Valooma 10 - UTESITAMENTI UMPYA

¹ Ńi vajango tsu ndahekelaga munumbula jyango vangave vaponaga tsu ndikuvisajila kwa Nguluve.

² Ndikuvidi kila ndita gutsivipye itsa Nguluve, mańa upwu gutsivipye pwu navatsivweni vunnonu.

³ Mańa navavumańili uvugolosu vwa kwa Nguluve pwu vakata twimikage uvugolosu vwitu. Pwu navalevili kuvugolosu vwa kwa Nguluve.

⁴ Mańa UKilisiti itsile kumalisa isimilitso, voni avikumwidika vavuvone uvugolosu.

⁵ Umwene UMose upwu itsova pakalata uvugolosu uvwu vi munu vukuvuvona ungave ukongile musimilitso pwu ita: Umunu uvi ikutsivomba vi tsikumpa uvwumi.

⁶ Uvwene uvugolosu uvwihuma ndwidiko vwu vwita: Kwu bako ukuta: Alikwo veni uva kutoga kukyańa? Mańa vwu ubelile utye natogili UKilisiti.

⁷ Vwita: Kwu bako ukuta: Alikwo veni uva kwika ukubiha mwiguli? Mańa vwu ubelile utye UKilisiti nabihi mbaswe.

⁸ Bako uvwene nda upulike itsu vwitsova? Mańa vwita: Ilimeńu lihegelye kwave, lili mundomo gwako lili munumbula jyako. Lyu limeńu ilita mwidikage, lyu ili tukulisimilitsa uvwe.

⁹ Mańa ungave vukuntsova pavuvalasu nundomo gwako UKilisiti vwita: Vi vi ntwa, ungave utsivwene munumbula jyako itsita: Unguluve antsusitse mbaswe, vwu uponile.

¹⁰ Mańa upwu ungave utsivwene munumbula jyako pwu vutsovwagwa uvugolosu, ungave vukutsitsova pavuvalasu nundomo pwu vupona.

¹¹ Mańa kalata va Nguluve ita: Voni avamwidike umwene vwu navalave nisoni.

¹² Mańa navalekeṅini napadebe nava-Juta nava-Giliki, bako valiṅine vuvule. Mańa unkuludeva ali mpamato mwene voni. Voni avikisaja kumwene, umwene ali nasyo syoni isya kuvapa, nasijagili isinge.

¹³ Mańa voni avikulitambula ndwidiko ilitavwa lya ntwa vwu viponaga.

¹⁴ Vantambulage ndeti lino ndwidiko uvi navamwidiki? Pwu vamwidikage ndeti lino vwu navapuliki itsinge inongwa tsamwene? Pwu vapulikage ndeti lino inongwa tsa mwene vwu ujyunge navavulili?

¹⁵ Pwu vavavulage ndeti lino vwu nujyunge navasuṅili? Nduvwu livigilwe ilita: Vwu vunnonu vuki amalunde avavagegile inongwa innonu tsa lunotsehetso, avagegile inongwa innonu tsa kutupoka.

¹⁶ Lola ukwene ukutsikonga inongwa tsa livangili kwu navatsikongili voni. Mańa umwene UJesaja ita: Nkuludeva veni uvi ikutsivona itswu tukuvavula?

¹⁷ Pwu ndita: Ulwidiko lwihuma nkupulihitsa, ukwene ukupulihitsa kwihuma mwimeńu lya Kilisiti.

¹⁸ Lino ndikuvavutsa ndita: Avene nda navapuliki? Mańa ukwilanga kwa vene kwalye nkilunga kyoni, amameńu gavene gasike kuvusililo ikilunga ikyu vatsengile avanu.

¹⁹ Pwu ndivutsa ndita: Pange avene avańa-Isilaeli vwu nda navatsivweni? Mańa alongwe UMose atye: Ndikuvapelelaga akavini uńe aka kuvavinika avanu uvwu navali vanu vene, ndikuvapelelaga nuluvipo ulwa kuvavipila avanu avatsilaluhala.

²⁰ Umwene Ujesaja vi ikihusa ita: Vambwene uńe uvwu navandondili, vambwene uvwu navavutsitsi ukuta ali ndaku uńe.

²¹ Apene upwu ikuvatsova avańa-Isilaeli pwu ita: Ilitsuva lyoni sikutsoni ndikuvagololela amavoko avanu avikwila sikutsoni avali nulumeno.