Tito 1 - UTESITAMENTI UMPYA

¹ Nene Pauli ndili nkivaga va Nguluve, ndili mwapositili va Jesu Kilisiti, ndili va kudulusa ulwidiko lwa vahalilwe va Nguluve, ndili va Kuvonya uvumańi vwa kuvumańila uvwajilweli uvupela ukundwada Unguluve.

² Uvwene uvwapositili vwu ndili mwapositili ulwakuva ndimile paluhuvilo lwa kuhuvila uvwumi vwa sikutsoni uvwu Unguluve, uvi navumańili ukunwaṅa, vidiṅine nuvwe katale sitso vwu gikanale ukuvalwa imyaka.

³ Uvi palitsuva lya mwene alivonehitse pavuvalasu ilimeńu lya mwene upwu likatsovwa, ilyu nune ndipevilwe mmavoko nduvwu andagye umpoki vitu Unguluve.

⁴ Ndikukuvigila vi Titi vi mwana vango jilweli, vi ndikuholile umwu tuli lwidiko lupamato lwene twi vavili. Ndikukupembetsa ndita: Unguluve udadaje nu-Kilisiti Jesu umpoki vitu vi akusajage nuluhungu nikisa nulunotsehetso.

⁵ Itsu ndakulekye mu-Kileti ukuta umalise ugahe utwasigye, uvike navavaha avenemipelela mbutsenge mbutsenge nduvwu ndakulagye.

⁶ Untole uvi uvwene nitsovwa itsinge, uvi atolile undala mpamato mwene, uvi avana va mwene vakilisiti, uvwu ujyunge navatsovili ukuva vatsilavuswihu navatsilakupulika.

⁷ Mańa undolelampelela vi upita ave mbalatse itsa kuntsova, upita avoneke ukuva mwimikwa va Nguluve, upita alakongaga itsu anogilwe mwene, upita gulavipaga ṅani-ṅani, alavetsaga va nkidili, alavetsaga nńango pakulwa, nisya kukava upita alakavilaga umuli mwiko.

⁸ Bako upita avupilile avahenza, agahe innonu, alumańe ukwivandila, ave ngolosu, ave mbalatse, alumańe ukwijumilitsa.

⁹ Upita abadame amameńu ga jilweli agahumile munongwa itsu vambulile, pwu namwene alalumańa ukuvahusanya avange ninongwa ińumi nukuvalema avibeda.

¹⁰ Mańa pwuvale vongosu uvwu navileva, vipwata ututsago twa kupanga vuvule. Vikuvahonga navange. Itsene tsitsitsi tsu valutilye sitso avahumile mbukegetwa.

¹¹ Vwu upita umunu avadinde kundomo. Avene vimamula ińumba jyoni umwu vikwingila, vimańisa itsili mwiko ukumaṅisa ulwakuva vita tukave ikyuma ikili mwiko ukukava.

¹² Ujyunge uvi ali namalago va vene avatsovile atye: Ava-Kileti sikutsoni vanwasi, ṅanu inalamu, myolo imitumbu.

¹³ Tsitsitsi tsu tsa jilweli. Pwu ndita uvaleme sitso vanduke vipele ukuva vumi ulwidiko.

¹⁴ Valatugwilaga ututsago twa va-Juta nutulagilo twa vanu avatumbile uvwajilweli.

¹⁵ Syoni sivalatse ungave uli mbalatse vi munu. Avene avatsilalwidiko vwu nasivalatse isinge. Bako vavivi nińisagilo nińivonelo tsa vene.

¹⁶ Ukuntsova Unguluve kwu vikuntsova mundomo vita tummańile, mańa mumbombo tsa vene mwu vikundegukila vita natummańili. Vipelile ukuva kińalapwa vibeda vuvule. Vebepe kumbombo tsoni.