Vaefeso 4 - UTESITAMENTI UMPYA

¹ Pwu ndi nkunge munkuludeva nditekelesa ndita: Pakugenda nnogelage ntsene itsu mwilangilwe upwu avilangile jujwa.

² Mwijisage ndwijiso lwoni, mbetsage vatemesu, manzage nilyakuta “lya image sikutsoni” ntanganage ndugano.

³ Mwiduluse ukubadama ukwipela mpamato ńivoni mwa Mepo, mwibatane ndunotsehetso.

⁴ Mańa ndi mmana mpamato, ndi Mepo mamato ńivoni, pwu nalwene uluhuvilo lwińo ulwu mwilangilwe luli lupamato nalwene.

⁵ Ndi nkuludeva mpamato, ndi lwidiko lupamato lwene, ndi kwotsivwa kupamato kwene.

⁶ Ndi Nguluve mpamato mwene uvi vidadajyavo va voni, uvi avalesitse voni, uvi ivombela kuvoni, uvi nukutsenga atsengile kuvoni.

⁷ Mańa twivoni umwutuvelye atugavinye uluhungu uju ulwa mwene uju ulwa mwene, atugelye pakigelelo kya sikungilwa isyu atukungye UKilisiti.

⁸ Lyu ili vatetsaga: Vwu itoga kukyańa pwu agomile avagomewa va mwene, avanu akavapa isya kuvapa.

⁹ Mańa ilyene ilyakuta atogile lyu nda likuntsova ukuta nukwika kwu alongwe ukwika ukubiha kuńumba tsa pasi sitso nkilunga ngati?

¹⁰ Mańa umwene uvi ikaga vi uvi avujile atogile kukyańa, alutile atsisike kukya kukyańa sitso kukyańa ulwakuva ita ndikwilage mwoni.

¹¹ Vi uvi avange avapelile vapositili, avange avapelile vańamalago, avange avapelile vakusimilitsa ilivangili, avange avapelile vadimi, avange avapelile vamańisi.

¹² Atye va kuvagaha avavalatse ukuta vatsimańe imbombo tsa kuvavombela avanu. Nditsova itsa kugutsenga ummana gwa Kilisiti.

¹³ Atye va kupela ukuta twivoni tusike palwidiko lupamato lwene ulwa kumwidikila unswambe va Nguluve napavumańi vupamato vwene twivoni, tukulage uvugosi uvuluti tusike pakigelelo kya vuvaha uvuluti vwa Kilisiti.

¹⁴ Nuvwe pwu ukuta tuleke ukuva vuńehe sikutsoni uvuhusana vulotsa nakunu nakunu, uvudepanikila kwoni nakwoni imepo tsoni itsa vamańisamya. Nuvuteki vwa vanu nuluhala uluvivi pwu silatukalagatsaga muhululila tsa vunwasi.

¹⁵ Bako pwu ukuta tukonge tsitsa jilwe li twi va ndugano, tukule tumale mumwene jujwa vi Kilisiti untwe gwitu.

¹⁶ Mańa ummana gwoni guhogeleṅine utupagika twoni kwu kuhudiliṅana kwa gwene gwu gukwegela namaka ga kukula, gukongile umwu tuvombela imbombo tsa twene utupagika twoni aka itsa kene aka itsa kene gukitsenga gwene, gukitsengela ndugano.

¹⁷ Tsu itsi ndikuvavula ndikuvasimilitsa munkuludeva ndita: Ndeke ukugenda nduvwu vigenda avapanzi avange avigendela ndwiginyo ulwu vikwagula vene.

¹⁸ Uvwu ińisagilo tsavene jivatovile iṅisi, avadumukilwe uvwumi uvwihuma kwa Nguluve ulwakuva nukumańa navalumańili kinu, ulwakuva nukukangatsa vakangitse ninumbula tsavene.

¹⁹ Avene ulwakuva vakilitye nulwisagilo pwu naviva nisoni. Bako vitagile vene vipelile ukuva vańańango kuvuligu, vivomba tsoni imbivi, navilolela namiho upwu vinogwa twoni.

²⁰ Mańa uńe upwu mwammańaga UKilisiti pwu namummańili vuvule-vule,

²¹ ngave jilweli mumpulike jujwa, vangave jilweli nukuvamańisa vavamańisaga mumwene jujwa uvwajilweli uvuli mwa Jesu,

²² uvwita mwisulage numunu undala uvi ndugendo lwa mwene akongaga itsa katale, uvi ivejangaga nuvunogwe vwa vuteki.

²³ Uvwene uvwajilweli vwita mwanduke mumepo tsa kwisagila kwińo,

²⁴ mwiswike umunu umpya uvi pakupelwa avupilye kwa Nguluve. Nditsova uvugolosu nuvuvalatse uvwihuma mbwajilweli.

²⁵ Pwu ndita ndekage ukutsova itsa vunwasi ńivoni ntsovage itsa jilweli ujyunge nunine ujyunge nunine. Mańa twu tupagika umwu tuvelye ujyunge aka nnine ujyunge aka nnine.

²⁶ Gungave guvipa pwu mbandikage ndatulaga baho inongwa. Mbandikage ilitsuva lilasemaga vwu lukanale uluvipo lwińo ukwika itsu tsingave tsivańagile.

²⁷ Umendami mbandikage ndampetsaga pavukado.

²⁸ Uvi ahitsile isinge vi alavujaga alahitsaga. Vi idulusage avombage sininye isinnonu namavoko ga mwene, namwene ukuta avetsage nasyo isya kumpa uvi nali nasyo sininye.

²⁹ Goni amameńu ga vulwesu gwu mbandikage ndahumyaga mundomo gwińo. Bako muhumyage ga mannonu gene agitsenga inumbula tsa vajińo upwu mbwene upita ntsove sininye. Gavetsage ga kuvatanga avipulika.

³⁰ Mbandikage ndampelelaga ulususuvalo UMepo umbalatse, mańa ikimańilo Unguluve avikile mumwene jujwa ikya kuvamańa uńe palitsuva lya kuvangwa uńe.

³¹ Njatsage mwane umu vwoni nuvukali nuvuhambuke vwoni nuluvipo lwoni nukupwata kwoni, tsoni nitsa kudukana nitsa kuhelulana nuvuvivi vwoni.

³² Mańa mwipelage ukuva vadekedeke kuvajińo mbetsage nikisa mwitumbu mwane, nsyikilage nduvwu umwene Unguluve avasyikye mwa Kilisiti nuńe itsińo inongwa.