Valooma 4 - UTESITAMENTI UMPYA

¹ Mańa umwene Abulahamu untengutsi vitu vi twita ummana gwa mwene gunkavye kiki?

² Ulwakuva Abulahamu tsingave tsinkavye uvugolosu imbombo tsa mwene itsu avombile, vwu humbe ali natso itsa kwiginya umwene. Kwa Nguluve kwu nali natso.

³ Mańa kalata ikutuvula kiki? Mańa ita: Abulahamu akamwidika Unguluve, pwu Unguluve akata: Kwukuva vwu vugolosu ulwidiko lwa mwene.

⁴ Umwene umunu uvi avombile vi uluhombo lwa mwene navikumpa ukuta vupi vwa nduhungu. Bako pwu ikava vuvule isya pamaka ga mwene.

⁵ Mańa uvi nihuvilila pambombo tsa mwene, uvi ikumwidika jujwa uvi ikuvapa uvugolosu navatulanongwa vi ulwidiko lwa mwene ita kwukuva vwu vugolosu vuvule,

⁶ Nduvwu nu-Ndaviti ikuntsova ulugataluko umunu uvi Unguluve antsovile uvugolosu vwu navombili kinu imbombo,

⁷ upwu ita: Va ndugataluko avasyikililwe imbivi, uvwu inongwa tsa vene tsisihilwe.

⁸ Va ndugataluko umunu uvi unkuludeva inongwa tsa mwene nikumbalila nakinu.

⁹ Uvwene uvugolosu uvwu ndeti, nda ikuntsova unkegetwa mwene, pange nda ikuntsova namwene untsilakukegetwa? Mańa tutye: Abulahamu akambalila lu lwidiko akata kwukuva vwu vugolosu.

¹⁰ Umwene ambalilaga vwu ali ndeti? Nda vwu akegetilwe, nda pange vwu akanale nukukegetwa? Mańa nambalili vwu akegetilwe, bako ambalye vwu akanale ukugegetwa.

¹¹ Lola pwu akupilila nikimańilo iki kya lwiho lwa kukegetwa, pwu ukukegetwa ukwa kukipela ukuva kikolekelo kya kuvusimilitsa uvugolosu uvwu lwankavye ulwidiko vwu akanale ukukegetwa. Ulwakuva Unguluve atetsaga ivetsaga dadajavo voni avikwidika vwu navakegetilwi, navene ukuta vavalilivwagwe uvugolosu.

¹² Atetsaga ivetsaga dadajavo navene avakegetwa avatye nukukegetwa vatye nukukada mmalunde ga lwidiko lwa dada Abulahamu ulwu idike vwu akanale nukukegetwa.

¹³ Mańa ulwidiṅano ulwu vidiṅine navo va Abulahamu nimbeju jya mwene jyoni, ulwu atye vikukihala kyoni ikilunga ukuta vuhale, lwu nampelili musimilitso umwene, bako ampelye mbugolosu vwa palwidiko.

¹⁴ Mańa vangave vwu vavetsaga vingila-vuhale uvwu va va musimilitso, pwu humbe ulwidiko lwipelile ukuva ludindule vuvule, pwu ndili lugotwe nalu lwidiṅano.

¹⁵ Mańa itsene isimilitso tsu tsipela uluvipo. Mańa upwu tsingave natsikuli isimilitso, pwu nalwene ulumeno nalukuli.

¹⁶ Pwu ndita uvuhale vugendelaga ndwidiko ulwakuva atetsaga vuvetsaga vupi vwa nduhungu, ulwakuva atetsaga pwu nitsu vidiṅine tsikujitsilaga jyoni imbeju (ja Abulahamu). Mańa ndatetsaga pange ndikuvatsova vene avagendile musimilitso ukuva mbeju jya Abulahamu, bako ndikuvatsova navene avagendile ndwidiko lwa Abulahamu, uvi ipelile ukuva vi dadajitu twivoni.

¹⁷ Nduvwu livigilwe ilita: Ndikupelile dadajavo isivumbuko sisyongosu. Vwu ali vuvule-vule kumiho kwa Nguluve, uvi amwidikaga umwene uvi ikuvatsusa navaswe, uvi ikwilanga isyu nasikuli siva ndi silikwo.

¹⁸ Umwene (Abulahamu) vwu nasikuli isinge isya kuhuvila, pwu akidikila lwu luhuvilo ulu ahuvilaga ukuta ndilipelaga ukuva dadajavo isivumbuko sisyongosu, nduvwu livigilwe ilita: Vwu jilava vuvule-vule imbeju jyako.

¹⁹ Napene nupwu umwene asigye padebe vuvule ukumala imyaka imilevulo kitsigo, napene akaleka nukujeta ulwidiko vwu ikilola ummana gwa mwene uguswe, vwu ikundola nu-Sala ukwuma imapo.

²⁰ Umwene lukaleka ukuva nulunge ulubedo ulwa kumpelela ukwinana ulwidiṅano lwa Nguluve ukuta pange lulitsaga. Bako umwene akidulusa ndwidiko akampa uvuvaha Unguluve.

²¹ Umwene akammańa jilweli munumbula jya mwene ukuta isyu vidiṅine syu alumańile ukupela nasikundema.

²² Pwu tsitsitsi Unguluve tsu akambalila akata: kwukuva vwu vugolosu.

²³ Mańa upwu tsivigilwe pakalata itsita: Akambalila akata kwukuva vwu vugolosu, pwu ndatetsaga tsa jujwa mwene,

²⁴ bako tsitu nuvwe twi tulavalilwagwa nuvwe tumwidike jujwa uvi antsusaga mbaswe unkuludeva vitu UJesu.

²⁵ Uvi Unguluve upwu antagaga mbuswe pwu akata ikuvuswilaga uvugalo vwitu vwoni, nupwu antsusaga pwu akata mwu vatsovelwagwe ukuva vagolosu uvwe.