Maliko 7 - UTESITAMENTI UMPYA

¹ Pwu vakabiha upwu ale avapalisai navamańakalata avange avahumile mu-Jelusalemu.

² Pwu vakavona avange avakongi va mwene isinu vilila amavoko agalamile. Mańa vwu galamile avene, ungave nupugwihi mmavoko.

³ Ulwakuva avapalisai nava-Juta voni vwu navilya isinge isinu vwu navapugwihi mmavoko kavilikavili tango. Vwu vigaha vuvule-vule ukukonga ulwiho ulwu vavalekye avakoṅona va vene.

⁴ Nisyu vangave vahumile pakugula isinu, pwu navilya vuvule, bako tango vipuguha. Natsene ińiho tsa vene ńongosu itsu vita umunu upita akongage vuvule-vule, itsa kuhutsuga nisińwelo nimbale nindelema tsa kimanga.

⁵ Pwu vakambutsa avapalisai navamańakalata vakata: Avakongi vako navikonga kiki ińiho itsu vatulekye avakoṅona vitu? Isinu vilya kiki kitapuguha mmavoko?

⁶ Umwene akanda akata: Agolwise jilweli UJesaja upwu atsovelage ṅani ńi vanwasi uńe upwu atsovaga itsili pakalata itsita: Avanu ava vikuńimikila gu ndomo gwene, inumbula tsa vene vwu tsiva pavutale vuvule.

⁷ Ulwimiko ulwu vikuńimikila nalukuvavumbulila kinu, mańa ulumańiso ulwu vimańisa lwiho vuvule lwa vanu.

⁸ Mańa indagilo tsa Nguluve tsu mutsilekile, itsene ińiho tsa vanu tsu mukonga.

⁹ Akavavula akata: O, munotsitse pange upwu mulimbwe indagilo tsa Nguluve vwu mwita tukongage itsińo ińiho.

¹⁰ Mańa umwene UMose alagye ṅani ilyakuta: Umwimikage udadajo nuvańoko nilyakuta: Uvi ikunduka udadaje nuvańina vi upita abudwagwe.

¹¹ Uńe mwita: Angave umunu atsovile kwa dadaje nakuvańina atye “Kolibani”, kwu kuta ndili ndikukupa isyu usumbilwe, lweli ulwakuva sya kulaha mwa Tempeli–pwu uńe mwita vwu vuvule vwu avelye vuvule-vule.

¹² Mańa kwu kuva mudindile mutye alampetsaga nisinge udadaje nuvańina.

¹³ Pwu nińiho tsińo mukulilimbula ilimeńu lya Nguluve. Nitsinge itsili nditsi tsu ndi natso ńongosu.

¹⁴ Pwu akavalundamanya avanu ikipuga kyoni akavavula akata: Mupulihitsage kwane ńivoni, mutsimańage itsu ndikuvavula.

¹⁵ Nisinge isya panzi nasikundamya umunu upwu sikwingila mwitumbu mmwene. Bako tsitsu tsihuma mmwene, tsu tsikundamya umunu lweli.

¹⁶ Uvi ali natso imbulukutu vi apulihitsage.

¹⁷ Vavwene itsile ukwu ale navanu ingye nńumba, pwu vakambutsa avakongi ikihwanihitso iki.

¹⁸ Umwene akata: Nuńe humbe vwu ngahile, nandi nuluhala? Tsu mukanale nuńe ukutsivona ukuta syoni isya panzi singave sikwingila mmunu, syu nasikundamya napange?

¹⁹ Mańa nasikwingila munumbula, bako sibiha mbutumbu vuvule, sivuja sitagwa kulińasi. Vwu sivalatsivwa vuvule-vule syoni isinu.

²⁰ Akata: Lola itsihuma mmunu tsu tsikundamya lweli.

²¹ Mańa munumbula tsa munu ngati, mwu tsihuma ińisagilo imbivi tsoni, nitsa kuńila nundala va munu, nitsa vuhitsi, nitsa vubudi,

²² nitsa vuligu, nitsa kunogwatwoni, nitsa vuvivi, nitsa luhala uluvivi, nitsa vupumu, nitsa kavini, nitsa madusi, nitsa lwiginyo, nitsa vutsimu.

²³ Tsoni imbivi itsi tsu tsihuma mwitumbu mmunu, tsu tsikundamya umunu.

²⁴ Pwu akabiha nkilunga kya mu-Tili namu-Sitoni, Mwu akatsikwingila nńumba akata pange navikumbonaga avanu. Mańa akapulikika.

²⁵ Mańa ujyunge undala uvi ale nakalive akale nimepo imbivi apulike ukuta mwale. Pwu akabiha upwu ale akambilukila mmalunde.

²⁶ Umwene undala ale n-Giliki, ahumile mu-Silopeniki ikivumbuko. Vi akatekelesa kumwene akata: Ungamumyaga imepo imbivi mumwalivango.

²⁷ Umwene UJesu akata: Leka tango vigutage va vana, mańa mwiko ukutola isinu sya vana ukutulahila utubwa.

²⁸ Umwene undala akanda akata: Kwu jilweli nkuludeva, lola nditye ulwakuva nutubwa twihola utulagalila utusigala vwu vilya avana.

²⁹ Umwene UJesu akanda akata: Ulwakuva utsovile ilimeńu ili, pwu bihaga vutsivonaga imepo imbivi jihumile mumwalivo.

³⁰ Pwu akabiha kuvutsenge, akatsivona imepo imbivi jihumile jilweli, akatsivona umwana agonile vuvule pavugono.

³¹ Akavuja akahuma nkilunga kya mu-Tili akagenda ija mu-Sitoni akatsisika pańanza jya mu-Galilai pagati pakilunga kya mu-Ndekapoli.

³² Pwu vakagega kumwene uvatsivye uvi ale kinunu, vakatekelesa kumwene vakata: Umbike ikivoko.

³³ Umwene akigava nave kuvanu, akavika iṅonze mumbulukutu akabehela namati akamwabasa ululimi lwa mwene

³⁴ akalola kukyańa akidakula pwu akata: Hepata, kwu kuta dinduka,

³⁵ Pwu imbulukutu tsa mwene tsikadinduka, nululimi lwa mwene umwu lwakungilwe lukavopoka akatsova vuvule akagolosa.

³⁶ Umwene akatanila akata: Ndambulaga nujyunge umunu. Avene vakavona antanye pwu vakongeletsa vunnonu ukutsova.

³⁷ Pwu vakadega vakalutilila vuvule vakata: Anotsitse tsoni, avatsivye ikuvapelela ukupulika, avali kinunu ikuvapelela ukutsova vuvule.