Valooma 7 - UTESITAMENTI UMPYA

¹ Ńi vajango nda nantsimańili isimilitso? Mańa upwu nditsova nuńe pwu nditsova navatsimańile isimilitso. Mańa sikutsoni upwu alikwo kuvwumi umunu pwu tsinkavile tsyipelile ukuva nkuludeva vamwene.

² Mańa nundala uvi ali pangosi vi isimilitso tsinkungile kungosi sikutsoni vwu aliku kuvwumi ungosi. Mańa aswitsaga ungosi pwu igotolwa kulusimilitso ulwankungile kungosi.

³ Pwu lino upwu ibiha kujyunge vwu tango aliku kuvwumi ungosi, pwu vitetsaga ndigu undala. Aswitsage ungosi pwu avopwike kulusimilitso lulya, pwu niva ndigu nupwu ibiha kungosi ujyunge.

⁴ Vwu nwanile nuńe ńi vajango. Nuńe kwu kuva muswe kusimilitso, muswilye mummana mwa Kilisiti. Pwu mwipelile ukuva va jyunge vuvule, mwipelile ukuva va uvi atsukage mbaswe. Pwu twivoni ukuta tummupilage iseke Unguluve.

⁵ Mańa vwu tango tukonga itsa mmana ugu gwa mbivi, pwu ukupya kwa vutulanongwa uku tsihambula tsi similitso pwu kuvombile mwoni ntupagika twa mihana gitu, pwu tuhupile iseke imelavuswe.

⁶ Lino pwu tuvopwike kusimilitso ulwakuva tuswe ku akatukungile. Pwu tuvombye mbuvombelo uvupya uvwihuma mwa Mepo, tulekile ukuvombela mbuvombelo uvulala uvwakongaga umwu tsavigilwe mwa kalata.

⁷ Tutsove kiki lino? Nda tutetsage isimilitso nuvutulanongwa vuliṅine vuvule? Kwu bako! Mańa uvwene uvutulanongwa vwu nandivumańili tsingave isimilitso tsijagile itsimbulile. Mańa navwene nuvunogwe nandivumańili tsingave isimilitso natsimbulili natsitili: Ulanogwagwa.

⁸ Pwu uvutulanongwa vutengwe ndulagilo, vuhambulye uvunogwe vwoni uvuvelye mwitumbu mwane. Ulwakuva upwu natsikuli isimilitso pwu nuvutulanongwa vuliṅine vuswe tango.

⁹ Une vwu nandalenatso tango nisimilitso katale pwu ndivye mwumi. Lola vwu lwitsile ulusimilitso pwu vutsukile uvutulanongwa uvwene vuvye vwumi, mańa une pwu ndiswe.

¹⁰ Pwu ndivwene lwu lulagilo ulwale lwa kumelela uvwumi lwu lumelye vwu vuswe.

¹¹ Mańa uvutulanongwa vutengwe mundulagilo, vunekile vumbudile nalwo ululagilo.

¹² Mańa isimilitso tswu mbalatse nalwene nululagilo lwu luvalatse lugolosu lunnonu.

¹³ Nda pange kwu kuva akanu akannonu aka kwu kamelye ukuswa? Kwu bako! Mańa vwu vutulanongwa pwu vwale vwa kuvoneka ukuva vutulanongwa jilweli, pwu vubudile akanu akannonu aka. Pwu lino uvutulanongwa vuvonekye mundulagilo ukulutilila vuvule ukuva vutulanongwa jilweli.

¹⁴ Mańa tutsimańile isimilitso ukuva tsa ju Mepo, lola une ndili va mmana gwa mbivi. Umamna gwango gwa mbivi gungulile une gumelye ukuva ngulano va vutulanongwa.

¹⁵ Mańa nukwivona une nandikivona vunnonu itsu ndivomba. Mańa nandivomba itsu ndinogilwe ukuvomba, bako tsitsu nandinogilwi ukuvomba tsu ndivomba tsitso.

¹⁶ Mańa ndingave ndivomba itsu nandinogilwi vwu nditsidikye ṅani isimilitso ukuva tsu nnonu tsitso.

¹⁷ Kwukuva lino nandiva nene ndi ndivomba tsitsitsi, bako kwu kuva vuvomba vwu vutulanongwa uvutsengile mwitumbu mwane.

¹⁸ Mańa ndilumańile une: Mwane umu, nditsova mummana gwango gwa mbivi umu mwu nasitsengili isinge isinnonu. Mańa ukwene ukunogwa kwu kwiki kwu ndinogilwe ukuvomba innonu, lola upwu ndita nditsivombe, pwu ndivona tsindemile.

¹⁹ Ulwakuva innonu itsu ndinogilwe tsu nandivomba, lola imbivi itsu nandinogilwi tsu ndivomba itso.

²⁰ Apene ndingave ndivomba itsu nandinogilwi pwu humbe nandiva nene ndi ndikutsivomba, bako pwu humbe vuvomba vwu vutulanongwa uvutsengile mwitumbu mwane.

²¹ Pwu ndivona mwane ulusimilitso ndi ndilonda ukuvomba tsi nnonu tsibadama tsi mbivi.

²² Mańa umwene umunu vango va ngati vi tsinkelye isimilitso tsa Nguluve.

²³ Lola muntupagika twa mummana gwango mwundivona mwululi ulunge ulusimilitso, lwu lwilwa iligoha nulusimilitso lwa nduhala lwango, lukumela nkunge va lusimilitso lwa vutulanongwa ululi ntupagika twa mummana gwango.

²⁴ Ndi munu ndi va vusumbe une veni amoke kummana ugulevile kuvuswe uvwu?

²⁵ Lola ndisana kwa Nguluve mwa Jesu Kilisiti unkuludeva vitu. Pwu une lino ndi munu vuvule nduhala lwango mwu ndikutsikonga isimilitso tsa Nguluve, mańa mummana gwango gwa mbivi mwu ndikulukonga lu lusimilitso lwa vutulanongwa.