Vaefeso 6 - UTESITAMENTI UMPYA

¹ Ńi vana mbidikage avahotsi vińo mbonekage ukuva munkuludeva nuńe. Ulwakuva tsu ngolosu tsitsitsi.

² Umwimikage udadajo nuvańoko lwu lulagilo ululongotsi ululi nulwidiṅano.

³ Nditsova ulwita: Pwu amatsuva gako galava mongosu nkilunga.

⁴ Nuńe ńi vadadajyavo mbandikage ukuvahambula avana vińo. Bako upwu mukuvakutsa pwu mbalotsage kunkuludeva nupwu mukuvavunga nupwu mukuvagolosa uluhala.

⁵ Nuńe ńi vakivaga mbidikage avatwa vińo avavakavile ummana. Mbadwadage mbadetemage ńi vatsilakwisagila kwoni kwoni inumbula nduvwu mukumwidika UKilisiti.

⁶ Ndavavombelaga vuvule vwu vikuvalola pakuvomba, ndavetsaga ndavita tukave uvugane kuvanu. Bako mbonekage ukuva vakivaga va Kilisiti. Itsu anogilwe Unguluve mbonekage ukutsikonga ninumbula jyoni.

⁷ Mbavombele ńi va ndugataluko nduvwu mukumbombela untwa nduvwu namukuvavombela avanu.

⁸ Ndumańage ukuta imbombo innonu itsu ńi vanu muvombile uju itsa mwene uju itsa mwene tsu alavahombaga untwa nda ndi vakivaga nda ndi vavopolwa.

⁹ Nuńe ńi vatwa vavene vwu ngahage vuvule-vule nuńe. Mbandikage ukuvasinga sikutsoni. Nkumbuhitsage ntetsage mańa nuvwe tuli nu nkuludeva vitu kukyańa uvi nikumalila mbunnonu kumiho umunu.

¹⁰ Itsa kuvusililo lola ńi vajango tsu ndita: Mwiduluhitsage munkuludeva na mmaka ga-vudulusu vwa mwene.

¹¹ Ntole tsoni ingoha tsa Nguluve umwutsivelye itsa kuvapelela ukwima vwu imyońeletsa nuluhala umendami.

¹² Ulwakuva iligoha ilyu twilwa vwu natulwila numana nunkisa. Bako twilwa navavaha, twilwa navańamaka, twilwa navalesakilunga ava muṅisi iji, twilwa nimepo imbivi tsa mbutandatse umu.

¹³ Pwu ndita ntolage goni amagoha ga Nguluve umwugavelye. Gwu gavapelelage ukwimamwo palitsuva ilitalamu lilya, pwu ukuta mwitse mbalemage avatavangwa vwu mwisavwe nsilile.

¹⁴ Mwime lola mwihudike uvwajilweli ukuta ngwamba, nswale uvugolosu uta kyuma kya kusiga ikipambaga.

¹⁵ Ulwakwiteteṅanya ṅani itsa kutsova ilivangili lya lunotsehetso syu sive sikato sisyo sya malunde gińo.

¹⁶ Mwongeletse nte nulwidiko lwu mwibatage jive ju ngwembe jya kutsimihitsa imilaso gyoni iminyanye gya Mbivi.

¹⁷ Nswalage uvupoki uvwu mpokilwe uta ndukutu jya pantwe nte nilimeńu lya Nguluve mwibatage lwuluve lwu lwuvo lwa Mepo lulwa.

¹⁸ Tsitsitsi tsu mbombage vwu mutye nukwisaja mutye nukutekelesa sikutsoni ińisajo ińuma mwa Mepo. Tsu muve miho tsitsitsi nte nukutsyumilitsa sitso nte nukuvimila voni avavalatse.

¹⁹ Musajilage nuńe ukuta ndilivone ilimeńu upwu ndidindula imilomo pakutsova nndomo ndikive vuvule pakusimilitsa itsa kuvutitu tsa livangili,

²⁰ ilyu ndigubukula ndi ndikungilwe muńololo. Musajilage ukuta upwu ndikulitsova pwu ndikive nditsove nduvwu linogye ukutsovwa.

²¹ Nuńe ulwakuva ndita mutumańage utwakwane kunu ukuta agonile atye atye uńe pwu avavulage tsoni UTikika unkilisiti unjitu uvi tumańine nave uvi tumwikye sitso pambombo tsa nkuludeva.

²² Tsu tsitso ndinsuṅile kwańe ulwakuva ndikata mutumańage utwa kwavwe kunu. Nukuvahuvitsa ndikata itsikuvahuvitsaga ninumbula uńe.

²³ Nu-Nguluve udada nu-Jesu Kilisiti unkuludeva avapetsage nulunotsehetso nulugano ńi vajitu ahanze baho nalu lwidiko.

²⁴ Uluhungu luvetsage navoni avanganile unkuludeva UJesu Kilisiti lwu lugano ulutsilakuvola.