluhungu kumwene, ndikundilila ikisa uvi ndinogilwe ukundilila ikisa.

¹⁶ Pwu lino ndita: Vi viki uvi anogilwe, vi viki uvi ikwijumilitsa. Bako vi Nguluve mwene, uvi ikundilila ikisa umunu, angave ita ndindililage ikisa jujwa.

¹⁷ Mańa kalata ikumbula UPalao ita: tsu tsitso ndikwimikye ulwakuva nditye amaka gane ndivonye pave. Pwu ilitavwa lyane lipulikikage ikilunga kyoni.

¹⁸ Pwu ndita: Umwene Unguluve avange ikuvalilila ikisa, avange ikutsigilimbitsa inumbula tsavene nduvwu anogilwe umwene.

¹⁹ Uve lino pange vwita: Pwu ate amańile ndeti lino nuńe? Veni pwale uva kubeda itsu isagye ṅani umwene?

²⁰ Vi munu uve! Vi vwatye muhigane nu-Nguluve? Ikivya ikyu ivumba umunu nda kintsigilage uvi ikukivumba kitetsage: Vwu vwatye umbumbage vuvule-vule uve?

²¹ Apene angave umbumbasivya atolile uvudongo avumbile atye isinge isivya sya mbombo innonu isinge sya mbombo imbivi, pwu veni ate amige?

²² Apene angave umwene Unguluve avwene isivya isyu atye syu vikumbonelamwo uluvipo syu vimańilaga namaka, ndita angave syu ivandika angave sikutsoni ita lya image, isivya isyu guvipye isyu atye sya kujaga, pwu veni ate amige?

²³ Apene angave atetsaga mwu vimańilaga ukuva ndimwene navwo uvuvaha musivya sya luhungu isyu agahye ṅani ukuta sivetsage sya pavunnonu, pwu veni ate amige?

²⁴ Mańa vwu uvwe twi atwilangile atye namba-Juta atye nambapanzi.

²⁵ Nduvwu itsova mwa Hoseja ita: Uvwu navale vanu vango vwu ndikuvapetsaga ilya “Vanuvango.” Namwene undala uvi nale ngane kwane vi ndikumpetsaga ilya “Ngane.”

²⁶ Palya vuvule upwu avavulage atetsage: Nandi vanu vango pwu alavapetsaga ilya “Vana va Nguluve uvi alikwo.”

²⁷ Mańa umwene Ujesaja ikumwilangila Isilaeli ita: Nupwu vangave avańa-Isilaeli vavetsaga ndulusekelevwe lwa pańanza uvwongosu, pwu kiponaga akasigalilo kene vuvule.

²⁸ Mańa umwene imalaga ukuhiga inongwa alatsidumulilaga mbugolosu, mańa unkuludeva alatsidumulilaga ṅani inongwa nkilunga umu.

²⁹ Ivuja UJesaja itsovela ṅani vwu tsikanale ita: Angave untwa USebaoti natusigihitsi imbeju pwu ndili twipelile ukuva ndu-Sotomu, pwu ndili tuhwanine nu-Gomola.

³⁰ Tutetsage kiki lino? Twita: Avene avapanzi uvwu navikijumilitsa ukulonda uvugolosu vwu vikwupilila vuvule uvugolosu. Vikwupilila uvugolosu uvwihuma ndwidiko.

³¹ Umwene uvi ikijumilitsaga ukulonda ulunge ulusimilitso ulupelavugolosu, vi alemilwe vuvule naluvweni ulunge.

³² Kiki? Bako ulwakuva navikijumilitsa ulwijumilitso lwa ndwidiko. Bako vwu vikijumilitsa pwu vakaliṅana tsikuvapa imbombo tsavene uvugolosu. Pwu vakitova piganga lya kwitovapwo.

³³ Nduvwu livigilwe ilita: Lola mu-Syoni mwu ndivikile iliganga lya kwitovapwo, ndivikile ulunalavwe lwa kuvagetsa avanu. Uvi ikumwidika vi nalave nisoni.