Vaefeso 5 - UTESITAMENTI UMPYA

¹ Mukonge ulwiho lwa Nguluve mboneke ukuva vana avagane, ngendelage ndugano,

² vwu namwene UKilisiti atuganile, akatuswila akipela ukuva sya kulaha sya kwitekela isya lwuma ulunnonu kwa Nguluve.

³ Mańa uvuligu nuvuvivi vwoni nuvunogwe uvwu navwilola namiho syu upita ndasimańaga nali litavwa nduvwu nnogye ńi vavalatse.

⁴ Ndatsimańaga nitsili mwiko ukutsova mundomo mwańe nitsa vutsimu nitsa sunga imbotsamino, mańa tsu natsinogili tsitsitsi. Ntsimańage lweli tsitsa kusana.

⁵ Mańa tsu ndita ntsimańage jilweli itsakuta nujyunge undigu nujyunge umbivi nujyunge umwimi nalingile pavuhale kuludeva lwa Kilisiti lwa Nguluve. Ulwakuva umwimi nkivaga va manguluve agange.

⁶ Mbandikage nujyunge alavatekaga namameńu agali vuvule, mańa tsu tsitso tsivagegye uluvipo lwa Nguluve avańalumeno.

⁷ Mbandikage ndipelaga ukuva vakulila navo.

⁸ Mańa katale pwu mwale ṅisi, lino pwu mwipelile ukuva lumuli munkuludeva. Pakugenda mwivonesage ukuva ńi vańalumuli.

⁹ Mańa uluseke lwa lumuli lutye nuvunnonu vwoni lutye nuvugolosu lutye nukutsova itsa jilweli.

¹⁰ Ntsigelage vunnonu ntsimańage itsinkelye unkuludeva.

¹¹ Ndipelaga ukuva vavombelanila navene avivomba imbombo tsa muṅisi itsu natsihupa itsinge iseke. Bako mbalemage pavuvalasu.

¹² Mańa itsu vivomba kuvutitu tsu mwiko nukutsitsova mundomo.

¹³ Mańa tsoni tsitsitsi upwu ulumuli lukutsilema pwu tsivoneka pavuvalasu ukuta vwu tsili tsitye tsitye. Ulwakuva tsoni itsivonike pavuvalasu vwu natsene lumuli vuvule.

¹⁴ Pwu vatetsaga: Sisimuka vi ugonelye utsukage mbaswe pwu alakumulika UKilisiti.

¹⁵ Mbandikage sitso mwiteteṅanye vunnonu ulugendo ulwu mugenda sikutsoni. Ndavetsaga nda vatsilaluhala. Bako mbonekage ukuva ńi vańaluhala jilweli.

¹⁶ Mwiteteṅanye sikutsoni pakuvomba upwu pavonike apakuvombela sininye. Mańa tuli mmatsuva amavivi.

¹⁷ Pwu ndikuvavula ndita ndipelaga ukuva vatsimu. Bako mbonekage ukuta ndumańile ukunogwa kwa Nguluve ukuta kutye kutye.

¹⁸ Nakwene ukugala ndagalaga amasilu, mańa ukugala kwipela ukwitaga. Bako mwigutage UMepo.

¹⁹ Upwu ngave mwikina juńe ńivene ńi vakilisiti pwu nkinilage nińimbo tsa kwisaja nińimbo itsa kwagula itsu mukwagulila mwa Mepo umbalatse. Mumwimbilage Unguluve munkuvilage namagombu munumbula tsińo.

²⁰ Unguluve udada munsanage sikutsoni pasyoni, nsanilage mwitavwa lya nkuludeva UJesu Kilisiti.

²¹ Mwilesehetsage ńivene ulwakuva mukundwada UKilisiti.

²² Avadala vwu valevage kuvagosi va vene nduvwu vileva kuntwa.

²³ Mańa ungosi gwu ntwe gwa ndala nduvwu nu-Kilisiti ntwe gwa mpelela. Ulwakuva umwene vi mpoki va mmańa gwa mwene.

²⁴ Lola ndita nduvwu umpelela gulevile kwa Kilisiti vwu upita vagahage vuvule-vule navadala, navene upita valevage kuvagosi va vene ntunu twoni.

²⁵ Mańa nuńe ńi vagosi mbaganage avadala vińo nduvwu nu-Kilisiti aguganile umpelela aguswilye,

²⁶ ulwakuva atetsaga ndigupelage mbalatse. Nditsova upwu aguvalatsage upwu agwotsage namagasi agali nilimeńu.

²⁷ Ulwakuva jujwa atetsaga ndijimikilage umpelela undwadwa uvunnonu untsilamatilisa untsilatuguli untsilanutunge twoni. Bako akata guvetsage mbalatse untsilasilema.

²⁸ Vwu upita vagahe vuvule-vule navagosi. Navene upita vavaganage avadala vavene ukuta mihana: gyavene avene. Ulwakuva uvi anganile undala va mwene vwu iganile mwene.

²⁹ Mańa nagusulili lusiku ujyunge ummana gwa mwene. Bako ita nukugusugila isinu ita nukugugaha nduvwu nu-Kilisiti umpelela gwa mwene ikugusugila isinu ikugugaha.

³⁰ Mańa tuli tupagika twa mumana gwa mwene uvwe.

³¹ Pwu umunu ikundekage nudadaje nuvańina ikumbadamaga undala, lola pwu vwu vavili ava pwu vipelage ukuva mmana mpamato gwene.

³² Itsa kuvutitu tsitsitsi tsu mbaha jilweli. Lola nditsova nitsa Kilisiti nitsa mpelela gwa mwene.

³³ Mańa nuńe upita mbaganage avadala vińo uju uva mwene uju uva mwene muhwane mwiganile ńivene, Mańa umwene undala vi upita andwadage ungosi.