Maliko 3 - UTESITAMENTI UMPYA

¹ Pwu akavuja akatsikwingila nńumba tsa kwisajilamwo. Mwu akambona umunu va kivoko ikyumile.

² Avene vakantegelela vakata tulole vwu amponitse pasabati. Ulwakuva avene vakata pwu tukutsivonelaga itsa kunswikila inongwa.

³ Umwene akatsova kumunu va kivoko ikyumile akata: Sisimukaga vwime pavuvalasu apa.

⁴ Akavavutsa akata: Kiki kinogye pasabati? nukuvomba innonu nukuvomba imbivi nukuponehetsa uvwumi nukubuda? Avene vakava mye vuvule.

⁵ Umwene akavatsalukila gukavipa. Uvutalamu vwa munumbula tsa vene vukampelela ulususuvalo. Pwu akambula unakivoko akata: Golosa ikivoko kyako. Umwene akakigolosa. Pwu kikanduka ikivoko kya mwene kikava ndikinine.

⁶ Pwu avapalisai vakahumila ṅani panzi vakatsitsovana navakivaga va Heloti vakidinana itsa kuta tumbudage.

⁷ Pwu nu-Jesu navakongi va mwene vakabiha pańanza. Avene avanu va mu-Galilai vakankonga vongosu sitso.

⁸ Navene avapulike itsu apelaga voni vakabiha upwu ale, vakahuma namu-jutai namu-Jelusalemu namu-Itumai namumwambo gulya gwa Jolitani nansilunga sya mu-Tili namu-Sitoni ikipuga ikivaha sitso.

⁹ Umwene akatsova navakongi va mwene akata: Mundondelage akaboti, ulwakuva avanu ikipuga kyoni vańańamike umwene.

¹⁰ Mańa avaponyaga va vongosu. Pwu vakańilila namumana voni avale nuvutamu vakata tumwabase.

¹¹ Natsene imepo imbivi vwu tsimbwene pwu tsikabiluka pasi tsikakuta tsikata: Veve nswambe va Nguluve.

¹² Umwene akatsitanila sitso akata: Ndatsovaga!

¹³ Pwu akatoga pakidugala akavilanga uvwu anogilwe jujwa. Avene vakabiha kumwene.

¹⁴ Akavimika kitsigo navavili avakuva nave sikutsoni akata va kuvasuṅa nankutsova inongwa,

¹⁵ akata vwu vivetsaga namaka ga kuhumya imepo imbivi.

¹⁶ Akavimika akata nu-Simoni, vi akampa ili Petele ilitavwa,

¹⁷ nu-Jakobu uńa-Sebetai nu-Johani ununa va Jakobu, vwu akavapa ili Bwaneligesi ilitavwa ilya kuvatsova ukuva vwu vańanzasi,

¹⁸ nu-Andileja nu-Pilipo nu-Balitolomai nu-Matai nu-Toma nu-Jakobu una-Alipai nu Tatai nu-Simoni va mu-Kana

¹⁹ nu-Juta va mu-Kalyoti uvi amendamaga ulwambele.

²⁰ Pwu akingila nńumba, Pwu vakavuja vakalundamana avanu ikipuga vuvule, vwu navakapavona napakulya isinu.

²¹ Vwu vapulike tsitsitsi avalukololwe, pwu vakahuma panzi vakata tumwibate ulwakuva vakata lumbwene ulukwale.

²² Avene avamańakalata avahumile mu-Jelulsalemu vwu vakata: Ali nu-Belisibuli, Natsene imepo imbivi upwu ikutsihumya ikutsihumihitsa mumbaha va mepo imbivi.

²³ Umwene UJesu akavalundamanya akavavula ikihwanihitso akatsova akata: USetano ujyunge vi ate amumyage ndeti USetano unine?

²⁴ Ikilunga kingave kihambuṅine kikyo kyene, pwu vwu nakivakwo.

²⁵ Najyene nińumba jingave jihambuṅine jijyo jyene, pwu vwu najivakwo.

²⁶ Namwene nu-Setano angave ihambukye, angave ihambuṅinie mwene, pwu vwu nivakwo, bako pwu vwu imalile mwene vuvule.

²⁷ Nikwingila nujyunge nńumba jya ńangusu nkugoma isyuma sya mwene vwu tango nankungili umwenenajyo. Lola angave ankungye ṅani, pwu agomage isya nńumba jya mwene.

²⁸ Jilweli-lweli ndikuvavula ndita: Tsoni inonga itsu vitula avanu visyikilivwagwa.

²⁹ Mańa uvi andukile amadusi UMepo umbalatse, vi nalavuvone lusiku uvusyikilo, bako inongwa jya mwene jikumbadamaga sikutsoni vuvule.

³⁰ Tsu akavavula ulwakuva vatetsaga ali nimepo imbivi.

³¹ Pwu nuvańina navalukololwe vakahegelela vakima mumbele mbanu vakansuṅa uva kumwilanga umwene.

³² Avanu vambikile pagati pakutama nave. Vwu vakambula vakata: Uvańoko navalukololwo vali apa vita tundole uve.

³³ Umwene akanda akata: Ujyuva vi veni, avalukololwango vwu valiku?

³⁴ Pwu akalolesa akavalola avanu avańengile pakutama akata: Muvavwene ava? Vi jyuva, vwu valukololwango ava.

³⁵ Mańa uvi ivomba itsu anogilwe Unguluve, vi mama jujwa, vi matsa vango, vi jyuva jujwa.