Valooma 6 - UTESITAMENTI UMPYA

¹ Tutetsage kiki lino? Nda tutetsage tuvetsage mbutulanongwa pwu ukuta uluhungu mwu luvalilage?

² Kwu bako! Twi tuswe kuvutulanongwa nda tutetsage tuvuje twandise?

³ Uńe nda namwimańili ukuta twivoni twi twotsivwe mwa Kilisiti Jesu twotsivwe mbuswe vwa mwene uvwu atuswilaga?

⁴ Mańa upwu twasililwe luninie nave, nditsova upwu twotsivwagwa mbuswe vwamwene, pwu twasililwe ukuta pwu twitse tuvetsage mbwumi uvupya nuvwe, nduvwu namwene UKilisiti uvuvaha vwa dadaje vuntsusitse mbaswe.

⁵ Mańa tungave tuhangile nave pakuswila vuvwa vwene, pwu humbe napene pakutsuka tulahangaga nave vuvule-vule,

⁶ Mańa tulumańile ukuta umunu vitu undala uju atovelilwe luninye nave pakidamiṅanye vi atovelilwe ukuta ummana gwa vugalo ugu gusilile, nuvwe ukuta tulongeletsaga ukuvuvombela uvugalo lino.

⁷ Mańa uvi aswe, vi pwu baho ilamwe navwo uvutulanongwa.

⁸ Ino lino tungave tuswilye luninye nave UKilisiti, pwu tulumańile ukuta namwene mbwumi tulava twivoni nave.

⁹ Ulwakuva tulumańile ukuta UKilisiti lino upwu atsukile mbaswe, pwu nivuja nikwandisa ukuswa. Uvwene uvuswe navulandise lusiku ukwipela nkuludeva va mwene.

¹⁰ Lola uvuswe uvwu aswe, vwu aswe vwu vutulanongwa akamalila ṅani, uvwene lola uvwumi uvwu mwumi lino, vwu vwa ju Nguluve mwene.

¹¹ Vwu ngahage vuvule-vule lino uńe. Upwu mukilola pwu mwimańage ukuta tuswe vuvule kuvugalo. Apene upwu tuli vumi lino, pwu tuli va ju Nguluve mwa Kilisiti Jesu.

¹² Pwu uvutulanongwa upita vulipelaga vukuludeva mummana gwińo gwa vuswe umwu upita ndavwidikaga uvunogwe vwa gwene.

¹³ Natwene utupagika twa mummana gwińo twu ndahilikaga kuvutulanongwa ukuta twipelage twa kuvombela uvugalo. Bako mwihilikage kwa Nguluve, mbonekage vuvule ukuta ndi vumi ńi mwaswe. Natwene utupagika twa mummana gwińo natwene muhilikage kwa Nguluve twipelage twa kuvombela itsa vugolosu.

¹⁴ Mańa uvutulanongwa pwu navulavalese uńe, Ulwakuva natsivakavili tsi similitso, bako luvakavile lu luhungu.

¹⁵ Ndeti lino? Nda tutulage vuvule inongwa ulwakuva natsitukavili tsi similitso, ulwakuva lutukavile lu luhungu? Kwu bako.

¹⁶ Namwimańili uńe? Mańa uvi mwipelile ukuva vagulano va mwene mutye tupulikage kumwene, mańa ndi vagulano va mwene jujwa, vi upita mumpulikage itsu ikuvasuṅa. Mumwa mbetsage va vutulanongwa, pwu mulotsage kuvuswe, mumwa mbetsage vagulano va lupulihitso, pwu mulotsage kuvugolosu.

¹⁷ Lola lino pwu ndisana kwa Nguluve ndita mwalimi. Ulwakuva ukuva vagulano va vutulanongwa kwu mwale vagulano katale, lola lino pwu ilivangili ndidike ninumbula jyoni nduvwu mumańisivwe.

¹⁸ Lino ulwakuva mbangilwe kuvutulanongwa pwu mwipelile ukuva vagulano va vugolosu.

¹⁹ Ukwa nditsovelage umwu vitsovela avanu ulwakuva ndi vanu nuńe ndi vadeke. Vwu katale utupagika twa mummana gwińo nkatupela tugulano twa vuvivi tutsilasimilitso mukata tuvombe itsu natsiva musimilitso, vwu ngahage nalino utupagika utwa mummana gwińo ntupelage tugulano twa vugolosu ntetsage tuvomba ulwitekelo.

²⁰ Ulwakuva upwu mwale vagulano va vuvivi, pwu mwale vavopolwa kuvugolosu.

²¹ Pwu mwahupaga iseke ńi palya? Nda pwu mwahupaga itsikuvapelela lino isoni kuntwe? Ulwakuva itsene kunepo vwale vuswe vwene.

²² Lola lino upwu mbopwilwe kuvugalo upwu mwipelile ukuva vagulano va Nguluve, pwu muhupa iseke tsińo itsilotsa kulwisajo. Itsene kunepo vwumi vwa sikutsoni.

²³ Mańa isihombwa isyu vukuvahomba uvugalo vwu vuswe, ilyene iligavo ilyu ikuvagavila Unguluve vwu vwumi vwa sikutsoni uvwu atupelye mwa Jesu Kilisiti unkuludeva vitu.