Valooma 15 - UTESITAMENTI UMPYA

¹ Lola uvwe twi vadulusu upita twivandilage uvudekedeke vwa vajitu uvwu navali vadulusu tulikelaga twivene.

² Twi voni upita tuvakelage avajitu uvwu tubadiṅine navo uju uva mwene uju uva mwene, tuvakelage lulwa kuvatanga ukuta vavalage vunnonu, vitsengage ukuta ńumba.

³ Mańa namwene nu-Kilisiti nikelili mwene. Bako umwene agahile nduvwu livigilwe ilita: Amadusi gavene avikukuduka uve gwu gangwilye une.

⁴ Mańa tsoni itsavigilwe katale tsu tsavigilwe ukuta mwu tulolelage uluhala uvwe, pwu ukuta ukutotsa-iligoga nulununatso ulwu ikutununatsihitsa kalata situpelelage uluhuvilo.

⁵ Umwene Unguluve umpelakutosailigoga nulununatso vi avapetsage ukuta mbetsage numbula mamato jyene ńivoni umwumbelye mukonge lulwa Jesu Kilisiti.

⁶ Nivoni ukuta mbetsage ndomo mpamato gwene pakunginya Unguluve va nkuludeva vitu UJesu Kilisiti.

⁷ Pwu ndita mwupililanile lino ńivoni nduvwu avupilye UKilisiti ukuta mbetsage va kunginya Unguluve.

⁸ Lola une ndita UJesu Kilisiti ipelile ukuva va kuvavombela avakegetwa ulwakuva akata tsitsilage mmwene itsa jilweli itsu atsovye ṅani Unguluve nulwidiṅano ulwu vidiṅine navo avakoṅona vitu ukuta luvonekelage mmwene ulutsilakwanduka.

⁹ Navene avapanzi ukuta vanginyage ikisa Unguluve nduvwu livigilwe ilita: Tsu tsitso ndikukuginyaga mbapanzi, nalyene ilitavwa lyako ndikulipalilaga ulwimbo.

¹⁰ Ivuja pavunge ita: Ńi vapanzi muhekelage luninye navanu va mwene.

¹¹ Ivuja ita: Munginyage unkuludeva ńivoni ńi vapanzi, mumwimikage ńi sivumbuko ńivoni.

¹² Ivuja UJesaja itsova ita: Kivetsagakwo akapagika akanwekile mundela mwa Isai, ivetsagakwo uvakwinamuka pakwipela ukuva nkuludeva va vapanzi, vi valamuvilaga avapanzi.

¹³ Umwene Unguluve vi mpelaluhuvilo lwoni vi avaditsage nuluhekelo nulunatsenetso uluhumile ndwidiko, pwu ukuta amaka ga Mepo u Umbalatse gavapelelage ukuta mulesukage vuvule uluhuvilo.

¹⁴ Nuńe upwu ndikuvalola ńi vajitu ndilumańile ukuta nuńe vudigile nuvunnonu vwoni, mumalile nuluhala lwoni, ndumańile ukugolosanya ńivene.

¹⁵ Apange mwa kalata uju ndilutilye ukwidulusa pakuvavigila uńe ulwakuva nditye kwu kuvakumbuhitsa ndikuvakumbuhitsamwo ulwakuva lukwumilitsa uluhungu ulwu amye Unguluve,

¹⁶ ulwu atye ndivetsaga va kumbombela UJesu Kilisiti mbapanzi, ulwu atye ndivetsaga nteketsi va livangeli lya Nguluve, pwu ukuta vankelage umwene avapanzi vwu ndikuvagega kumwene ukuta nekelo vwu avapelile vavalatse UMepo umbalatse.

¹⁷ Pwu ndita ndili natso itsa kwiginya mwa Kilisiti Jesu ndi ndili mumbombo tsa Nguluve.

¹⁸ Mańa nandikiva pakutsova itsinge itsu UKilisiti nansuṅili ukuta tswu ndivombage itsa kuvapelela ukwidika avapanzi. Nditsova nitsa mameńu nitsa kuvomba vuvule,

¹⁹ nitsu ndivombye mmaka ga sidego naga sipelwa. Nditsova itsa kuvombela mmaka ga Mepo umbalatse. Ndimalile ukulitsova ilivangili lya Kilisiti, ndihumile nalyo mu-Jelusalemu nansilunga isibadiṅine umwu, nditsisike nalyu namu-Ililiki.

²⁰ Lola sikutsoni vwu ndivomba tsitsitsi, pwu ndijumilitse ukuta ilivangili ndilalitsovaga umu valimańile ilitavwa lya Kilisiti ulwakuva nditye ndilapyanilaga pakutsenga apange upwu valise ulwalo avange.

²¹ Bako ndikongile ilivigilwe ilita: Umwene vikumbonaga uvwu navavavulili lusiku inongwa tsa mwene innonu, inongwa tsa mwene vikutsivonaga uvwu navapuliki lusiku.

²² Tsu itsi tsiṅilivwe kavili-kavili vwu ndita nditse kwańe kukwa.

²³ Lino ulwakuva ndivwene pasilile pakuva nsilunga isi sya kunu ndilikwo, ulwakuva nakwene ukunogwa nditengwe patale imyaka myongosu ndinogwa sikutsoni ukwitsa kwańe ukwa,

²⁴ pwu lino pwu ndigendaga mumwane vwu ndibiha nikilunga kya mu-Sipanija. Mańa ndihuvila ukuta ndivalole vwu ndiluta. Nuńe pwu nkambike kukwa vwu tango tukinilepwo padebe.

²⁵ Lola pwu tango ndibiha mu-Jelusalemu ndigegile isya kuvapa avavalatse.

²⁶ Mańa ava-mu-Maketonija nava-mu-Akaja visagye vene valondile isinge isya kulilanila navavalatse avagatsu va mu-Jelusalemu.

²⁷ Mańa ukwisagila kwu visagye vene, nakwene nukuva vatsigilwa va valya kwu vatsigilwa. Mańa upwu avapanzi valilanye navo isya Mepo, pwu upita navene vavatagilage isya mańa valya.

²⁸ Vwu ndivye pakumala aka, vwu ndivye pakuvapa mmavoko vunnonu iseke tsitsitsi, pwu ndilagendaga mumwane ukubiha mu-Sipanija.

²⁹ Mańa ndilumanile ndingave ndisike kwańe kukwa, pwu ndilavagegela lwoni ulusajo lwa Kilisiti umwuluvelye.

³⁰ Ńi vajitu nditekelesa kwańe, nditekelehetsa munkuludeva vitu UJesu Kilisiti nandugano ulwu ipela UMepo umbalatse ndita twijumilitsage nuńe nune ndwisajo ulwa kuńisajila kwa Nguluve.

³¹ Mwisaje ukuta ndipokwagwe kuvene avibeda mu-Jutai, mwisaje ukuta imbombo itsu ndibiha natso mu-Jelusalemu tsipelage ukuva ṅelivwa kuvavalatse va mumwa,

³² pwu lino ndingave ndivwene Unguluve idike pwu nditse ndugataluko kwańe kukwa, pwu ndikagataluke pańe.

³³ Mańa umwene Unguluve umpelalunotsehetso vi avetsage nuńe ńivoni, Ameni.