Valooma 8 - UTESITAMENTI UMPYA

¹ Pwu lino nakukuli ukutsovwa uvuvivi avali mwa Kilisiti Jesu.

² Mańa ulusimilitso lwa Mepo umpelavwumi lwu lumbangile une ndi mwa Kilisiti Jesu, lumbangile kulusimilitso ulwipela uvutulanongwa nuvuswe.

³ Mańa akatsilemile isimilitso ulwakuva ummana gwitu gwa mbivi ugwatsipelye uvudekedeke, kwu avombile Unguluve upwu ansuṅaga unswambe upwu amwanihitsaga nduvwe twi vatulanongwa ummana ukuta amale uvutulanongwa. Pwu uvutulanongwa ajatsitse mummana.

⁴ Pwu ukuta uvugolosu uvwu tsatuhigaga isimilitso vuvombwagwa mwavwe twi lino natukonga itsa mmana gwa mbivi, twi tukonga tsitsa Mepo.

⁵ Ulwakuva avańa-mmana gwa mbivi vwu tukisagila tu tunu twa mańa gwa mbivi, avene avańa-Mepo vwu vikisagila tu tunu twa Mepo.

⁶ Mańa ugwene ummana gwa mbivi gulotsa kuvuswe pakwisagila, umwene UMepo vi ilotsa kuvwumi nakulunotsehetso.

⁷ Mańa itsu gukisagila ummana gwa mbivi tsili vutavangwa nu-Nguluve, ulwakuva natsileva kusimilitso tsa Nguluve, ulwakuva ukulumańa kwu natsilumańili ukuleva.

⁸ Avene avańa-mmana gwa mbivi vwu navikunkela Unguluve.

⁹ Uńe nandi vańa-mmana gwa mbivi, bako ndi vańa-Mepo angave UMepo va Nguluve jilweli atsengile mwane Lola uvi niva nu-Mepo va Kilisiti vi niva munu va mwene.

¹⁰ Apene ngave ndi nu-Kilisiti mwitumbu mwane, pwu ugwene ummana gwu vuswe uvutulanongwa, ugwene umwuja lola gwu ndi vumi uvugolosu.

¹¹ Apene angave umwene UMepo va uvi antsusaga mbaswe UJesu, ngave ndi nave, angave atsengile mwitumbu mwańe, pwu nuńe umwene uvi antsusaga mbaswe UKilisiti, pwu nuńe imihana gińo imiswe alagipetsaga uvwumi ulwakuva UMepo va mwene ndi nave atsengile mwańe.

¹² Pwu lino ńi vajango ndita kwukuva tuli vakutsigilwa uvwe. Lola natuli va kututsigila ummana gwa mbivi ugu, natuli vakutsikonga itsa mańa gwa mbivi.

¹³ Mańa ngave mukutsikonga itsa mmana gwa mbivi pwu ndaswa. Mańa ngave imbombo tsa mańa gwa mbivi mukutsibuda nu-Mepo pwu ndavakwo.

¹⁴ Ulwakuva voni uvwu ikuvagendetsa UMepo va Nguluve vwu vańa-Nguluve avene.

¹⁵ Mańa umwene UMepo uvi mwupilye vi navagulano navaku-valotsa ukuvuja kuludwado. Bako vi Mepo va vwana umwene uvi mwupilye, vi uvi tukutilamwo twita: Aba kukuta dada.

¹⁶ Mańa jujwa ju Mepo ikugwidikila umwuja gwitu ita ndi vana va Nguluve.

¹⁷ Mańa tungave tuli vana va Nguluve pwu tuli vingila pavuhale, pwu tuli vingila pavuhale vwa Nguluve, vwu tuli vingila luninye nu-Kilisiti, tungave jilweli tukuvilwa luninye nave nduvwu tulagini-vwagwa lunine nave.

¹⁸ Mańa upwu ndikisagila pwu ndita: Tsoni itsu tukuvilwa lino itsa pakilunga iki tsu natsinogili pakutsihwananya pavuvaha uvwu twiva pakwupilila vwu vuvoneka lungave lusiku.

¹⁹ Mańa nasyene isipelilwe syoni upwu sikaluka pwu pamiho silotsitse upwu valavonekela avańa-Nguluve ukuva vańa-Nguluve jilweli.

²⁰ Mańa nasyene isipelilwe syilesitse kuvuvule, lola ndatetsaga syanogilwe syene ukwilesa, bako syilesehitse mujujwa uvi asilesaga. Syilesitse nuluhuvilo sihuvila.

²¹ Mańa nasyene isipelilwe isi lungave lusiku pwu silavangwagwa ulwu syipelile ukuva sigulano sya vuvosu, nasyene silasikaga kuvuvopolwa uvwu valava navwo avana va Nguluve vwu vasike kuvuvaha.

²² Ulwakuva tusimańile nuvwe isipelwa syoni ukuta sitsile sisike nakulino kunu, nasyene sikiginya sikutsoni, nasyene sikigolola.

²³ Lola ndatetsaga sikiginya sisyu syene, bako nuvwe twi tuluvwike UMepo, nuvwe tukiginya mwitumbu tukaluka twita: Tungave twapelwagwa vana lino, tungave twavangwagwa ummana.

²⁴ Mańa upwu twapokivwagwa pwu atye tuhuvilage. Mańa uluhuvilo uluvoneka kumiho lwu nalwiva luhuvilo. Vi veni uvi ihuvila isivoneka kumiho?

²⁵ Tungave tuhuvila isyu nasivoneka pwu twisiha uluvipo vuvule pakusipulikila.

²⁶ Vwu agahile vuvule-vule nu-Mepo. Namwene ikutupokela uvudekedeke vwitu. Mańa nakwene nakukwisaja kwu natulumanili ukwisaja nduvwu upita twisajage. Bako nakwene ikutwimila jujwa ju Mepo ikututsovela ndwisajo ulutsilamameńu agange.

²⁷ Umwene uvi ikutsisingutsanya inumbula tsitu, vi atsimańile tsoni itsu isaganya UMepo, mańa tsoni itsu ikuvatsovela avavalatse tsu tsikongine nu-Nguluve.

²⁸ Mańa tulumańile uvwe: Voni avanganile Unguluve jilweli twoni utunu tutangana vuvule pakuvagaha, nditsova uvwu avilangile nduvwu isagye ṅani umwene.

²⁹ Mańa uvwu avamańe ṅani katale vwu avahalye ṅani ukuta vwu vavetsaga kihwani kya nswambe, umwene pwu ukuta ave mbele mbańamunu vavongosu.

³⁰ Avene uvwu avahalye ṅani vwu avilangile. Avene uvwu avilangile, vwu avatsovile uvugolosu. Avene uvwu avatsovile uvugolosu, vwu avapye nuvuvaha.

³¹ Tutsovage kiki lino? Twita: Angave Unguluve ali kuluvasu lwitu pwu veni ate ave ntavangwa vitu?

³² Umwene uvi unswambe nandilili ikisa, vi antagile vuvule ukuta atuswilage, vi abelage ndeti ukutupa mumwene jujwa syoni?

³³ Pwu veni ate avahige itsinge avahalilwe va Nguluve? Mańa kwale Unguluve uvi ikuvatsova uvugolosu.

³⁴ Pwu veni ate avatsovage uvuvivi? Mańa pwale UKilisiti Jesu uvi atuswilye, ena alutilye nditetsage mańa atsukile, uvi ali kukivoko ikyandyo kya Nguluve, uvi ikutwimila uvwe.

³⁵ Pwu veni ate atudadalulanyage kulugano lwa Kilisiti? Nda vutudadalulanye uvusumbe, nda uvukuvilwa, nda ukuswimwa, nda inzala, nda uvutsilakuswala, nda ukupona ukuswa, nda ulwuvo?

³⁶ Nduvwu livigilwe ilita: Ulwakuva tuli vako pwu tubudwa sikutsoni vuvule twihuma napavusiku tukasika nakumihe. Upwu vikutusagila pwu vita twi ṅolo tsa kuhinzivwa uvwe.

³⁷ Lweli uvwe tsoni tsitsitsi tulutilye ukutsilesehetsa mumwene jujwa uvi atuganile.

³⁸ Mańa ndilumanile une jilweli: Syoni vuvule navwu vwumi navu vuswe nava vasunwa natsi mepo iṅuludeva natwu tunu twa lino vuvule-vule natutwa lungave lusiku nasi sidego vuvule

³⁹ navu vutale naku kwika nakangave kwu kanu akange akapelivwa, syoni vuvule nasilatudadalulanye lusiku uvwe kulugano lwa Nguluve uluvonekye mwa Kilisiti Jesu unkuludeva vitu.