Valooma 14 - UTESITAMENTI UMPYA

¹ Uvi ndekedeke ulwidiko vi mumwupililage vunnonu. Mańa upwu mukumwupilila pwu ndatetsaga va kummiga itsu iki sagila umwene.

² Lola ujyunge ita ndilya syoni ndwidiko lwa mwene, umwene undekedeke vi ilya iseke tsene.

³ Umwene uvi nihala ukulya vi avandikage alangililaga uvi ikusileka isinge isinu. Namwene uvi ikusileka isinge vi alantsovaga uvuvivi uvi ilya syoni, mańa umwene Unguluve avupilye voni.

⁴ Veve veni uve vi utetsage untsovage uvuvivi umunu va munu? Nupwu imile nupwu igwa, sikutsoni vwu va ju nkuludeva va mwene jujwa. Ukwima kwu ikwimaga, mańa untwa avumańile ukundulusa ukuta image.

⁵ Ujyunge ikulihala ilitsuva ita naliva ndilinine. Ujyunge ita goni amatsuva galiṅine vuvule. Voni upita vatsimańe itsu vikisagila uju itsa mwene uju itsa mwene.

⁶ Uvi alyimike ilitsuva ilinge vi amwimikye ju nkuludeva. Namwene uvi ilya syoni vi ikundila ju nkuludeva ulwakuva isana kwa Nguluve. Namwene uvi ikusileka isinge isinu namwene ikundekela ju nkuludeva namwene isana kwa Nguluve.

⁷ Twivoni umwutuvelye, nupwu tungave tuli kuvwumi, pwu nakuli ujyunge uvakuva vwa mwene jujwa uvwumi vwa mwene. Napene nupwu tungave twiswa napene nakuli ujyunge uva kuswila mwene.

⁸ Mańa tungave tulikuvwumi pwu vwa ju nkuludeva uvwumi vwitu, napene nupwu tungave twiswa napene pwu tukunswila ju nkuludeva. Pwu ndita: Nupwu tungave tulivumi nupwu tungave twiswa sikutsoni pwutuliva ju nkuludeva.

⁹ Ulwakuva tsu tsitso UKilisiti atye nukuswa atye nukukilivukila kuvwumi ulwakuva atetsaga ndive nkuludeva va vene voni nava vaswe nava vumi.

¹⁰ Mańa uve vukuntsova kiki uvuvivi unnino? Nuve vi jyunge vukungilila kiki unnino? Mańa twivoni umwutuvelye tulavonekaga pavuhigilo vwa Nguluve.

¹¹ Mańa livigilwe ilita: Mańa upwu pwundili goni amasugamilo galasugamilaga kwane, tsoni nindimi tsilanambulaga une ndi Nguluve vwu iva untwa.

¹² Pwu lino ndita: Twivoni umwu tuvelye tulitsovelaga kwa Nguluve uju itsa mwene uju itsa mwene.

¹³ Ogo lino tulekage ukutsovana uvuvivi. Bako tswu mwidiṅne tsitsitsi uńe ntetsage: Nujyunge alampelelaga nitsinge nitsa kumwambutsa nitsinge nitsa kungetsa unnine

¹⁴ Ndilumańile une ndisivwene mwa Jesu unkuludeva napwusile isinge isili mwiko syene vuvule. Syene sisyu ungave vi munu vukusipa ukuva mwiko uve, syu sikipela ukuva mwiko kwave uve.

¹⁵ Apene upwu singave unnino sikumpelela ukwisagila isinu isyu vwilya vwu pwu ulugendo lwako nalwiva lwa ndugano. Uvandikage ukumbejanga nisinu syako isyu vwilya unnino uvi UKilisiti answilye.

¹⁶ Mbandikage lino akanu akannonu ukwu ndi nako kaladukwagwa amadusi.

¹⁷ Mańa uludeva lwa Nguluve ndatetsaga pange syakulya pange syakuńwa. Bako ulwene vwu vugolosu nalu lunotsehetso nalu luhekelo mwa Mepo umbalatse.

¹⁸ Mańa uvi UKilisiti ikumbombela ntsitsitsi tsoni vi ankelye Unguluve, vi navene navanu vatetsaga avombile lweli.

¹⁹ Pwu ndita: Tutsikalatililage natsimelalunotsehetso natsitsa kutsengana twivene.

²⁰ Kwu bako ukumamula imbombo tsa Nguluve nisinu syako isyu vwilya uve. Ukuva sinnonu kwu sinnonu syoni, mańa pwu sikipela ukuva sya vuvivi ungave vi munu vwilya vwu sikwambutsa inumbula jyako.

²¹ Vwu uli nnonu vi munu ungave vukujileka ińama vukuvuleka nuvugimbi vukusileka syoni isyu unnino sikumwambutsa.

²² Uve vi uli nalwo ulwidiko uve nalwo vimwene, angave Unguluve akuvwene vwuuli vuvule. Va ndugataluko uvi nikivona uvuvivi itsu atsimańile.

²³ Lola uvi ilya nupwu ikwinana mwitumbu vi itsovye ṅani uvuvivi mwene ulwakuva nilya ndwidiko. Mańa tsoni itswu vi munu vuvomba vwu navwitotiki ndwidiko vwu vutulanongwa vuvule.