Maliko 16 - UTESITAMENTI UMPYA

¹ Vwu alutile usabati pwu va-Malija va mu-Magatala nu-Malija uvańina va Jakobu nu-Salome vakatsigula imituguva vakata: Tutsikumbakaga.

² Vakalava pa litsuva ililongotsi lya juma vwu likanale ukuhuma ilitsuva.

³ Vakavutsanya munzila vakata: Veni ikutuvusihitsaga iliganga pandyango gwa vuguli?

⁴ Vwu vita tulole pwu vakavona iliganga libilwike,–ulwakuva lyale livaha sitso.

⁵ Pwu vakingila mbuguli, vakavona undume atamile kukivoko ikyandyo, iswikile ugwańingilitsa untale umbalasu. Pwu vakakeńemuka.

⁶ Umwene akata: Kwu bako ukukeńemuka, Mukundonda ju Jesu va mu-Nasaleti uvi atovelilwe pakidamiṅanye. Mańa atsukile namuli umu pwu apa vangonitse apa.

⁷ Mbihage lino nkavavule avakongi va mwene naju Petele nkatetsage: Ilongolela ukubiha mu-Galilai, Mwu ndatsikumbonaga nduvwu avavulye ṅani,

⁸ Pwu vakahuma mbuguli, vakańila ulwakuva vadwadaga nuludwado lwongosu luvavwene, Vakabela nukumbula ujyunge umunu ulwakuva vadwadaga.

⁹ Umwene UJesu vwu atsukile palitsuva ililongotsi lya juma pavusiku, pwu akalongola ukumbonekela UMalija va mu-Magatala uvi amumitse imepo imbivi lekelakupamato.

¹⁰ Pwu umwene UMalija akabiha akatsikuvavula avale nave sikutsoni, ulwakuva vwu vasusuvye valilaga.

¹¹ Vwu ikuvavula ita: Mwumi ndimbwene pwu avene navatsivweni.

¹² Ulwambele akavona vigenda inzila vavili vibiha nkilunga, pwu navene akavavonekela. Akava ndujyunge vuvule vwu ikuvavonekela.

¹³ Pwu vakabiha navene kukuvavula avajavo. Natsene nitsa vene navatsivweni navene.

¹⁴ Ulwambele vwu vatamile pakulya avali kitsigo nampamato pwu akavavonekela akavatanila iṅani tsa vene nuvudulusu vwa numbula ulwakuva navidike kuvene avambwene ukutsuka.

¹⁵ Akavavula akata: Mbihage nkilunga kyoni nkasivule isipelwa syoni inongwa innonu.

¹⁶ Uvi ita nukwidika ita nukwotsivwa vi alapona, mańa uvi nikwidika vi alahigwa.

¹⁷ Isyene isipelwa isikuvakongaga avene vangave vidike syu isi: Imepo imbivi valatsihumihitsaga mwitavwa lyane, valatsovela nindimi imya.

¹⁸ Nińandalwe valibata vuvule. Nupwu vangave vanwe isinge isya kuvatega nasilavagahe kinu. Avatamu valavavika amavoko pwu vipona.

¹⁹ Vwu atsovile unkuludeva tsitsitsi navene pwu akatoga kukyańa, kwu atamile kukivoko ikyandyo kya Nguluve.

²⁰ Avene pwu vakahuma baho vakatsitsova mwoni-mwoni inongwa. Unkuludeva akavatanga pambombo tsa vene, ilimeńu akalipela amaka nsipelwa isyavakongaga. Ameni.