Valooma 16 - UTESITAMENTI UMPYA

¹ Uńe ndikuvalagilila nu-Pebe umatsa vitu uvi ikututanga imbombo mumpelela gwa mu-Kenkileja.

² Ndita mu mwupililage vunnonu ńi ndi munkuludeva nduvwu panogye ukuvupilila avavalatse. Muntange koni ukwu ngave mbwene asumbilwe. Mańa umwene atutangaga twi vongosu nuńe navange.

³ Mumembehetsage nu-Pilisika nu-Akwila uvwutuli vavombanitsi imbombo tsa Kilisiti Jesu.

⁴ Vwu avahilike imisingo gya vene vwu vita tumpoke uvwumi vwango. Ndatetsaga ndili ndimwene pakusana kuvene, bako gyoni nimipelela gya mbapanzi gisana kuvene gita mwalimi.

⁵ Mumembehetse nagwene numpelela ugulundamana nńumba javene. Mumembehetse nu-Epeleneti unjyango uvi ipelile ukuva siluvukilwa pakumwidika UKilisiti mu-Asija.

⁶ Mumembehetse nu-Malija uvi ijumilitsaga sitso pakuvavombela uńe.

⁷ Mumembehetse nu-Andolonika nu-Junijo uvwu tuli kivumbuko kipamato kyene nune. Vwu uvwu twale nńololo mpamato gwene twivoni nune, vwu avapulikike mbapositili, vwu avalongwe mbulongolo kwane ukuva mwa Kilisiti.

⁸ Mumembehetse nu-Ampilyati unjyango uvi tumańine munkuludeva.

⁹ Mumembehetse nu-Ulibani uvi ikututanga imbombo tsa Kilisiti nu-Sitaki unjyango.

¹⁰ Mumembehetse nu-Apele uvi avonike sitso ukuva mwa Kilisiti. Mumembehetse navańa-Alisitobuli,

¹¹ Mumembehetse nu-Helotija uvi tuli kivumbuko kipamato kyene nune. Mumembehetse voni navańa-Nalikisi avipelile ukuva va ju nkuludeva.

¹² Mumembehetse nu-Tilipena nu-Tiliposa avadala avikijumilitsa imbombo tsa nkuludeva. Mumembehetse nu-Pelesi undala ujyango uvi ijumilitsaga imbombo tsa nkuludeva.

¹³ Mumembehetse nu-Lupu umalwa va nkuludeva nuvańina uvi ipelile ukuva jyuva une.

¹⁴ Mumembehetse nu-Asinkiliti nu-Pilego nu-Helimi nu-Patiloba nu-Helima navakilisiti voni avikina navo.

¹⁵ Mumembehetse nu-Pilologi nu-Julija nu-Neli numatsave nu-Olimpa navavalatse voni avikina navo.

¹⁶ Mpembetsanye ńivene mpembetsanye nulutsibo uluvalatse. Gikuvapembetsa uńe nimipelela gya Kilisiti gyoni.

¹⁷ Lola ndikuvalagila ńi vajitu ndita: Mbamańage avita nukuvalekeṅanya vita nukuvapelela itsa kuvagetsa uvwu navikonga mutsitso vavamańise avavamańisaga uńe. Vwu ndahangaga navo.

¹⁸ Mańa avanu ava vwu navikumbombela UKilisiti unkuludeva vitu. Bako li litumbu lyavene lyene lyu vikuvateka avanumbula inzilakutsimańa imbivi.

¹⁹ Mańa uńe mpulikike mwoni-mwoni ukupulika. Tswu ndihekela sitso. Lola ndinogilwe ukuta ndumale lwoni uluhala ulwa kutsimańa innonu ukuta muve vajeje vuvule kumbivi.

²⁰ Umwene Unguluve umpelalunotsehetso nalahave ukunsegeja USetano ukuta ave kunzi kumalunde gińo. Uluhungu lwa Jesu Kilisiti unkuludeva vitu lwu luvetsage nuńe.

²¹ Vikuvapembetsa uńe nu-Timoti uvi ndivomba nave nu-Luki nu-Jasoni nu-Sosipateli uvwutuli kivumbuko kipamato kyene nune.

²² Nune ndi Teliti ndi ndivigile kalata uju ndikuvapembetsa munkuludeva.

²³ Namwene nu-Gaji uvi atwupilye nńumba jya mwene twivoni nuńe numpelela gwoni namwene ikuvapembetsa. Ikuvapembetsa nu-Elasiti undolelandalama tsa mbutsenge uvu, ikuvapembetsa nu-Kwaliti unkilisiti unjitu.

²⁴ Umwene Unguluve uvi alumalile lwoni uluhala vi alumańile ukuvadulusa uńe.

²⁵ Mańa tsu tsitso ndisimilitse nuńe mwivangili ilyu ndibite uńe, tsu tsitso tsipulikikye namunongwa tsa Jesu Kilisiti itsikwilile kwoni, tsu itsivonekeye nupwu tsigubukulage itsa kuvutitu itsuvye sikutsoni imyaka gyoni katale.

²⁶ Lino pwu tsivonike pavuvalasu vuvule upwu voni avapanzi vatsimańile muvakalata va vańamalago, Nditsova itsu alagye ṅani Unguluve va sikutsoni upwu atetsaga mwu valaleva kutsa lwidiko.

²⁷ Vi Nguluve uju vi ndita tuntsovelage mwa Jesu Kilisiti uvuvaha uvudwadwa sikutsoni vuvule. Ameni.