Vaefeso 2 - UTESITAMENTI UMPYA

¹ Nuńe mwaswe katale nambugalo nambutulanongwa.

² Mwu nkakina, nkakonga ulwiho lwa nkilunga iki, nulwiho lwa mbaha vavene avenevutandatse. Nditsova gwu gupepo uguvomba imbombo tsa gwene mbańalumeno.

³ Nduvwu nuvwe katale twakinaga navwo twivoni, tukavwidika uvunogwe vwa mmańa gwitu gwa mbivi, tukavomba itsu gwatusuṅaga ummana gwitu gwa mbivi itsatusuṅaga ińisagilo tsitu itsu twisagilaga, nuvwe tukava va luvipo vwu voni pakivumbuko.

⁴ Umwene Unguluve ulwakuva Mwenelikungwava lyoni, ulwakuva atuganile lwu lugano lwa mwene lwu lwongosu sitso,

⁵ pwu atupelye luninye nu-Kilisiti uvwumi twi twaswilye ṅani mumbivi tsitu. Mańa lwu luhungu luvapokile.

⁶ Atutsusitse luninye nu-Kilisiti, atutamitse luninye nave kukyańa twi tuli mwa Kilisiti Jesu.

⁷ Ukuta atuvonehetsage mmyaka igikwitsa uvudekedeke uvwu atudekepye mwa Kilisiti Jesu uvwe ukuva va luhungu ulutsilakupela napange uvwongosu.

⁸ Mańa luvapokile lu luhungu, luvapokile lwu lwidiko, ndatetsaga uńe mbombile, bako avakungye vuvule Unguluve.

⁹ Navakungili mumbombo itsinge itsu pange mbombile uńe mańa umwene atye nujyunge aliginyaga mwene.

¹⁰ Mańa twi vuvumbe vwa mwene atupelile mwa Kilisiti Jesu ukuta tuvombage imbombo innonu itsu Unguluve atugahye ṅani kakatale itsu ukuta tulindage mumwa.

¹¹ Pwu ndita nkumbuhitsage ukuta katale mwale vapanzi pakivumbuko. Avene avitsovwa ukuva vwu vakegetwa uvukegetwa vwa mummana uvwu vikegeta namavoko vwu vakavatsova ukuva ńi vatsilavukegetwa uńe,

¹² Mańa pwu namwale nu-Kilisiti, Mwale vanu vuvule kukivumbuko kya vańa-Isilaeli. Mwale vakunzi ińidiṅano itsu vidiṅine nave Unguluve. Nkilunga umwu namwale nitsinge itsa kuhuvilila nu-Nguluve namwale nave.

¹³ Lino pwu ńi ndi mwa Kilisiti Jesu, ńi katale mwale kuvutale lino pwu unkisa gwa Kilisiti guvahegelitse.

¹⁴ Mańa vi ipelile ukuva lunotsehetso lwitu jujwa ulwakuva atwandulinye twi twale pavili ukuva mpamato mwene, ulwakuva amamwe uluvigo ulwatudadalulanyaga, nditsova vwu vutavangwa.

¹⁵ Tsu akavomba upwu ajatsaga isimilitso mummana gwa mwene gwa pasi itsili nindagilo nutusimilitso ulwakuva atetsaga pwu vwu vavili vikipelaga ukuva munu mpamato mwene umpya mumwene jujwa.

¹⁶ Vwu vavili akavasajanya nu-Nguluve mummana mpamato gwene, kikavasajanya nu-Nguluve ki kidamiṅanye upwu uvutavangwa akavubudila baho pakidamiṅanye.

¹⁷ Pwu akitsa akavavulila mwivangili ulunotsehetso ńivoni ńi mwale kuvutale navo mbwipi.

¹⁸ Mańa upwu tuhegelela twivoni lino kwa dada natwi va-Juta ṅa ni vapanzi upwu tuhegelela twi va Mepo mpamato mwene, pwu atudindulye jujwa mwene.

¹⁹ Pwu lino nandi vańakusamusa nandi vahenza, bako lino ntsengine navavalatse, ndi vana va nńumba jya Nguluve nuńe.

²⁰ Nuńe ntsengilwe palwalo lwa vapositili navańamalago ulwu UKilisiti Jesu ipelile ukuva lya nguto.

²¹ Uvi uvutsenge vwoni vwikula tungave twibatine mumwene jujwa utupagika twoni, vukipela ukuva ńumba imbalatse munkuludeva,

²² Uvi nuńe ngave ndi mumwene jujwa pwu mutsengelivwa luninye nave mukipela ukuva apakuva Unguluve umwu ivela mwa Mepo.