Mataayo 28 - UTESITAMENTI UMPYA

¹ Vwu alutile usabati vwu kutengula ukukya palitsuva ililongotsi lya pajuma, pwu UMalija va mu-Magatala nu-Malija ujyunge vakabiha kwilola uvuguli.

² Pwu vakakeńemuka ikilunga kilindima sitso, ulwakuva unsuṅwa va Nguluve ahumile kukyańa itsile avusitse iliganga pandyango, lyu atamilepwo.

³ Ukuvoneka umwene avonekaga uta lumuli lwa nzasi, nimisabwa gya mwene igyu aswalile gikava mivalasu vuvule uta nala.

⁴ Vwu vambwene avalolelaga uvuguli pwu vakakeńemuka, uludwado lukavavona, vakagwilanila vwu vangwike.

⁵ Umwene unsuṅwa akavavula avadala akata: Uńe ndadwadaga. Mańa ndilumańile mukundonda UJesu uvi atovelilwe pakidamiṅanye.

⁶ Namuli umu. Mańa atsukile nduvwu atsovile atye nditsukaga. Ukwi ndole upwu agonile unkuludeva.

⁷ Mbihage ṅani-ṅani nkavavule avakongi va mwene nkatetsage: Atsukile umwu aswe, ilongola mbulongolo ukubiha mu-Galilai. Mwu ndatsikumbona. Lola ndivavulile.

⁸ Pwu vakańila ukuhuma mbuguli, vakahanza vakata nukudwada vakata nuku…hekela, vakakuja vakatsikuvavula avakongi va mwene. Munzila vwu vibiha kukuvavula avakongi va mwene,

⁹ pwu vakakeńemuka vikwaganila nave UJesu. Vi akatsova navo akata: Ndikuvapembetsa. Avene vakańilila kumana vakamwibata amalunde vakisaja kumwene.

¹⁰ Pwu UJesu akata: Kwu bako ukudwada. Mbihage nkavavule avajango vabihage mu-Galilai mwu valambona uńe.

¹¹ Avene vwu valutile pwu avange avasikali avalolelaga uvuguli vakabiha mbutsenge mu-Jelusalemu, vakatsikuvavula avateketsi avavaha itsivonike.

¹² Vwu vakalundamana navańivaha avenekivumbuko vakatsovana. Pwu vakavahomba sitso avasikali indalama

¹³ vakata: Mutetsage avakongi va mwene vitsile pakilo vamitsile vwu itulu tsitulemile.

¹⁴ Tungave tuvwene apulike undolelakilunga, pwu tukunnunatsa uvwe, uńe mukinage vuvule.

¹⁵ Pwu avene vakupilila indalama, vakatsova itsu vavavulaga. Pwu ligenda mba-Juta ilimeńu ili nakulino kunu, lyu vitsova sikutsoni.

¹⁶ Avene avakitsigo numpamato vakabiha mu-Galilai pakidugala ikyu avalagye UJesu, ikyu atye tutsikwaganilaga.

¹⁷ Vwu vambwene pwu vakisaja kumwene. Avange vakinana mwitumbu.

¹⁸ Umwene UJesu akahegelela akatsova navo akata: Amaka goni naga kukyańa naga pasi ndipevilwe une.

¹⁹ Pwu ndita: Mbihage lino nkavapelelage vakongi vango avanu isivumbuko syoni upwu mukuvotsehetsa mwitavwa lya Nguluve udadaje nilya nswambe nilya Mepo umbalatse,

²⁰ nkavamańisage ukukonga tsoni tsitsu ndivalagye une. Lola ndili nuńe sikutsoni vuvule nditsisikaga nuńe nakuvusililo ikilunga.