Vaefeso 3 - UTESITAMENTI UMPYA

¹ Tsu tsitso ndi Pauli ndi nkunge va Kilisiti Jesu, ndi ndikuva-kuvililwa uńe ńi vapanzi upwu ndikungilwe.

² Mpulike ndita uvutemesu vwa luhungu lwa Nguluve ulwu amye ukuta ndivagegele uńe.

³ Mańa itsa kuvutitu tsitsitsi tsu andindulye amya uńe vwu ikumbula nduvwu ndivavigilage tango. Nditsova itsu ndidumulanyage ukuvavigila tango.

⁴ Mwungave mukwimba umwu ndivigile mwu mumańaga uluhala lwane munongwa tsa Kilisiti itsa kuvutitu.

⁵ Mańa tsu itsu mmyaka imilala avana va vanu navavulilwi nduvwu vadindulilwe lino navapositili va mwene avavalatse navańamalago avali mwa Mepo voni.

⁶ Nditsova voni avali mwa Kilisiti Jesu, uvwu ilivangili livapelye nukwingilanila navavalatse pavuhale nukuva mmana mpamato gwene navo nukulilanila navo itsu Unguluve vidiṅine navo ulwidiṅano.

⁷ Lyu livangili ilyu ndipelile ukuva va kulivombela umwu nuńe Unguluve aṅungye uluhungu lwa mwene, ilyu amelye umwu amaka ga mwene givombela isyu gangave givomba.

⁸ Ena amye ndi ndivalutile sitso voni avavalatse uvudebe. Ndita amye uluhungu ulu nulwa kuvavula avapanzi uvumosu vwa Kilisiti uvwu nujyunge umunu navuvweni umwuvuvelye.

⁹ Amye nilya kuvamulika voni avanu ukuta vambone Unguluve ukuta atye atye pakugaha itsa kuvutitu itsuvilye sikutsoni mwa Nguluve umpelasyoni, tsitengwe upwu kipelwagwe ikilunga.

¹⁰ Tsu asihile katale upwu atetsaga umpelela gukuvavulaga lino navavaha navańivaha kukyańa uluhala lwa Nguluve ululotsa kwoni nakwoni lululu.

¹¹ Nduvwu isagye ṅani sikutsoni katale. Tsitso tsitsile ukwipelela mwa Kilisiti Jesu unkuludeva vitu.

¹² Uvi tungave tuli mumwene pwu ulwidiko ulwu tumwidikye jujwa pwu lukutupa ukuhegelela kumwene twi vatsilaludwado twi tumwikye jujwa.

¹³ Pwu ndikisaja ukuta ndilajetaga mundegehe tsango itsu ndivakuvililwa uńe itsipelile ukuva tsa kuvimika uńe.

¹⁴ Pwu ndisugama amasugamilo gane ndikunsugamila udada,

¹⁵ uvi syoni isivumbuko nakukyańa nankilunga umwu sikitambulila mumwene jujwa ilitavwa.

¹⁶ Ndikisaja kumwene ukuta nuńe avapetsage amaka aga kwiduluhitsa umunu umpya uva ngati ukuta avapelage umwu vuvelye umwene uvudekedeke vwa vuvaha vwa mwene, ukuta avapelage mwa Mepo va mwene.

¹⁷ Namwene nu-Kilisiti ndikisaja ukuta munumbula tsińo atsengelage lu lwidiko ulwa kumwidikila nuńe ndugano ukuta mwisage imilela njavilage,

¹⁸ pwu ukuta nuńe ntsimańilage luninye navoni avavalatse umwutsivelye nambuvaha nambutale nankwika sitso nambudunduvasu.

¹⁹ Nulugano ulwa kungana UKilisiti pwu ukuta mwitse ndumańe ukuta lwu lunnonu lulwa lulutilye nuluhala lwoni. Nuńe ukuta nditsivwagwe vuvule nsike pakuditsivwa kwa Nguluve kwoni umwu aditsivwe umwene.

²⁰ Umwene uvi avumańile ukuvomba sitso, uvi alutilye kusyoni isyu tudova nisyu tukisagila ulwakuva umwene vi vi mwenemaka agivomba imbombo mwavwe,

²¹ vi tumwimikage namumpelela namwa Kilisiti Jesu sikutsoni nakuvutsilakusila lusiku. Ameni.