Tito 2 - UTESITAMENTI UMPYA

¹ Uve tsovaga itsinogye munongwa ińumi itsu tukuvavula.

² Avagosi avavaha uvavule valagalaga, vave vadwadwa, vave nuluhala, vave vumi nulwidiko nulugano nukusihaluvipo.

³ Navadala avavaha vuvule-vule, mumbele vavoneke ukunogela mbuvalatse, valadukaga, valipelaga ukuva vagulano kuvugimbi ukuńwa vwongosu. Upita valumańage ukuvavula vunnonu inongwa avajyavo.

⁴ Pwu vikuvagolosa avanunavavo ukuta vavagane avagosi navana va vene.

⁵ Upita vave nuluhala, vave vavalatse inumbula, vavombe vunnonu nńumba tsa vene, valeve kuvagosi va vene, pwu nujyunge nalatsiduke amadusi inongwa tsa Nguluve.

⁶ Navalume vuvule-vule, navene vakumbuhitse vave nuluhala.

⁷ Ntunu twoni vwipelage ukuva va kulolelamwo imbombo innonu avene, nupwu vukuvavula inongwa vakuvone nukutsilakuhanzanya nitsinge, vakuvone ukuva vi ndwadwa.

⁸ Ilimeńu lyako live lyumi, lilavetsaga napange pakutsovwa uvuvivi uvi ilwa nuvwe pwu ukuta ave nisoni vwu alemilwe imbivi itsa kututsova.

⁹ Avagulano uvavule valeve kuvenenavo ntunu twoni. Vagetsage ukuvakela, valavetsaga nilya kubeda.

¹⁰ Valahitsaga nutunge. Bako vavoneke uvuhuvili uvunnonu vwoni, pwu valavona inongwa tsa mpoki vitu Unguluve vatsinotsitse mwoni-mwoni.

¹¹ Mańa luvonike uluhungu lwa Nguluve ulukuvapelela ukupokivwa avanu voni.

¹² Lukutuvunga ukuta tutsilage ulwa vutsilakundwada Unguluve, ukuta tutsilage uvunogwe vwa nkilunga vwu tuli kuvwumi pakyańa apa, pwu ukuta tuve mbuswihu twigolose tundwade Unguluve.

¹³ Tutsimańage ukwitsa imelalugataluko itsu tuhuvila nuvwene uvuvaha vwa Nguluve umbaha, nditsova uvwa mpoki vitu UKilisiti Jesu, tuvumańage ukuta vulavonekaga.

¹⁴ Uvi atuswilye upwu atetsage ndivavange uvwe mwoni umwu natukave nandagilo, upwu atetsage ndivalahitsage avanu ava kuva va mwene jujwa, avatsinamye imbombo innonu, vita tuvombe tsitso tsene.

¹⁵ Tsu utsove tsitsitsi, tsu uvahusanihitse, tsu uvaleme, uvoneke ukuta tsa kulagila jilweli. Nujyunge: alakugililaga.