Maliko 15 - UTESITAMENTI UMPYA

¹ Pwu vakalava pavusiku vakalundamana avateketsi avavaha navańivaha avenekivumbuko nululundamano lwoni lwa vatsovanongwa vakatsovana. Pwu vakankunga vakangega vakatsikumilikila UPilate.

² Pwu UPilate akambutsa akata: Nda veve nkuludeva va va-Juta? Umwene akanda akata: Nduvwu vwitsova.

³ Pwu avateketsi avavaha vakambulila ńongosu vuvule.

⁴ Pwu UPilate akavuja akambutsa akata: Nda navukwanda ilinge? Nda navupulika itsu vikukuvulila?

⁵ Umwene UJesu akabela nukwanda ilinge. Pwu namwene UPilate akadega.

⁶ Sikutsoni palitsuva ilivalatse akava nulwiho lwa kuvavopolela mpamato uva muńololo, uvi vamalaga avene.

⁷ Lino ale muńololo ujyunge uvi vatetsaga vi Balaba ilitavwa. Vi vamwibite lunine navo avakilivuṅanaga uvutsenge avabudile numunu vwu vakilivuṅine uvutsenge.

⁸ Pwu avanu ikipuga kyoni vakatoga ukubiha kwa Pilate vakatsita: Ungatuvopolelaga ujyunge umunu lino nduvwu vukutuvopolela sikutsoni.

⁹ Umwene UPilate akanda akata: Pange mutye ikutuvopolelaga unkuludeva va va-Juta.

¹⁰ Ulwakuva avamańile avateketsi avavaha ukuta kavasuṅile akavini vuvule upwu vangegile kumwene.

¹¹ Avene avateketsi avavaha vavahambulye ṅani avanu vatye nkatetsage: Utuvopolelage ju Balaba.

¹² Umwene UPilate akavuja akavavutsa akata: Ndigahe ndeti nunkuludeva va va-Juta? Mumbulage.

¹³ Pwu avene vakavuja vakaswanganya vakata: Untovelelage pakidamiṅanye.

¹⁴ Umwene UPilate akata: Atulile inongwa ṅi? Avene pwu vakongeletsa sitso ukuswanganya vakata: Untovelelage pakidamiṅanye.

¹⁵ Umwene UPilate akata ndivakelage avanu, pwu akambopola ju Balaba. Umwene UJesu akavapa ukuta vantovage nisikoti, vantovelelage pakidamiṅanye.

¹⁶ Pwu avasikali vakabiha nave nńumba jya mbembenuka vakatsikungongolela ikipuga kyoni kya vajavo.

¹⁷ Vakanswika ugwańingilitsa unduṅu, vakahona nuludiṅulilo lwa mitwińo lwu vakambika pantwe.

¹⁸ Vakampembetsa vakata: Tukukupembetsa vi nkuludeva va va-Juta.

¹⁹ Vakantova nulugugu pantwe, vakambehela namati, vakasugama pasi vakabiluka kumwene.

²⁰ Vwu vamekile vuvule-vule pwu vakansula ugwańingilitsa unduṅu gulya, vakavuja vakanswika imisabwa gya mwene. Pwu vakabiha nave pakuntovelela pakidamiṅanye.

²¹ Vakamwibata ujyunge umunu uvi ilitavwa lya mwene ale vi Simoni va mu-Kilene, udadaje va va-Alekandeli nu-Lupu, uvi ahumile kukilimila atye ndilute vuvule. Vi vakamwumilitsa ukuta ampimbile ikidamiṅanye kya mwene.

²² Vakatsisika nave upwu vita pwu pa-Goligata, kwu kuta pwu paliṅala lyantwe.

²³ Vakata tuńwesage namasilu agahangile nuntuguva gwa mila. Umwene akabela.

²⁴ Vwu vantovelye pakidamiṅanye, pwu vakalagulila pakugavana imisabwa gya mwene ukuta ujyunge atole akanu aka ujyunge akanu aka.

²⁵ Ukwene ukuntovelela pakidamiṅanye kwu vakantovelela pakavalilo ka datu.

²⁶ Natsene inongwa itsu vambudilaga vakatsiviga vakatsivika pakyańa vakata: UJU VI VI NKULUDEVA VA VA-JUTA.

²⁷ Vakavatovelela lunine nave pasidamiṅanye sya vene navabudi vavili. Ujyunge vakambika kukivoko kya mwene ikyandyo, ujyunge kukivoko kya ṅigi, umwene akava pagati.

²⁸ Pwu kwu kwitsa tsitsile itsa kalata uvi atetsaga: Vamanzitse navatulanongwa.

²⁹ Mańa voni avalutaga vakamelula vakatiga nimitwe gya vene vakata: O vi ulumańile ukumamula ińumba imbalatse nukutsenga imya amatsuva gadatu,

³⁰ uli nakiki ukwipoka vimwene, uli nakiki ukwika pakidamiṅanye?

³¹ Navene avateketsi avavaha navamańakalata vuvule-vule vakameka vakata: Avange avapokaga sikutsoni, ali nakiki ukwipoka mwene lino?

³² Ali nakiki ukwika pakidamiṅanye nuvwe tudegage twidikage humbe vi Kilisiti, humbe vi nkuludeva va avańa-Isilaeli jilweli. Navene avatovelilwe lunine nave pasidamiṅanye sya vene navene vakanduka sitso.

³³ Pwu pakavalilo ka ntanato jikagwa iṅisi ikilunga kyoni jikatsisika pakavalilo ka budikakupamato.

³⁴ Pakavalilo ka budikakupamato pwu UJesu akakuta ilimeńu ilivaha akata: Eloi, Eloi lama asabakatani, kwu kuta: Vi Nguluve vango, vi Nguluve vango undekile kiki?

³⁵ Avange avale baho vwu vipulika ilimeńu ili pwu vakata ikumwilanga Elija.

³⁶ Pwu ujyunge akanila ṅani-ṅani akatola akasabwa akatsaba mmasilu, akingitsa ndugugu akańwesa, Akata: Leka, tulole vwu itsile Elija kukumpoka.

³⁷ Umwene UJesu akavuja akakuta ilimeńu ilivaha pwu akaluta pakutsilika.

³⁸ Pwu nilivalika ilyu vapindile nńumba imbalatse likalenduka likahuma pakyańa likatsisika pasi gakipela gavili.

³⁹ Umwene undongotsi va vasikali uvi imile baho, uvi andolaga, vwu ambwene ukukuta vuvule-vule vwu iswa, pwu akata: Jilweli ale nswambe va Nguluve umunu uju.

⁴⁰ Pwu vale baho navadala, vwu vakalola pavutale. Vali nu-Malija va mu Magatala, nu-Malija uvańina va Jakobu undebe nu-Jose nu-Salome.

⁴¹ Vwu avankongaga vwu ali mu-Galilai avambombelaga nimbombo, navange vuvule va vongosu avatogile nave vwibiha mu-Jelusalemu.

⁴² Pakimihe palitsuva lya kwinotsehetsa pasabati,

⁴³ pwu UJosepu va mu-Alimatai uńivaha umwimikivwa uvi namwene alupulikilaga uludeva lwa Nguluve, akidulusa vuvule akingila pa-Pilate akatsidova ummana gwa Jesu.

⁴⁴ Umwene UPilate akadega vwu ita aswe katale. Pwu akamwilanga undongotsi va vasikali akambutsa akata: Ndaswe katale?

⁴⁵ Undongotsi va vasikali vwu ambulile, pwu akampa ummana UJosepu.

⁴⁶ Umwene akatsigula unsabwa umbalasu akantumbula pakidamiṅanye akambinila munsabwa ugu akatsikumbika mbuguli uvwu vapunzile ndunalavwe, akabilusa iliganga akalivika pandyango gwa vuguli.

⁴⁷ Avene va-Malija va mu-Magatala nu-Malija uvańina va Jose vakalola umwu vambikaga.