Valooma 11 - UTESITAMENTI UMPYA

¹ Pwu lino ndivutsa ndita: Unguluve nda avatagile avanu va mwene? Kwu bako Mańa une ndili mw-Isilaeli, nune ndihumile mumbeju jya Abulahamu nkivumbuko kya Beńamini.

² Bako Unguluve navatagili avanu va mwene uvwu avamańye ṅani kakatale. Uńe nda nantsimańili itsu kalata itsova panongwa tsa Elija palya? Upwu ikumbulila Isilaeli kwa Nguluve upwu ita:

³ Nkuludeva avańamalago vako vavabudile, isitekelelo syako vamamwe pwu ndisigye ndimwene navene vita tumbude uńe uvwumi vwango.

⁴ Ugwene undomo gwa Nguluve pwu gukambula liliku? Bako ugwene pwu gukata: Mańa une ndisigitse avanu vaelipu lekelakupamato (7000) uvwu navansugamili amasugamilo UBaali.

⁵ Vwu tsigahile vuvule-vule nalino tusigye utusigalilo utwu lutuhalile lu luhungu lwa mwene.

⁶ Apene lungave lutuhalile lu luhungu pwu humbe natsituhalili imbombo itsu vavombile avanu. Mańa tsingave tsituhalile imbombo itsu vavombile pwu ndili uluhungu naluli lu luhungu lwene.

⁷ Ndeti lino? Bako isyu Isilaeli voni alondaga syu nasivweni. Vasivwene vene avahalilwe. Avange voni vwu vagilimbitse inumbula.

⁸ Nduvwu livigilwe ilita: Unguluve avapye imepo imelakwuma uluhala namiho amatsilakulola nimbulukutu inzilakupulika asike navo kulino kunu.

⁹ Namwene nu-Ndaviti ita: Apene pavulilo isinu avene pwu pangipelaga kipindo kińalwonzo, pangipelaga kitego pangipelaga lwambuhitso, pangipelaga luvujitso.

¹⁰ Ungasyikaga amiho valalolaga. Uvadenage imigongo sikutsoni.

¹¹ Ndivutsa lino ndita: Ukwene ukwu vitovaga ikilunde nda kwale kwa kuvagwisihitsa ṅani? Kwu bako! Mańa ukugwa kwa vene kuvapelye ukupona avapanzi ulwakuva Umwene atetsaga pwu valimikaga akavini avańa-Isilaeli.

¹² Apene lino kungave ukugwa kwavene kukipelye uvumosu ikilunga kyoni, kungave ukulemwa kwavene kuvapelye uvumosu avapanzi, pwu kupelage ndaku ukupela uvumosu ukwilunga kwa vene vangave vavujile vilungile?

¹³ Tsu ndikuvavula ńi muhumile mbapanzi. Mańa umwu ndivelye ukuva mwapositili va vapanzi une, mwu ndivelye nukwimika imbombo tsango itsi,

¹⁴ ulwakuva ndita ndingave pange ndavapelelaga akavini avajango uvwu tuli nkisa mpamato gwene nune, pwu ndivapokelage baho avange.

¹⁵ Mańa apene upwu kungave ukutagwa kwavene kwapelile ukuva lusajano lwa kilunga kyoni, pwu ukwene ukwupililwa kwavene pwu nda kuleke ukwipela vwumi uvuhumambuswe?

¹⁶ Lola upwu singave sivalatse isya kunogelehetsa mundomo vwu vwu kivalatse nikisuge kyoni kya sinu. Napene nupwu gungave mbalatse undela vwu mavalatse namapagika.

¹⁷ Apene gangave agange amapagika gadeńike, lino pwu vi vwale luvono lwa munsitu upyanye upwu gale, lino pwu uve ulilanye navo undela umwu vwihuma uvwigu vwa luvono,

¹⁸ pwu uvandikage uliginyaga kumapagika amanino aga. Mańa ungave utye ndiginyage pwu ukumbuhitsage ukuta undela gwu nagumelili mwave, bako uve umelile mundela.

¹⁹ Uve pange vwita: Mańa amapagika gadeńike ukuta ndipyanilemwo une.

²⁰ Tsitsitsi tsu tsiki? Mańa agene padeńike ulwakuva gabetsitse, uve upwu umelile pwu umelile lu lwidiko. Pwu uvandikage uliginyaga vimwene, bako dwadaga vuvule.

²¹ Mańa apene upwu angave Unguluve nagalilili ikisa amapagika ga pakivumbuko, pwu nda akulilile ikisa uve?

²² Uve udegage uvudekedeke vwa Nguluve nuvutalamu vwa mwene. Kuvene avagwe kwu ntalamu, kwave uve ndekedeke vuvule ungave vwiva mbudekedeke uvu. Uvandikage uladeńivwagwa nuve.

²³ Navene navalya vangave naviva ndubedo lwavene pwu navene vikwandilamwo. Mańa umwene alavuja alavametsa, mańa Unguluve nakundemili ukuvuja ukuvametsa.

²⁴ Mańa apene ungave uve vi akudumwe paluvono ulwale lwa munsitu pakivumbuko, akupyanitse paluvono lwa mbutsenge umwu nupelilwi, pwu vapele ndaku lino avene ukuvuja ukwandisivwa ukumetsivwa paluvono lwavene? Nditsova uvwu gale gu mapagika mumbuvumbukilo.

²⁵ Mańa vinjyango pwu ndita nditekaga uluhala lwińo, pwu ndita ndilasihaga ninongwa tsa kuvutitu tsitsitsi. Mańa ulwiduluso ulwu vikidulusa lwu luvambulinye avańa-Isilaeli avange, lukuvabadamaga lutsisikaga navo upwu avapanzi valakulukaga ukwingila.

²⁶ Pwu Isilaeli voni alaponaga namwene nduvwu livigilwe ilita: Alahumaga mu-Syoni uva kuvapoka, vi alajatsa nikilo mwa Jakobu.

²⁷ Lwu lwidikano lwango ulwu twidikanaga navo ulu vwu ndijatsa uvutulanongwa vwa vene.

²⁸ Kuluvasu lwa livangeli ulwakuva lino kwu vipelile ukuva vatavangwa avene. Mańa kuluvasu lwa kuhalwa ulwakuva vahumile mbadadajyavo kwu vagane.

²⁹ Mańa Unguluve nikwanduka lusiku isikungilwa sya mwene isyu avakungye ṅani avanu, nakwene ukwilanga kwa mwene ukwu avilangye ṅani avanu nikwanduka.

³⁰ Nduvwu nuńe katale mwamwilaga Unguluve, lino muvujile mukivwene ikisa umwu vikwila avene,

³¹ vwu vagahile vuvule-vule navene lino pwu vikwila avene ulwakuva vavwene mukivwene ikisa uńe, avene ukuta vitse vakivone ikisa lungave lusiku.

³² Mańa Unguluve avadindye ndubedo avaliṅanitse vuvule voni ulwakuva atetsaga ndivuje ndivalilile ikisa uńe ndimwene voni.

³³ Kyu kisima iki uvumosu Unguluve nuvwa luhala nuvwa vumańi! Veni nda atsimańe itsu ihiga umwene? Veni nda natsimańe inzila tsa mwene itsu igenda umwene?

³⁴ Veni pwale uva kutsimańa itsu isagye unkuludeva? Veni pwale uva kumbula uvakuta: Vwu ugahage vuvule-vule utetsage utetsage.

³⁵ Veni pwale uvi ampelye ṅani isinge isyakuta lungave lusiku pwu nuńe ndilantsigilaga isya kunavula?

³⁶ Mańa syoni sihumile mwene jujwa, sivumbukye mmwene jujwa, sivujile silotsitse kumwene jujwa. Vi tumwimikage jujwa tukasikage nakuvutsilakusila lusiku. Ameni.