Valooma 13 - UTESITAMENTI UMPYA

¹ Nivoni mwihilikage kuvatwa avavakavile. Mańa navukuli uvunge uvutwa uvwu navwimiki ju Nguluve. Vwoni uvu likwo lino vwu imike ju Nguluve.

² Pwu ndita: Uvi ikuvila avatwa vwu akilile akange akanu ukwu imike ju Nguluve. Avene avikwila vwu vitolye ṅani vene ukuhigivwa.

³ Ulwakuva avavaha navakuvadwada avivomba tsinnonu, bako vakuvadwada avivomba tsimbivi. Apene ungave vunogwa ukuta valavetsaga vakuvadwada uve pwu uvombage tsinnonu, pwu ulavona vikukwimika avene.

⁴ Ulwakuva upwu Unguluve avimike pwu atye vikukuvombelaga kakannonu uve. Pwu ungave vuvomba itsinge imbivi pwu udwadage. Mańa nalwiva lwa kukinila ulwuvo ulwuvibite. Ulwakuva vakivaga va Nguluve avene vakukilivula vakuvavunga avivomba imbivi.

⁵ Pwu upita vwihilikage ulihilikaga nuludwado lwene ulwu vwita pange vavungage, bako upwu vukihilika pwu vwihilikage ulwakuva vwivwene nkwivona kwako.

⁶ Pwu nuńe musangula amasango. Ulwakuva avatwa vwu vavombi va Nguluve vikijumilitsa kako ndavavulile akavombo.

⁷ Pwu ndita voni mbapetsage kako pangave upita mbapetsage. Uńamasango ga ńumba vi mumpetsage amasango ga ńumba, uńamasango ga pampaka vi mumpetsage amasango ga pampaka, uvakundwada vi mundwadage, uvakumwimika vi mumwimikage.

⁸ Ndavetsaga ninongwa ijyinge numunu ujyunge uvi ikuvatsigila. Jija kuganana jyene jyu mbetsage nongwa jyu mutsigilanilage. Mańa uvi anganile unnine vi uju amalile indagilo tsoni.

⁹ Mańa tsoni indagilo nulwakuta ulaligupaga nulwakuta ulabudaga nulwakuta ulahitsaga nulwakuta ulanogwagwa nitsinge tsoni itsu pwutsile, tsoni tsitotike tsili mwimeńu ili lilyakuta: Unnino ungane nduvwu vwiganile vimwene.

¹⁰ Ulwene ulugano naluvomba itsinge imbivi itsa kumbejanga unnino. Pwu ulugano lwipelile ukuva lumalihitso lwa ndagilo.

¹¹ Tsoni tsitsitsi tsu mbombage mańa ndumańile umwaka umwuguvelye. Ulwakuva akavalilo ka kuhuma ntulu uńe kitsile. Mańa uvupoki uvwe vuhegelye lino navuli ndapalya tutengwe ukwidika.

¹² Ikilo jilutile umuni gwitsile tutsileke lino imbombo tsa muṅisi, twigelekage ingoha tsa lumuli.

¹³ Vwu tugenda mwoni-mwoni pwu twihusage tuvonekage ukuva twi va pamuńi. Tulavetsaga va kusyota, tulavetsaga va kwinegelela, tulavetsaga va musaka, tulavetsaga vańanyago kuvuligu, tulavetsaga va kulwa, tulavetsaga va kuvinikana akavini.

¹⁴ Bako munswalage ju Jesu Kilisiti unkuludeva. Apene lola upwu mukugunotsa ummana pwu mbandikage ndagulotsaga kuvunogwe.