Vaefeso 1 - UTESITAMENTI UMPYA

¹ Nene Pauli ndili mwapositili va Kilisiti Jesu ndi ańingitse Unguluve ulwakuva anogilwe jujwa pavunogwe vwa mwene. Ndikuvavigila ńi vavalatse ńi ndi mu-Epesi ńi mumwidike UKilisiti Jesu ńivoni.

² Ndikuvapembetsa ndita: Unguluve udadajitu twivoni nu-Jesu Kilisiti unkuludeva vitu avasajage nuluhungu nulunotsehetso lwa mwene.

³ Aginivwagwe Unguluve udadaje va nkuludeva vitu UJesu Kilisiti uvi twivoni twi tuli mwa Kilisiti atusajile nulusajo lwoni lwa Mepo ulwihuma kukyańa.

⁴ Mańa umwene atuhalye mwa Kilisiti vwu kikanale ikilunga ukupelivwa tuve vavalatse tuve vatsilavulema, vwoni kumiho kumwene.

⁵ Umwene ndugano lwa mwene ulwu atuganile atuhalye ṅani ukuta mwa Jesu Kilisiti mwu twipelelage ukuva vana va mwene nduvwu anogilwe umwene pavunogwe vwa mwene,

⁶ ukuta mwu lukavage uluginyo lwene uluhungu lwa mwene ululuti ulwu atududye mu-Ngane va mwene.

⁷ Mańa upwu tungave tuli mmwene jujwa vwu tuli nuvuvangi uvwu gutuvangile unkisa gwa mwene, nditsova vwu vusyikilo vwa mbivi. Uvwene vwongosu vuliṅine nuluhungu ulukelilwe,

⁸ ululutilye ukutulesukila, lutugegye luninye nuluhala lwoni umwu luvelye nuvumańi vwa kumańa utunu twoni.

⁹ Lwu atupye upwu atuvulaga itsa kuvutitu itsu anogilwe umwene, itsu isavulye ṅani munumbula jya mwene,

¹⁰ ukuta tsigahwagwe lungave lusiku vwu gwitsile umwaka gwa mwene, tsilundamanage paninye mwa Kilisiti syoni isya kukyańa nisya pasi apa.

¹¹ Mumwene uvi atupelye ukuva venevuhale twi atwimikye ṅani nduvwu isagye ṅani jujwa. Uvi syoni ipelela umwu anogilwe pavunogwe vwa mwene.

¹² Tsu avombaga ukuta tuve vakunginya uvuvaha twi twandye ṅani ukumuvila UKilisiti,

¹³ Uvi nuńe vwu mpulike ilimeńu lya jilweli, nditsova ilivangili lya vupoki vwińo ilyu mulyidike, pwu muvikilwe mumwene ikimanilo kya Mepo umbalatse uvi umwene atye ikwitsa.

¹⁴ Ulwakuva umwene UMepo kyu kipingikilo kya vuhale vwitu. Kyu kipingikilo kya kumańilamwo ukuta tuvangilwe twi tuli va mwene jujwa ukuta tuli vakunginya uvuvaha umwene.

¹⁵ Pwu vwu ndipulike nulwidiko ulwu ndi nalwo ulwu mumwidikye unkuludeva UJesu nulugano ulwu mbaganile avavalatse,

¹⁶ pwu nandilindila, bako sikutsoni ndikuvasanila ndikuvakumbuhitsa sikutsoni ndwisajo lwane ulwu ndikisaja.

¹⁷ Ndikuvadovela nu-Mepo va luhala nu-Mepo va kutsivonya itsa kuvutitu vwu mummańile jilweli jujwa. Tsu ndita avapetsage Unguluve va nkuludeva vitu UJesu Kilisiti vi dadajitu umwene vuvaha vwoni.

¹⁸ Ndikuvadovela avamulikage amiho ga munumbula tsińo ukuta nsimańe isya luhuvilo ulwu atupelye umwu atwilangile ukuta sitye sitye. Nditsova uvuvaha vwa vuhale vwa mwene uvuvonike mbavalatse. Vwu mbumańage umwu vuvelye ukuta vutye vutye.

¹⁹ Avamulikage ukuta nagene amaka ga mwene agivoneka mwavwe twi twidike, nagene ngamańage ukuta mavaha maluti, givonekela mbukambako vwa maka ga mwene,

²⁰ ugwu agasuńage upwu antsusage mbaswe UKilisiti upwu antamyage kukivoko kya mwene ikyandyo kukyańa,

²¹ pavuvaha vwa vasuṅwa napavańivaha (va vasuṅwa) napavańamaka napavutwa napavoni avitambulwa umwu vavelye nankilunga iki nankilunga kilya kya lwambele.

²² Syoni ambikye jujwa mmalunde mmwene. Umwene ampelile ukuva ntwe gwa mpelela, ampelile va kuva pakyańa pasyoni.

²³ Ugwene umpelela gwugu mańa gwa mwene, vwu vukwile vwa uvi akwilile mwoni-mwoni ntunu twoni.