Maliko 9 - UTESITAMENTI UMPYA

¹ Akavavula akata: Jilweli-lweli ndikuvavula ndita: Ńi mwimile apa avange nandavuvone uvuswe vwu nanduvweni tango ulu deva lwa Nguluve ukwitsila mmaka.

² Vwu vagonile ntanato pwu UJesu akavatola va-Petele nu Jakobu nu-Johani, akatoga navo pakidugala ikitale, pwu akatsikijekela navo ava vene. Pwu akanduka vwu vilola.

³ Pwu imisabwa gya mwene gikaṅala gikava swe vuvule ukuta ṅala. Navańalwutsi avavalatsamisabwa ava nkilunga kyoni umwu kivye–igya vene nagisika uvuvalasu.

⁴ Pwu vakakeńemuka vivoneka nu-Elija nu-Mose vitsova nave UJesu.

⁵ Pwu UPetele akatsova kwa Jesu akata: Vi mańisi pannonu ukuva apa uvwe. Tungatsengaga ihema idatu apa, mamato jive jyako, ijyinge jya Mose, ijyinge jya Elija.

⁶ Mańa alemwagwa ukutsova vuvule ulwakuva lwavavwene uludwado.

⁷ Pwu vakakeńemuka ilivingo likuvilikila, vakavona nilimeńu lihuma mwivingo umu lita: Uju vi vi nswambango ungane kwane, vi mumpulihitsage jujwa.

⁸ Pwu ṅani-ṅani vuvule vwu vita tulolese, pwu vakavona nakuli ujyunge, bako vi Jesu mwene, vi vakavona vali nave.

⁹ Vwu vikwika pakidugala pwu akabetsa UJesu akata: Ndambulaga nujyunge umunu tango itsu mutsivwene. Lungave lusiku ngave mbwene Uńamunu atsukile kuvaswe pwu mutsove.

¹⁰ Pwu vakava nalyo ilimeńu ili, vakavutsanya vakata: Ukutsuka kuvaswe kyu kinu kiki?

¹¹ Vakambutsa jujwa vakata: Kyu kinu kiki ikyu vwitsova avamańakalata upwu vita ilongolaga ju Elija ukwitsa?.

¹² Umwene akanda akata: Kwu jilweli Elija va kutengula ukwitsa, vi va kunotsehetsa syoni. Ilyene ilikuntsova Uńamunu mwa kalata lyu nda namulivweni, ilita vi ikuvilwagwa, igililwagwa sitso?

¹³ Lola ndikuvavula ndita: Ukwitsa Elija kwuitsile, mańa avene vankinye vuvule nduvwu vanogilwe, vwu itsu antsovye ṅani kalata.

¹⁴ Pwu akatsisika upwu valepwo avakongi va mwene akavona vavimilye navanu ikipuga vuvule navamańakalata vakakaniṅana navo ulukani.

¹⁵ Vwu vambwene avanu ikipuga kyoni, pwu vakanoga vuvule mwitumbu vakańilila vakampembetsa.

¹⁶ Umwene akavavutsa akata: Ulukani ulwu mukaniṅana navo lwa kiki?

¹⁷ Pwu ujyunge uva nkipuga akambula akata: Vi mańisi ndingegile kwave unswambango uva mepo jya kutsilakutsova.

¹⁸ Jivona jimusanitse pwu itsilika namahuve givoneka pandomo, igadutsa namino pwu itoka vuvule ummana. Nditsovile navakongi vako nditye mujihumihitsage, lola ndivwene jivalemile.

¹⁹ Pwu UJesu akanda akata: Hi, kwu kutsilakwidika kuki avanu va lino ava! Ndisike ndaku ukuva nuńe, ndisike ndaku ukuva lya imaga sikutsoni! Mungegage kunu.

²⁰ Vakangega. Pwu undume vwu ambwene UJesu, pwu imepo imbivi jikanyongola jikantwangitsa pasi, akibilusa pasi namahuve kundomo.

²¹ Umwene UJesu akambutsa udadaje va ndume akata: Jimbwene ndali? Umwene akata: Jimbwene mbudebe.

²² Sikutsoni jikundaha mmwoto nammagasi vwu jita ndimbude. Ungave ulumańile pwu utulililage ikisa ututange.

²³ Umwene UJesu akata: Ukulumańa kwu kwiki, lwu lwidiko ungave ulumańile ukwidika, vwu pwu ulumańile syoni, vwu nisinge nasikulemili.

²⁴ Pwu akilanga nukutsova udadaje va ndume akata: Ndidike nkuludeva, Ungamokaga ulubedo ungave uvwenendibeda.

²⁵ Avwene UJesu vikuńilila avanu, pwu akajitanila najyo imepo imbivi akata: Vi mepo vi ntsilakutsova vi utsivye uve, ndikukuvula ndita: Humaga mumunu uju, ulavujaga ukwingila mmwene.

²⁶ Pwu jikakuta jikannyongola sitso jikahuma. Umwene undume akava nduvaswe. Avange vakata aswe.

²⁷ Umwene UJesu akamwibata ikivoko akamwimya, pwu akima.

²⁸ Vwu vatsisike kuvutsenge pwu vakambutsa avakongi va mwene vwu vijekye nave vakata: Uvwe tulemilwe kiki ukumumya?

²⁹ Umwene akavavula akata: Avene avanavihuma vuvule, pene ungave utye nukwisaja baho, pwu lweli pwu vihuma.

³⁰ Pwu vakahuma baho vakatsungutila kyoni ikya mu-Galilai. Akata nujyunge alambonaga.

³¹ Ulwakuva ali pakuvamańisa avakongi va mwene akata: Uńamunu alapevwa mmavoko gavanu vwu valambuda. Lola vwu vambudile pwu alatsuka ilya datu.

³² Avene likavalema ukulivona ilimeńu ili. Vakadwada ukumbutsa.

³³ Akatsisika mu-Kapelinaumu. Vwu vatamile nńumba pwu akavavutsa akata: Mwakananaga kiki munzila?

³⁴ Avene vakava mye vuvule. Ulwakuva vakananaga ilya vuvaha munzila vatetsaga umbaha vi veni?

³⁵ Pwu umwene akatama akavilanga avakitsigo navavili akavavula akata: Uvi ita ndive ndongotsi kuvajango vi upita ipelage ukuva va mumbele, vi upita ipelage va kuvavombela voni avanine.

³⁶ Pwu akantola umwana akambika pagati akampagata akavavula akata:

³⁷ Uvi ikumwupilila ujyunge umwana uvi ali nduju, angave ikumwupilila mwitavwa lyane, vwu ańupilye une. Uvi ikuńupilila une, vwu nańupilili une, bako vwu amwupilye uvi ansuṅile une.

³⁸ Pwu UJohani akambula akata: Vi mańisi tumbwene ujyunge uvi imepo imbivi atsihumihitsaga mwitavwa lyako. Pwu uvwe tukambetsa ulwakuva tuvwene nikutukonga.

³⁹ Umwene UJesu akanda akata: Kwu mwale nakiki ukundeka. Mańa voni avipelela isinge isipelwa mwitavwa lyane, vwu naviluta pakunzova imbivi.

⁴⁰ Mańa uvi natwiva ngoso, vi twiva nave vuvule.

⁴¹ Ulwakuva uvi ikuvańwesa ki kinwelo kipamato kyene kya magasi, angave ikuvańwesehetsa ulwu ndi vanu va Kilisiti ilitavwa, jilweli-lweli ndikuvavula ndita, nalalemwagwe isya kumomba.

⁴² Uvi ikumwambutsa ujyunge uva vadebe ava avikunidika une vi ndita tsavetsaga ńebepe sitso itsa kukungivwa ulwala pasingo itsa kundaha muńanza umwene ku itsikumwitsilaga.

⁴³ Ungave uvwene ikinge ikivoko kyako kita ndimwambutse uve, pwu ukikegetage. Mańa nukutsikwingila mbwumi vwu vwilematsehitse ṅani, nukuva nago goni amavoko vwu ubye ndulimbo nammwoto ugwu nagwitsima lusiku–kunonu kwu kwilematsa.

⁴⁴ Mańa mwu isomi tsa vene natsiswa lusiku, numwoto gwa vene nagwitsima lusiku.

⁴⁵ Napene ungave uvwene ikinge ikilunde kyako kita ndimwambutse uve, pwu ukikegetage. Mańa nukutsikwingila mbwumi vwu vwilematsehitse ṅani, nukuva nagwu goni amalunde vwu ubye ukulahwa ndulimbo lwa mwoto–kunonu ku kwilematsa.

⁴⁶ Mańa mwu isomi tsa vene natsiswa lusiku, numwoto gwa vene nagwitsima lusiku.

⁴⁷ Napene ungave uvwene ilinge iliho lyako lita ndimwambutse uve, pwu ulińumulage ulitagage. Mańa nukuva ni liho lipamato lyene vwu ubye pakwingila kuludeva lwa Nguluve, nukuva nago gwu gavili amiho vwu ubye pakulahwa ndulimbo lwa mwoto–kunnonu kukuva ni liho lipamato lyene.

⁴⁸ Mańa isomi tsa vene natsiswa lusiku, numwoto gwa vene nagwitsima lusiku.

⁴⁹ Avanu voni mpamato-mpamato upita vahatwagwe numwińo.

⁵⁰ Umwińo gwu nnonu. Apene gungave umwińo guvejangike pwu musivone ndaku isya kugupelela uvukali? Mbetsage numwińo mwitumbu mwańe, nukwalisanya mwalisanyage ndunotsehetso.