Valooma 12 - UTESITAMENTI UMPYA

¹ Pwu lino ńi vajyango ndikuvitsiga nditsovela nkisa kya Nguluve ikyu ali nakyo mwitumbu ndita: Ngihilikage imihana gińo gyu givetsage nekelo jińo ińumi, imbalatse ijikelwa kwa Nguluve. Vwu tsivetsage imbombo tsińo itsa luhala kwa Nguluve.

² Mbandikage ndavetsaga ndikilunga iki mumbele. Bako mwandukage uvuvumbe vwu ndi pakutengula untima gwińo pwu ndatsimańa itsu anogilwe Unguluve ntetsage tsitye tsitye natsinnonu natsiṅelivwa kumwene natsinduti.

³ Nditsovela nduhungu ulwu amye une ndikuvavula ńivoni umwumbelye mpamato-mpamato ndita: Pakujisagila pwu ndiginyaga ulwakuva panogye ukujisagila uńe. Bako pakujisagila pwu uluhala luvekwo uńe mpamato-mpamato mwigelelage umwu Unguluve avagelile ulwidiko uju ulwa mwene uju ulwa mwene.

⁴ Ulwakuva nuvwe mummana gwitu mpamato gwene ugwu mwutule nutupagika tutwongosu twa mummana. Natwene nutupagika twa mummana tututu twoni tuli ntuvombo ntuvombo.

⁵ Vwu tugahile nuvwe twi vongosu twipelile ukuva mmana mpamato gwene mwa Kilisiti uju kapagika ka nnine uju kapagika ka nnine.

⁶ Twivoni tuli nuvupevwa vwitu uju vwa mwene uju vwa mwene vwu vuvelye nduhungu ulwu atupye jujwa uju ulwa mwene ponu uju ulwa mwene ponu.

⁷ Ujyunge ali namalago vi vupevwa vwa mwene vuvoneka mumwa gangave amalago ga mwene gakongine nulwidiko. Ujyunge ali nuvuvombeli vwa kuvavombela avange, vi vuvoneka mbuvombeli vwa mwene uvwu ikuvavombela. Ujyunge avumańile ukuvavula inongwa avanu vi vuvoneka umwu itsovela inongwa.

⁸ Ujyunge avumańile ukuvitsiga vunnonu avanu vi vuvoneka nkuvitsiga kwa mwene. Ujyunge ali nuvupi vi vuvoneka upwu nikisagila itsinge. Ujyunge mamajyavo avanine vi vuvoneka umwu akinamye akavombo kamwene. Ujyunge ivomba sininye isya kisa vi vuvoneka umwu isya kisa sya mwene ivomba ndugataluko.

⁹ Ulugano lulavetsaga lwa kulila isinu. Ntsisulage tsoni imbivi ntsibadamage tsinnonu.

¹⁰ Ulwene ulugano lwa kuganana uńe ńi vana-munu lwu luve lwa munumbula jilweli. Ukwene ukudwadana kwu ulutililage pakundwada unnino.

¹¹ Ukwene ukukinamila akavombo kwu ndańolombokaga. Itsene imepo tsa mwitumbu tsu tsipitsage. Mumbombelage ju nkuludeva.

¹² Nduhuvilo lwińo ulwu muhuvila mwu muhekelage. Upwu ngave mukuvilwa pwu nsihage. Upwu ngave mukisaja pwu mwumilitsage ukwisaja.

¹³ Isyu avavalatse vadumukilwe syu mbatangage. Mbupililage nńumba tsińo avahenza.

¹⁴ Avikuvaswima vwu mbasajage. Mbasajage ndavakotolaga lusiku.

¹⁵ Mbatange ukuhekela avihekela, mbatange ukulila avilila.

¹⁶ Mbetsage numbula mamato jyene ńivoni umwumbelye. Ndisagilaga itsa lwijimiko, bako mbetsage paninye navadebe.

¹⁷ Kwu bako ukwitsova uluhala ńivene. Ujyunge ndambutsihitsaga imbivi pambivi tsa mwene itsu ikuvapelela uńe, Mwisagilage ukuvomba tsinnonu vwu vikuvalola voni avanu.

¹⁸ Ngave mbwene pavidike uńe pwu mbetsage paninye voni avanu.

¹⁹ Umunu unjińo ndambutsihitsaga ńivene ńi vagane vango, bako ntsihenelage itsa luvipo. Mańa livigilwe ilyakuta: Ulupyanihitso lwango ndimwene ndivikaga jyune vwu iva unkuludeva.

²⁰ Ungave umbwene untavangwa vako aswe inzala pwu umpe isinu alitsage. Ungave umbwene umilwe ikyumilwa pwu umpe amagasi ańwetsage, Mańa ungave ugahile vuvule-vule vwu ulundaminye amakalasila ga mwoto pantwe pamwene.

²¹ Kwu bako ukuleva kumbivi, bako imbivi utsilesage ninnonu jyuve.