Valooma 5 - UTESITAMENTI UMPYA

¹ Pwu lino ulwakuva ulwidiko lutupelye ukutsovwa uvugolosu pwu unkuludeva vitu UJesu Kilisiti atunotsitse nu-Nguluve.

² Vi uju atudindulye twi tungave twidike pandyango gwa kwingilila nduhungu ulu twimilemwo. Pwu tukiginya uluhuvilo ulwu tuhuvila ukutsisika kuvuvaha vwa Nguluve.

³ Ndatetsaga tukiginya kene aka. Bako nuvusumbe tukiginya. Ulwakuva tuvumańile uvusumbe ukuta vwipela livungo.

⁴ Ilyene ilivungo lipela uvugosi inumbula, uvwene uvugosi inumbula vwipela uluhuvilo.

⁵ Ulwene uluhuvilo lola nalukunjejevusa umunu ulwakuva ulugano lwa Nguluve adudile munumbula tsitu UMepo Umbalatse uvi tumwupilye.

⁶ Mańa UKilisiti atuswilye twi vatulanongwa vwu tango tuli vadeke vuvule. Akatuswila pamwaka gwamwene ugwu isagye umwene.

⁷ Mańa namwene umunu ungolosu ali mpamato-mpamato vuvule avikunswila. Avene avikunswila panongwa ijyinge innonu vwu ńage vivetsagakwo vaninye avihumwa.

⁸ Umwene Unguluve ulugano lwa mwene ulwu atuganile lwu atwimikye ṅani upwu UKilisiti atuswilage vwu tango tuli mitulanongwa vuvule.

⁹ Pwu nda alemwagwe ukulutilila sitso lino ukutupoka kuluvipo? Nditsova lino upwu tutsovelilwe ṅani munkisa gwa mwene uvugolosu.

¹⁰ Ulwakuva vungave vwatusajinye nu-Nguluve vwu vuswe vwa nswambe vwu tulivatavangwa tango, pwu uvwene uvwumi vwa mwene nda vulemwagwe ukutupoka twi tusajanye nave ṅani lino?

¹¹ Ndatetsaga tsu tuli natso tsene tsitsitsi, bako nukwiginya tukiginya mwa Nguluve twita vi vi Nguluve vitu. Tsu tutsovela mwa Jesu Kilisiti unkuludeva vitu uvi atukavye ulusajano lino.

¹² Pwu ndita: Nkilunga umu uvutulanongwa avugegile umunu mpamato vuvule, pwu uvutulanongwa vugegile uvuswe. Pwu uvuswe vusikye avanu voni ulwakuva voni vatulile inongwa.

¹³ Napene nupwu tsikanale isimilitso napene uvwene uvutulanongwa vulimwo nkilunga. Mańa umunu nihigwa uvutulanongwa vwu isimilitso natsikuli.

¹⁴ Mańa sikutsoni pakuhuma pa-Adamu ukutsisika pa-Mose uvuswe vwale vukuludeva. Vuvalesitse voni avanu nuvwu navatulili inongwa ijili ndi jya Adamu. Mańa umwene Adamu kyu kihwani kya uvi avetsaga pakwitsa.

¹⁵ Lola ndatetsaga uvwene uvupi vuli ndukugwa kulya, bako. Mańa apene upwu kungave ukugwa kwa munu mpamato mwene ulya, kungave kuvabudile vavongosu, pwu lulutilye nuluhungu lwa Nguluve ukuvalesukila vavongoso. Nditsova lu luhungu ulwu avapetsaga vuvule ulwa munu mpamato mwene uju, ulwa Jesu Kilisiti.

¹⁶ Nasyene isipevwa silutile nasili ndaka akapelaga ukugwa kwa munu mpamato mwene ulya. Mańa ukwene ukuhigwa kuhumile munongwa jya munu mpamato mwene, kuvapelye ukutsovwa uvuvivi avanu. Lola uvwene uvupi vwa luhungu lusakwike pakugwa ku kwongosu, vwu vuvapelye ukutsovwa uvugolosu avanu.

¹⁷ Mańa uvuswe vuvalesitse vuvule, vungave avanu voni vwavalesehitse mumpamato mwene ulya ulwakuva agwe mpamato ulya, pwu voni avanu vitola nuluhungu ululesuka nuvugolosu uvwu ikuvapa umwene, ndita pwu vilutililaga avene pakwipela vakuludeva vwu vali kuvwumi. Vikipelelaga vakuludeva mumpamato mwene navene mwa Jesu Kilisiti.

¹⁸ Pwu ndita: Nduvwu ukugwa kupamato kwene uku kuvagegye ukutsovwa uvuvivi avanu voni, vwu ligahile nilyene nilimeńu lipamato lyene ilya kuvatsova uvugolosu avanu, nalyene livagegye uvugolosu uvupelavwumi voni avanu.

¹⁹ Mańa nduvwu vipelaga vatulanongwa avongosu valya ulwakuva abelaga ukupulika umunu mpamato ulya, vwu valavujaga valagahaga vuvule-vule, valapelivwa vagolosu vavongosu ulwakuva apulikaga mpamato mwene uju.

²⁰ Itsene isimilitso tsikongile mumbele ukwitsa. Tsale tsa kukutotsa ukugwa ukuta kuve kwongosu. Apene upwu vungave uvutulanongwa vwihusitse pwu nuluhungu lulutilye ukulesuka,

²¹ pwu ukuta uluhungu mbugolosu lwipelage lukuludeva, pwu ukuta lupelage nuvwumi uvutsilakusila lusiku mwa Jesu Kilisiti unkuludeva vitu, nduvwu nuvutulanongwa vwipelile vukuludeva, vukapela nuvuswe.