Valooma 3 - UTESITAMENTI UMPYA

¹ Pwu lino ndivutsa ndita: Ava-Juta vavalutile kiki line avange avanu? Ukwene ukukegetwa kuvapye kiki lino?

² Kuvapye sitso kwoni nakwoni. Mańa Unguluve alongwe avapye itsu atsovaga katale.

³ Ndeti lino? Apene upwu vangave avange navidiki, pwu ukupulika kwa vene nda pange kukilivulaga uvugolosu vwa Nguluve?

⁴ Kwu bako. Ukwa ndikuvule umwu tsivelye: Va jilweli mwene Unguluve, avanu voni vanwasi vuvule nduvwu livigilwe ilita: Pwu ukuta vakutsove uvugolosu uve itsu vwihiga, uvalemage upwu muhigana.

⁵ Apene vungave uvugalo vwitu vukuvwimika uvugolosu vwa Nguluve pwu tutetsage kiki? Pwu nda humbe Unguluve ngalo upwu ikutuvungila nduvipo? Vwu uvwe twi vanu vwu twiva vuvule-vule.

⁶ Kwu bako. Tsingave vwu tsale vuvule-vule pwu akihigaga ndeti Unguluve ikilunga?

⁷ Mańa vungave uvunwasi vwane vukumpa uvuvaha Unguluve ulwakuva vukuvujumbika uvwajilweli vwa mwene, pwu nda ańige uvutulanongwa uńe?

⁸ Nda pwu ndili tungave twitsova itsu vikutuhelula upwu vita twita: Tuvombage imbivi, mańa mwu tsihumaga innonu? Vwu ava agolwise umwene upwu ikutsidumulila ṅani inongwa tsavene.

⁹ Ndeti lino? Nda tuvalutile avange uvwe (twi va-Juta)? Bako. Mańa tuvahigile tango voni nava-Juta nava-Giliki tutye voni valevile kuvutulanongwa.

¹⁰ Nduvwu livigilwe ilita: Nakuli nujyunge ungolosu, nampamato vuvule.

¹¹ Nakuli nujyunge uva kutsivona inongwa, nakuli nujyunge uvi ikundonda Unguluve.

¹² Voni vajagile inzila, voni vavejangile luninye. Nakuli nujyunge uvi ivomba innonu, bako nampamato.

¹³ Avene kukitapavugale vwu vuguli uvuli vudindule, indimi tsavene vuteki vwene. Mundomo gwavene mwugule unkali gwa ńandalwe.

¹⁴ Mundomo mwu lulesuka ulukoto nuvutalamu avene.

¹⁵ Amalunde ga vene nagihava upwu vibiha pakududa unkisa.

¹⁶ Luvejangiko lwene, vukuvilwa vwene umwu vagendile.

¹⁷ Ijyene inzila jya lunotsehetso navajimańili.

¹⁸ Uludwado ulwa kundwada Unguluve lwu navaluvikili kumiho avene.

¹⁹ Lola uvwe tulumańile: Tsoni itsitsova isimilitso tsu tsikuvavula avali mmalunde musimilitso. Voni avanu ukuta tsivasundikage kundomo nikilunga kyoni ukuta kyipelage ukuva kya kukihiga Unguluve.

²⁰ Ulwakuva imbombo itsu vuvomba ulwakuva tsilagye isimilitso, tsu natsilampe nujyunge umunu uvugolosu kumiho kwa Nguluve. Mańa isimilitso tsu tsikumpelela ukuvumańa uvutulanongwa umunu.

²¹ Mańa uvwene uvugolosu uvwu ikutupa Unguluve vwu vuvonike pavuvalasu natsivuvonehitsi isimilitso. Vutsovilwe ukuva vwu vwene namusimilitso nambańamalago.

²² Lola nditsova uvugolosu uvwu ikutupa Unguluve, uvwihuma ndwidiko ulwa kumwidikila UJesu Kilisiti, uvwu atye vwa voni avamwidike. Mańa valiṅanile voni navasupiṅini.

²³ Mańa voni vatulile inongwa, vali padebe uvunnonu uvwu Unguluve atye viva navwo.

²⁴ Ikuvapa vuvule jujwa uvugolosu ulwakuva ńaluhungu umwene. Ikuvapa nduvango ulwu avavangilaga UKilisiti Jesu.

²⁵ Uvi Unguluve andondye ṅani atye munkisa gwa mwene mwu ikipela ukuva kanu ka kusajanila navo avikumwidika. Akata mwu vuvonekela uvugolosu vwane. Mańa atsilekile vuvule inongwa itsu vatulile sikutsoni katale upwu atsovaga sikutsoni Unguluve.

²⁶ Akata nalino vuvule-vule mwu vuvonekela uvugolosu vwane. Akata ndivoneke ukuva nene ngolosu une ndimwene, ndivoneke ukuvatsova uvugolosu navene avamwidike UJesu.

²⁷ Ndeti lino, ulwiginyo luli ndaku? Bako ludindilwe panzi. Lwu lusimilitso luliku ulundindye panzi? Nda lwu lusimilitso ulwita vombaga sininie? Bako lwu lulagilo ulwita idikaga.

²⁸ Vuvule lino tumalisa twita: Pwu umunu ikuvuvona ndwidiko uvugolosu vwu navombili kinu mumbombo tsa kukonga musimilitso.

²⁹ Umwene Unguluve nda vi Nguluve va va-Juta vene? Unguluve va vene nda nava vapanzi? Ena umwene vi vi Nguluve nava vapanzi.

³⁰ Mańa Unguluve ali mpamato mwene. Uvi atye navakegetwa ikuvatsova uvugolosu uvwihuma ndwidiko, uvi navatsilakukegetwa uvugolosu ikuvatsovela mundwidiko ulwu vidike–vi jujwa mwene.

³¹ Nda kwu kuva kwa kugotola tutsigotwe pange nulwidiko isimilitso? Kwu bako. Bako kwu kutsimika tutsimike sitso.