Maliko 6 - UTESITAMENTI UMPYA

¹ Pwu akahuma baho akabiha mbutsenge umwu akulye. Avakongi va mwene vakankonga.

² Vwu itsile usabati pwu akavavula inongwa nńumba jya kwisajilamwo. Avene avapulikaga vakadega vakata: Tsu atsivwene ndaku tsitsitsi? Lwu luhala luki ulu ali nalwo? Syu sipelwa siki isyu ipela mmavoko ga mwene?

³ Nda vi vi mpunza sibiki ulya, nda vi vi nswambe va Malija, vi vi mamajavo va va-Jakobu nu-Jose nu-Juta nu-Simoni? Avahatsave nda natwiva navo voni apa? Pwu tsikavapelela ukuvambutsa tsitsitsi.

⁴ Umwene UJesu akavavula akata: Mwoni mbunge uńamalago vikumwimika avanu, mumyave lweli umwu akulye nambalukololwe nanńumba jya mwene vwu vikungilila.

⁵ Akabela nukupela ikinge ikipelwa kya maka mumwa. Kene akakuvavika amavoko avange avatamu aka kuvaponya, kwu akapela aka kene.

⁶ Akadega ulubedo lwa vene. Pwu akatsungutila mbutsenge vwoni vwa pambale, akavavula inongwa.

⁷ Akavilanga avakitsigo navavili akavasuṅa inzila uku vavili uku vavili. Akavapa amaka ga kuhumihitsa imepo imbivi.

⁸ Akavavula akata: Ndavetsaga nisinge munzila. Lu lukongotsa lwene, lwu muve nalwo. Kwu bako ukuva nakapako ka mbopo nisinu nindalama mungwamba.

⁹ Isikato syu muswalage, kwu bako ukuva nigyańingilitsa givili.

¹⁰ Akavavula akata: Nińumba ijyu mukwingilamwo mwu mukagone mumwa mukasikage lulwa mwiluta.

¹¹ Avatye vabelile ukuvupilila, vatye vabelile ukupulihitsa itsu mwitsova, vwu nkahumage mmyavavo, nkavatovelage nulusumbe kumalunde, tsu tsive tsa kumańilamwo avene.

¹² Pwu vakabiha vakasimilitsa lilyakuta nkilivukage.

¹³ Vakatsihumya imepo imbivi ńongosu, navatamu vakavabaka nimono, pwu vakapona.

¹⁴ Tsitsitsi tsu tsikapulikika nakunkuludeva UHeloti, ulwakuva ilitavwa lya Jesu lyapulikike. Umwene UHeloti akata vi Johani umwotsi, atsukile umwu aswe pwu ipela isipelwa isi.

¹⁵ Avange vakata vi vi Elija, avange vakata namalago, ali ndavańamalago va katale.

¹⁶ Umwene UHeloti vwu apulike pwu akata: Vi vi Johani uvi ndantemile untwe, atsukile umwu aswe.

¹⁷ Ulwakuva UHeloti ansuṅye avanu UJohani avatsikumwibata, andindye nńumba jya vańololo panongwa tsa Helotya undala va lukololwe UPilipo. Ulwakuva ańilile nave.

¹⁸ Mańa UJohani ambulile atye: Mwiko ukuva nundala va lukololwo.

¹⁹ Tsu itsi UHelotya asingile atye ndikumbudaga, mańa akalemwa ukutsivona itsa kumbudila.

²⁰ Umwene UHeloti vi andwadaga UJohani ulwakuva ambwene ukuva ngolosu, ambwene ukuva munu ungolosu. Sikutsoni akampoka. Angave ahumile pakupulika itsu ambulaga UJohani, pwu atsikongaga ńongosu. Akata manonu amameńu ga mwene.

²¹ Ulunge pwu likitsa ilitsuva ilinnonu umwene. Mańa UHeloti avilangile avańivaha va mwene navalongotsi va ligoha navatwa va mu-Galilai kwilya isinu sya pamwaka gwa kukumbuhitsa ukuholwa umwene.

²² Vwu avwene vali pakulya isinu, pwu akalive ka Helotya kakingila umwu vale kakanema. Pwu kakanoga nakwa Heloti nakuvoni avatamile nave pakulya isinu. Pwu unkuludeva akakavula akahinza akata: Dovaga akange kwane isyu ungave unogilwe ukudova ndikukupetsaga.

²³ Akajigila nulujigo akata: Isyu vudova ndikukupetsaga syoni. Ungave utye ndigavilage pagati napagati ikilunga kyango ndikupetsage uluvasu ulunge ndikukupetsaga.

²⁴ Umwene uminza akahuma akatsikumbutsa uvańina akata: Ndidove kiki? Umwene uvańina akata: Dovaga untwe gwa Johani umwotsi.

²⁵ Akanila umwu ale unkuludeva akatsita: Ndidova ukuta umetsage lino vuvule-vule untwe gwa Johani gwa mwotsi pandelema.

²⁶ Pwu unkuludeva akasusuvala sitso. Lola ulwakuva ajiganikye ṅani nupwu vapulike avalitsaga nave isinu pwu akadwada ukubela.

²⁷ Pwu unkuludeva akansuṅa ujyunge uva ndudeva akata: Bihaga utole untwe gwa Johani.

²⁸ Vi akabiha akatsikuntema untwe nńumba jya vańololo. Akagega untwe gwa mwene pandelema akampa uminza. Umwene uminza akatsikumpa uvańina.

²⁹ Vwu vapulike avakongi va mwene, pwu vakatsikugupimba ummana gwa mwene vakatsikuguvika mbuguli.

³⁰ Pwu avapositili vakatsikwitsa ukwu avasuṅile vakalundamana upwu ale UJesu, vakambula tsoni itsu vavombile nitsu vatsovile.

³¹ Umwene akavavula akata: Tsukwi tuvuke tukijekelage ndukungu mwu tugatalukage padebe. Mańa valemilwe ukulya ulwakuva avanu avansumbilwe umwene vale vongosu.

³² Pwu vakalovoka mwiboti vakabiha ndukungu, mwu vakatsikijekela.

³³ Avene avanu va vongosu vakavavona vwu vikipaka vakavamańa ukwu vibiha, pwu vakahuma mbutsenge vwoni, vakagenda ija pamwambo ukubiha ukwu abihaga umwene. Vakatsisika vwu akanale ukusika umwene.

³⁴ Pwu UJesu vwu itoga pwu akavavona ikipuga ikivaha vuvule. Pwu ikisa kikambona mwitumbu ulwakuva vale ndiṅolo inzilandimi. Pwu akavavula inongwa ńongosu.

³⁵ Vavwene vwu vuhwe avakongi va mwene, pwu vakahegelela kwa Jesu vakata: Mwu mundukungu umu, vuhwe lino,

³⁶ uvatavulage avanu vabihage nduvanza mwoni mumbale nambutsenge mwoni vagulage isya kulya, mańa navagegili isinu.

³⁷ Umwene akanda akata: Muvapetsage uńe isya kulya. Avene vakata: Pange tubihage kukuvagulila isinu sya pandalama vamia vavili (200) pwu tuvapetsage isya kulya?

³⁸ Umwene akavavutsa akata: Ndi nisivanda silingi? Mbihage nkalole. Pwu vakatsilola vakata: Tuli nisivanda sihano nisomba ivili.

³⁹ Akata: Mbavule voni vatame pasi mbulilo mbulilo palińasi iligu.

⁴⁰ Pwu vakatama vakava ndukindi ndukindi. Uku imilevulu kitsigo ukwu imilevulu gihano.

⁴¹ Pwu UJesu akatola isivanda sihano isi nisomba ivili akalola kukyańa akasana. Pwu akameńulanya isivanda akavapa avakongi va mwene, vwu vakavapa avanu. Natsene isomba akavagavanya voni.

⁴² Vakalya vakiguta voni.

⁴³ Vakalundamanya nutumeńukila utwu vasigitse, tukadiga isiswiswi kitsigo nasivili natwene nutusomba utusigye.

⁴⁴ Avene avalitsaga isivanda vale pavaelipu vahano (5000) ukuvala va vagosi vene.

⁴⁵ Pwu UJesu akavakujisa avakongi va mwene akata: Mwipakilage ṅani mwiboti, mulongolage uńe ukulovoka ukubiha mu-Betisaita umwambo gulya. Ndivatavulage tango avanu.

⁴⁶ Vwu valekeṅine pwu akatoga pakidugala pakwisaja.

⁴⁷ Vwu vuhwe pwu iliboti lya vene likava pagati pańanza, Umwene akava mwene pamwambo.

⁴⁸ Akavalola akavona vilwa vikijumilitsa ukugendetsa iliboti, ulwakuva imepo jyahumile ukwu valotsitse. Umwene akavona pakavalilo kani umwu vivalila avilonda pakilo, akavakonga akakada vuvule pakyańa pańanza ukugenda. Akata ndilutile vuvule.

⁴⁹ Avene vwu vambwene ukugenda vuvule pakyańa pańanza, pwu vakata pange mwitsitsi gugenda, vakakuta.

⁵⁰ Mańa vambwene voni, vakadwada. Pwu umwene akatsovela ṅani akata: Mwidulusage vuvule mańa nene, kwu bako ukudwada.

⁵¹ Akipaka mwiboti lya vene. Pwu imepo jikanunala. Pwu vakagangaluka vakadega jilweli.

⁵² Mańa navaluvweni uluhala munsivanda silya ulwakuva inumbula tsa vene tsumile.

⁵³ Vwu valovwike pwu vakatsisika nkilunga kya mu-Genesaleti, mwu vakatsikikunda pakilovoko.

⁵⁴ Vwu vahumile mwiboti pwu avanu vakammańila ṅani umwene ukuta vi jujwa.

⁵⁵ Vakahamba mwoni umwu kitsungutye ikya mumwa, vakatsikuvapimba pavusaga voni avatamu vakavagega ukwu vapulike ukuta kwalikwo.

⁵⁶ Mwoni umwu agendaga mbutsenge nammaboma numwu vatsengile vuvule, mwoni vakavavika pambanza avatamu, vakantekelesa vakata: Twibatage ikilundwa kya mwene kumalunde. Voni avamwibataga vwu vakapona vuvule.