Maliko 5 - UTESITAMENTI UMPYA

¹ Pwu vakalovoka ińanza vakatsisika umwambo gulya nkilunga kya va-Galaseni.

² Avwene vwu ihuma mwiboti pwu akaganila numunu va mepo imbivi, uvi ahumaga mbuguli.

³ Vi avetsaga mumbuguli sikutsoni. Avalemile voni avanu vwu vita tunkunge nimińololo agilemile.

⁴ Mańa sikutsoni vatetsaga tunkunge nansyuma sya mmalunde nammińololo, umwene pwu agidumulanyage imińololo gya vene, isyene isyuma ańukage piganga. Pwu nakuli ujyunge uva kunkunga.

⁵ Sikutsoni vuvule napamuńi napakilo pwu akava mbuguli nansidugala akakuta akihoma namaganga.

⁶ Lino vwu ambwene UJesu kuvutale pwu akańilila akabiluka kumwene akakuta sitso akata:

⁷ Tuli vuki nune nuve vi Jesu vi nswambe va Nguluve unduti! Mańa nakwa Nguluve nditekelesa kwave ndita ulaṅinilaga.

⁸ Ulwakuva avwene UJesu ita: Vimepo vi mbivi huma mmunu uju.

⁹ Pwu UJesu akambutsa akata: Veve veni ilitavwa? Umwene akanda akata: Nene Kipuga ilitavwa lyane, mańa tuli vongosi.

¹⁰ Akatekelesa sitso kwa Jesu akata: Ulatuvingaga nkilunga iki.

¹¹ Pwugwale baho nundimo gwa ngube gukalya ilińasi pakidugala.

¹² Pwu imepo imbivi tsikatekelesa kumwene tsikata: Utupetsage ingube tsilya mwu twingilage.

¹³ Umwene UJesu akidika. Pwu imepo imbivi tsikahuma tsikatsikwingila mungube. Pwu ingube undimo gwoni vuvule tsikabiluka palugima tsikitaga muńanza tsoni umwu tsavelye vaelupu vavili (2000) tsikamilwa muńanza.

¹⁴ Avene avalume avadimaga ingube vakańila vakatsitsova mbutsenge mwoni namunduvanza tsitsitsi. Pwu avenevutsenge vakabiha kwilola itsu apelile.

¹⁵ Vakatsisika upwu ale UJesu, vakavona umunu uvi ale nimepo imbivi atamile vunnonu aswalile nimisabwa anotsivwe vuvule-nditsova uvi ale ni-Sipuga. Pwu vakadwada.

¹⁶ Avene avambwene vwu vakavavula itsa va mepo imbivi ukumponya umwene nitsa ngube vakata: Vwu agahile vuvule-vule atye atye.

¹⁷ Pwu avene vakantekelesa vakata: Ungahuma nkilunga kitu umu.

¹⁸ Avwene vwu ikipaka mwiboti, pwu uvamepo imbivi ulya akantekelesa akata: Ndibihage nuve nkuludeva.

¹⁹ Umwene UJesu akabela akata: Bako, bihaga, kuvutsenge vwako nakuvalu kololwo ukavavulage ukatetsage: Vwu agahile unkuludeva atye andililage ikisa.

²⁰ Pwu umwene akabiha nkilunga kya mu-Ndekapoli akatsikutsisimilitsa tsoni itsu ampelye UJesu akata atye atye. Pwu voni avanu vakadega.

²¹ UJesu vwu alovwike mwiboti vwu atsisike umwambo ugu, pwu vakalundamana upwu ale avanu va vongosu vwu ali pańanza umwene.

²² Pwu ujyunge umbaha va vene uva nńumba jya kwisajilamwo, uvi ale vi Jaili ilitavwa akahegelela kumwene. Vwu ambwene pwu akambilukila mmalunde

²³ akatekelesa sitso akata: Akalivango kali pakutsilika lino. Ukwi tubihage kwane ukambike ikivoko, atsukage ave mwumi.

²⁴ Umwene akabiha nave. Vakankonga navanu ikipuga ki kyongosu, vakakulugana nave.

²⁵ Pwu ale baho namwene undala ujyunge uvi ale nilimali imyaka kitsigo nagivili.

²⁶ Undala uju akuvilwe kuvatuṅanya vongosu agatye. Mwu amalile ikyuma kya mwene kyoni mbatuṅanya kitapona napadebe umwene, bako uvutamu vukongeletsa ukuvala.

²⁷ Vwu apulike itsa Jesu, pwu akagendela nkipuga kya vanu akahegelela kumbele akamwabasa ikilundwa kya mwene.

²⁸ Ulwakuva mwitumbu akata: Ndingave ndikumwabasaga imisabwa gya mwene vuvule pwu ndiponaga.

²⁹ Pwu likuma baho vuvule ilimali lya mwene. Akivona mumana ukuta aponile uvutamu vwa mwene.

³⁰ Pwu umwene UJesu akivonela baho amaka ga mwene ukuta gahumile agange mumana gwa mwene gabye kumunu. Pwu akavakilivukila avanu akavavutsa akata: Veni ańabasitse unsabwa apa?

³¹ Pwu avakongi va mwene vakata: Navwilola avanu ukukulugana vwita veni ańabasitse?

³² Umwene akalolesa akandonda uvi amwabasitse.

³³ Umwene undala uludwado lukambona akadetema ulwakuva ivwene ukupona. Pwu akatsibiluka kumwene akambula tsoni.

³⁴ Umwene UJesu akambula akata: Vi mwana vango lukuponitse lwu lwidiko lwako. Bihaga nulunotsehetso nuvutamu vwako vulavujaga vulakuvonaga.

³⁵ Vwu ali pakutsova ili pwu vakasika avange avahumile pambaha va vene va nńumba jya kwisajilamwo, vakambula vakata: Umwalivo aswe. Ulamwumilitsaga unkuludeva.

³⁶ Umwene UJesu akapulika vwu vikumbula, pwu akatsova nave umbaha va vene va nńumba jya kwisajilamwo akata: Uladwadaga vwidikage vuvule.

³⁷ Akavakilivula voni avita tunkonge twingile nave nńumba. Akatola vene ava-Petele nu-Jakobu nu-Johani ununave va Jakobu. Vwu akingila navo.

³⁸ Pwu vakingila nńumba jya mbaha va vene va nńumba jya kwisajilamwo. Mwu UJesu akavona ukuswanganya kwa kwene avalilaga ikililo, avakutaga sitso.

³⁹ Akingila akata: Ukuswanganya uku kwiki? Ikililo iki kiki? Mańa umwana naswili, bako agonile itulu. Avene pwu vakameka.

⁴⁰ Umwene akavaswima nńumba voni. Pwu akata nudadaje va mwana nuvańina akata navitsile nave vwu akingila navo umwu ale umwana.

⁴¹ Pwu akamwibata ikivoko umwana akata: Talita kumi, kwu kuta: Vi kahinza, ndikukuvula ndita, sisimuka.

⁴² Pwu akahinza kakasisimuka ṅani-ṅani vuvule kakagenda. Mańa imyaka gya mwene amalile kitsigo nagivili ukugona. Pwu voni vakagangaluka jilweli.

⁴³ Umwene akavabetsa sitso akata: Ndambulaga nujyunge umunu. Umwene umwana akata: Vi mumpetsage isinu alitsage.