Tito 3 - UTESITAMENTI UMPYA

¹ Uvakumbuhitse valevage nakuvenekilunga nakuvatwa vavidikage vunnonu. Sikutsoni vavone viliṅanihitse ṅani tsoni imbombo innonu.

² Valandukaga nujyunge umunu amadusi. Vadwadage ukulwa, vihogose. Ntunu twoni vavonekage uvudekedeke upwu vilinda navanu voni.

³ Mańa nuvwe katale pwu twale vatsilaluhala tukila tukajaga. Twale vakivaga va vunogwe nava sivivi syoni umwu sivelye. Tukalinda mumbivi nankavini. Twale minu, tukasulana twivene.

⁴ Apene upwu avonekaga nuvudekedeke nukuvagana avanu Unguluve umpoki vitu,

⁵ pwu akatupoka. Lola ulatetsaga atupokelaga tsi mbombo tsitu tsa vugolosu itsu pange twavombile. Bako akatupokela ki kisa kya mwene, akatupoka namagasi ga kwandisivwa ukuholwa nulwanduko ulwu ikutwandulila UMepo umbalatse.

⁶ Uvi atududilye mwongosu mwa Jesu Kilisiti umpoki vitu.

⁷ Nuvwe lututsovile uvugolosu uluhungu lwa jujwa, nuvwe pwu ukuta twipelelage ukuva va kwingilapwo pavuhale vwa vwumi vwa sikutsoni nduvwu luvelye uluhuvilo.

⁸ Lyu lihuvili ilimeńu ili. Tsu itsu ndinogilwe ukuta uvavule usimilitsage, voni avamwidike Unguluve ukuta tuvone vatsibadime imbombo innonu. Tsu nnonu tsitsitsi, tsu tsikuvatanga avanu.

⁹ Itsene itsu vikaniṅana inzimu nitsu vikaniṅana amatavwa ga nsivumbuko umwu gakonganye gatungine nitsu vilwa pakukaniṅana isimilitso itsipelile ukuva ligoha, tsu utsitumbage tsoni, mańa natsikumbumbulila kinu umunu, tsili tsa vuvule.

¹⁰ Umunu uvi agwe imatukano mmpelela, vi umume kapamato pange kavili, pwu vwikwegage kumwene.

¹¹ Ummańage ukuta uvi vwu agahile vuvule-vule vwu agwe pwu vwu atulile inongwa, vwu idumulye ṅani jujwa itsa mwene.

¹² Ungave uvwene ndisuṅile kwave angave vi Alitema angave vi Tikika, pwu vwitse ugendelage ukwitsa kwane mu-Nikopoli umu. Ulwakuva mwu nditye ndigonaga amapepo umu.

¹³ Nu-Sena, umańisandagilo nu-Apolo uvatange sitso pakuvavopela imbopo jya munzila. Ulole valalemwagwa isinge.

¹⁴ Voni avajitu uvavule valumańe ukugimba imbombo innonu, navene ukuta vave nasyo isya kuliṅana nasyo pavusumbe uvuvonike, valavetsaga vagumba iseke innonu.

¹⁵ Vikuvapembetsa voni uvwu ndili navo apa. Utupembehetsage voni avamanine nuvwe ndwidiko. Uluhungu luvetsage nuńe ńivoni.