Maliko 8 - UTESITAMENTI UMPYA

¹ Mmatsuva aga vwu valundamine avanu vongosu ikipuga vuvule vwu nasikuli isinge isya kulya, pwu UJesu akavilanga avakongi va mwene akavavula akata:

² Ikisa kimbwene mwitumbu upwu ndikukivona ikipuga kya vanu iki. Mańa valindile amatsuva gadatu pane apa kitalya isinge.

³ Ndingave ndatetsaga ndivatavulage kuvutsenge vwa vene kitavasugila isinu, pwu viswitsaga inzala munzila. Mańa avange vahumile kuvutale.

⁴ Avene avakongi va mwene vakanda vakata: Pwu veni ate asivone ndaku ndukungu umu isinu sya kuvasugila voni ava?

⁵ Umwene akavavutsa akata: Ndi nasyo silingi isivanda? Vakata: Tuli nasyo lekelakupamato.

⁶ Akavavula avanu ikipuga kyoni akata: Mutamage pasi. Pwu akatola isivanda syu lekelakupamato syu akasana akameńulanya akavapa avakongi va mwene akata: Muvagavanihitsage avanu valitsage. Pwu vakavagavanihitsa ikipuga kyoni.

⁷ Natwene utusomba vale natwo utunge. Natwene akasana kwa Nguluve akata: Natwene muvagavanihitsage valitsage.

⁸ Pwu vakalya vakiguta. Pwu vakalundamanya utumeńukila utwu vasigitse isiswiswi lekelakupamato.

⁹ Avene avalitsaga vale pavaelipu vani (4000). Pwu akavatavula akata: Mbihage.

¹⁰ Pwu umwene akipakila ṅani mwiboti navakongi va mwene akalovoka ukubiha nkilunga kya mu-Ndalimanuta.

¹¹ Pwu avapalisai vakabiha upwu ale, vakakaniṅana nave ulukani vakangela vakata: Ungatupelelaga ikinge ikipelwa kya kukyańa ikya kukumańilamwo.

¹² Umwene akidakula mwitumbu akata: Avanu va lino ava vilonda kyiki ikipelwa kya kumańilamwo une? jilweli-lweli ndikuvavula ndita: Avanu va lino ava navalakivone nikinge ikipelwa.

¹³ Pwu akavaleka baho, akavuja akipaka mwiboti akalovoka ukubiha umwambo gulya.

¹⁴ Avene avakongi va mwene vakasamwa ukwivopela isinu, vakava nakyo ikivanda kipamato kyene mwiboti.

¹⁵ Umwene akavavula akata: Ndolage sitso mbandikage nunsabe gwa vapalisai nunsabe gwa Heloti.

¹⁶ Avene vakisagila vakavutsanya vakata: Ulwakuva natugegili pange isinu?

¹⁷ Umwene UJesu vwu avavwene pwu akata: Tsu mukisagila tsiki itsu namugegili isinu? Namutsivweni nalino nandi nuluhala? Inumbula tsińo tsikanale, nalino tsumile vuvule?

¹⁸ Vwu ndi nagwo amiho namwilola? Vwu ndi natsu imbulukutu namupulika? Nukukumbuhitsa namukumbuhitsa?

¹⁹ Upwu ndavagavanyaga isivanda sihano avanu vaelipu vahano (5000), pwu mukaditsa isiswiswi silingi utumeńukila utwu mwalundamanyaga? Avene vakanda vakata: Kitsigo nasivili

²⁰ Nupwu ndavagavanyaga isivanda lekelakupamato avanu vaelipu vani (4000), pwu mukaditsa isiswiswi silingi utumeńukila utwu mwalundamanyaga? Avene vakanda vakata: Lekelakupamato.

²¹ Umwene akata: Kwu pwu namukutsivona inongwa?

²² Pwu vakatsisika mu-Betisaita. Pwu vakangega kumwene umbosu vakatekelesa vakata: Ungamwabasaga.

²³ Pwu umwene akamwibata ikivoko umbosu akankogosa, akahuma nave mbutsenge akabiha kumbale, akambehela amati mmiho akambika amavoko, akambutsa akata: Ndeti lino pwu vwilola kiki?

²⁴ Umwene akinamuka akata: Ndilola avanu, upwu vigenda pwu vivoneka ndimibiki.

²⁵ Pwu akongeletsa ukumbika amavoko pamiho. Pwu akalola vunnonu, amiho ga mwene gakapona, twoni tukavoneka vunnonu vuvule nakuvutale umwene.

²⁶ Pwu UJesu akata: Goloka vuvule ukubiha kuvutsenge vwako, kwu bako nukwingila mbutsenge umu.

²⁷ Pwu UJesu akabiha navakongi va mwene mbutsenge vwoni vwa nkilunga kya mu-Kesalija Pilipi. Munzila pwu akavavutsa avakongi va mwene akata: Avanu upwu vikunzova, pwu vita ńa veni?

²⁸ Avene vakambula vakata: Avange vita vi Elija, avange vita vińamalago vuvule.

²⁹ Pwu umwene akavavutsa akata: Uńe lino mwita ńa veni? Pwu akamwanda UPetele akata: Veve Kilisiti.

³⁰ Pwu umwene akantanila sitso akata: Tsu ndambulaga nujyunge umunu.

³¹ Pwu akatengula baho akavavonya akata: Uńamunu iva pakukuvilwa sitso. Navańivaha avenekivumbuko navateketsi avavaha navamańakalata valammelaga valambudaga, mańa alatsukaga palitsuva lya datu.

³² Akalitsova vuvule pavuvalasu ilimeńu ili. Pwu UPetele akigava nave akantanila nave.

³³ Umwene akavakilivukila avakongi va mwene akavalola akantanila nave UPetele akata: Luta kumbele vi Setano, mańa navukisagila itsa kwa Nguluve, vukisagila tsitsa vanu vuvule.

³⁴ Pwu akavalundamanya avanu ikipuga kyoni navakongi va mwene akavavula akata: Uvi ita ndinkonge mumbele une, vi upita idulusage vuvule, atetsage nikidamiṅanye kya mwene itwikage pwu aṅongage une.

³⁵ Mańa uvi ita ndiponye uvwumi vwango vi ambwitse. Mańa uvi uvwumi vwa mwene ambuhitse mumwane namunongwa tsango ulwakuva ali natso, vi aponehitse vuvule.

³⁶ Nupwu angave umunu akikavaga kyoni ikilunga pwu kyambumbulilaga kiki angave vwu ambuhitse vuvule mumwa uvwumi vwa mwene.

³⁷ Nisya kuvuvangila asivonage ndaku isya kuvuvangila uvwumi vwa mwene?

³⁸ Uvi iva nisoni nakwane nakumameńu gango mbanu va lino ava avaligu avatulanongwa ava, vi namwene nu-Ńamunu alava nisoni vwu agendile mbuvaha uvudwadwa vwa dadaje ukwitsa navasuṅwa avavalatse.