Maliko 14 - UTESITAMENTI UMPYA

¹ Lola gasigye amatsuva gavili ukwitsa nu-Pasa namatsuva amavalatse ga sivanda isitsilansabe. Pwu avateketsi avavaha navamańakalata vakalonda itsa kumwibata nitsa kumbuda, vakata mańa uluhala luvekwo.

² Vakata: Mańa tulamwibataga pamatsuva amavalatse, mańa pwu vikutuhambukila avanu.

³ Avwene vwu ali mu-Betanija nńumba jya Simoni uńabuba vwu ali pakulya isinu, pwu akahegelela kumwene undala ujyunge uvi agegile ikibake kya mono inalamu sitso inzilakuhanga nakanu akange, akabuda ikibake akandudilila pantwe.

⁴ Pwu avange avale baho gukavipa, vakavulana vakata: Itaga tsiki imono vuvule-vule?

⁵ Mańa vangave vagutsaga imono itsi pwu ndili vakavile indalama ndili tsilutile napavamia vadatu (300) uvwongosu, tsu ndili vavagavinye avagatsu. Pwu vakantanila undala.

⁶ Umwene UJesu akata: Mundekage undala uju, mukumpelela kiki ulususuvalo. Mańa imbombo itsu ambombye une nnonu.

⁷ Ulwakuva avagatsu vwu ndi navo sikutsoni. Ngave mwatetsaga tuvapetsage isinnonu, sikutsoni navijaga. Lola une nandiva mwańe umwu sikutsoni.

⁸ Avombile anotsitse umwene. Atengulye ṅani ambakye ṅani imono tsa kunsilila une.

⁹ Jilweli-lweli ndikuvavula ndita: Mwoni umwu inongwa innonu tsitsitsi tsilapulikika ikilunga kyoni, mwu tsilatsovelwa lunine natsene nitsu avombile undala uju, tsilava tsa kunkumbuhitsa jujwa.

¹⁰ Pwu UJuta va mu-Kalyoti ujyunge uva mbakitsigo navavili akabiha kuvateketsi avavaha vakatsitsovana itsa kuvahilikila UJesu.

¹¹ Avene vwu vapulike tsitsitsi pwu vakahekela vakata: E tukukuhombaga indalama. Pwu umwene akalonda ukuvahilikila pavunnonu.

¹² Palitsuva ililongotsi lya sivanda isitsilansabe ilyu vihinzila akakolo ka Pasa pwu vakambutsa avakongi va mwene vakata: Vwatye tukagahage ndaku pavulilo uve akakolo ka Pasa?

¹³ Pwu umwene akavasuṅa avakongi va mwene vavili akata: Mbihage mbutsenge mulya mwu mutsikwaganilaga numunu uvi apimbile inzilo jya magasi vi mukankongage.

¹⁴ Mukingilage nave umwu ikwingila umwene. Mwu nkatsovage nave umwene ńumba nkatetsage: Umańisi atye: Ińumba jya kulilamwo akakolo ka Pasa nune navakongi vango jyu jiliku?

¹⁵ Pwu ndavonaga umwene ikuvavonya ińumba imbaha jya kukano, vatandike nisitamilo vagahile. Mwu nkagahe isinu sya kulya uvwe.

¹⁶ Pwu avakongi va mwene vakabiha vakatsisika mbutsenge vakatsivona nduvwu avavulile Pwa vakagaha isinu sya Pasa.

¹⁷ Vwu vuhwe pakimihe pwu akatsikwingila mumwa navakongi va mwene kitsigo navavili.

¹⁸ Vwu vatamile pakulya pwu UJesu akavavula akata: Jilweli-lweli ndikuvavula ndita: Umwu mbelye ńi twilya twivoni lino apa ujyunge alańendama,

¹⁹ Pwu vakasusuvala sitso vakambutsa mpamato-mpamato vakata: Nda ndive une?

²⁰ Umwene akavavula akata: Umwu mbelye kitsigo navavili, vi uvi tutsabanya nave nune nkihava pakulya.

²¹ Umwene Uńamunu vi viki, vi iluta vwu lilyo likuntsova mwa kalata. Uli viki lweli vi munu vi vukumendama. Pavetsaga pannonu kitaholwa lusiku vi munu uve!

²² Vwu ali pakulya pwu UJesu akatola ikivanda akasana akameńulanya akavapa akata: Koti ugu gwu mańa gwango ugu.

²³ Akata nikinwelo akatola akasana nakyene akavapa, voni vakanwa.

²⁴ Akavavula akata: Gwu nkisa gwango gwa lwidiṅano ugu, ugukuvadudikilaga va vongosu.

²⁵ Jilweli-lweli ndikuvavula ndita: Ndihumaga ilelo iji nandilavuje ukuńwa uvwa seke tsa masilu, nditsisikaga palitsuva ilyu ndilańwetsaga uvupya vuvule ndudeva lwa Nguluve.

²⁶ Pwu vakimba ulwa kunginya Unguluve pwu vakahuma panzi vakabiha kukidugala kya mono.

²⁷ Pwu UJesu akavavula akata: Ikilo iji ńivoni ndatetsaga ipelile va kutwambutsa une. Ulwakuva livigilwe mwa kalata ilita: Ndilantovaga undimi, pwu iṅolo tsa ndimo tsihambage.

²⁸ Vwu nditsukile pwu ndilalongola mbulongolo ukubiha mu-Galilai.

²⁹ Umwene UPetele akamwanda akata: Nupwu voni vita ipelile va kutwambutsa uvwe, bako nandilatsove ipelile va kuńambutsa une uve.

³⁰ Akanda UJesu akata: Jilweli-lweli ndikukuvula ndita: Ikilo iji vwu iṅongove jikanale ukuvika kavili, pwu vwu vwibelile kadatu kwane vwu utye nandimańili une.

³¹ Umwene pwu akalutilila pakutsova sitso akata: Napene nupwu tungave twavetsaga kuswa twivoni nuve, napene nandilibele kwave ukuta nandimańili uve. Voni navanine vakatsova ili.

³² Pwu vakatsisika paluvanza ulunge ulwu vatetsaga mu-Getisemane ilitavwa. Umwene akatsova navakongi va mwene akata: Mutamage apa, uńe ndisajage tango ukwu.

³³ Akatola va-Petele nu-Jakobu nu-Johani vwu akaluta navo. Pwu akadetema nukuva nkyańa vuvule inumbula.

³⁴ Pwu akavavula akata: Umwuja gwango ukususuvala ulususuvalo lwa kwoni nakwoni vuvule pwu nditye ndili pakuswa. Mbetsage apa, mbetsage miho.

³⁵ Umwene akaluta padebe akatsibiluka pasi akisaja akata: Pangave pavonekaga pakuluta kwane akavalilo aka.

³⁶ Akata: Aba, kwu kuta vi dada, nasikukulema isinge, kingalutaga ikinwelo iki pane. Mańa nene viki itsu ndinogilwe une, ńage jyuve, tsitsu unogilwe uve.

³⁷ Akitsa akavona vagonile itulu. Pwu akatsova nu-Petele akata: Simoni, O ugonelye itulu. Napene napakavalilo kapamato kene pakulemile ukuva miho uve?

³⁸ Mbetsage miho mwisaje ulugelo ukuta lulavavonaga. Ugwene umwuja gwu gwidike, ugwene gu mmana, mańa gwu ndekedeke.

³⁹ Akavuja akabiha akisaja, akatsova ga mameńu ugwu atsovaga ululongotsi.

⁴⁰ Vwu avujile itsile pwu akavona vavujile vagonelye itulu, ulwakuva itulu javalemile vuvule, natsene itsu vamwandaga vakasinzila vuvule.

⁴¹ Pwu akavuja akitsa ulwa datu akatsova navo akata: Mugonage mugatalukage ulunge lusiku. Lino vuvule akavalilo kitsile. Lola Uńamunu viva pakuvapa mmavoko avatulanongwa.

⁴² Mwimage tugendage, itsile uvi ikuńendama.

⁴³ Pwu ṅani-ṅani vuvule vwu ali pakutsova amameńu aga, pwu itsile UJuta va mu-Kalyoti uva kitsigo navavili, agegile navanu ikipuga vuvule, vwu vibite ninuvwo nisonzo, vahumile kuvateketsi avavaha nakuvamańakalata nakuvańivaha avenekivumbuko.

⁴⁴ Umwene uvi amendamaga avavulile ikimańilo kya kumańilamwo ukuta vi uju atye uvi ndikuntsiba kundomo vwu vi jujwa vi nkamwibatage nkalute nave, mbandikage alakimbilaga.

⁴⁵ Vwu asike UJuta pwu akańilila mumana UJesu akata: Vi mańisi vango! Pwu akantsiba kundomo.

⁴⁶ Pwu avene vakamwibata UJesu.

⁴⁷ Avene avimile baho ujyunge akaswekula ulwuvo lwa mwene akamenga unkivaga va nteketsi umbaha, akampyatula imbulukutu mamato,

⁴⁸ Pwu UJesu akatsova navo akata: Upwu mwitsile kukuńibata une pwu mutye tutsikumwibata umitsi, mwibite nińuvwu nisonzo.

⁴⁹ Sikutsoni upwu twavetsaga twi voni mwa Tempeli upwu ndavavulaga inongwa sikutsoni, pwu namuńibiti. Lola vwu tsigahilwe vuvule-vule ukwitsa itsili mwa kalata.

⁵⁰ Pwu vakandekela voni avakongi va mwene vakakimbila.

⁵¹ Pwu ale ujyunge undume uvi ankongaga, vi aswalile ikilundwa kyene kya nsabwa umbalasu mumana, vi vakamwibata.

⁵² Pwu umwene akavalekela ikilundwa akakimbila vuvule.

⁵³ Umwene UJesu vakangega vakabiha nave panteketsi umbaha ulwakuva pwu valundamine avateketsi avavaha navańivaha avenekivumbuko navamańakalata.

⁵⁴ Umwene UPetele vi akakonga pavutale akatsisika navo nńumba jya nteketsi umbaha, pwu akatsitama navakivaga pakwota umwoto.

⁵⁵ Avene avateketsi avavaha ululundamano lwoni lwa vatsovanongwa vwu vakalonda itsinge itsa kundema UJesu itsa kumbudila, mańa vakalemwa.

⁵⁶ Vakavapwo avakuntsova itsa vunwasi, vakavona itsu vikuntsova natsikwaganila vunnonu.

⁵⁷ Pwu vakima avange vakantsova itsa vunwasi vakata:

⁵⁸ Umunu uju tukambona ita ndilumanile ukumamula ińumba imbalatse jya Nguluve iji, ijyu vatsengile namavoko, ndivomba amatsuva gadatu vuvule pakutsenga ijyinge inzilakutsengivwa namavoko.

⁵⁹ Lola natsene natsitsitsi vwu vikuntsova vakavona natsikwaganila.

⁶⁰ Pwu akasisimuka unteketsi umbaha akima pavuvalasu akambutsa UJesu akata: Tsoni itsu vikukutsova ava, nda navukwanda ilinge uve?

⁶¹ Umwene akava mye vuvule akaleka nukwanda nilinge. Pwu unteketsi umbaha akavuja akambutsa akata: Nda veve vi Kilisiti, vi nswambe va Mweneluginyo?

⁶² Umwene UJesu akata: Ena nene. Nukumbona ndambonaga Uńamunu vwu atamile kukivoko kya Mwenemaka, vwu ikwitsa mmavingo ga kukyańa.

⁶³ Pwu unteketsi umbaha akalendulanya imisabwa gya mwene akata: Pwu tuvalondage viki avange avakuntsova?

⁶⁴ Mpulike nuńe vwu ikunduka amadusi Unguluve. Ndeti uńe? Pwu voni vakahiga vakata: Vi va kubudwa.

⁶⁵ Pwu avange vakambehela namati kumiho vakata nukungubiṅanya kumiho. Pwu vangumbage niṅonde vatetsage: Lagaga. Navene navakivaga vakantova namapi.

⁶⁶ Umwene UPetele vwu atamile nduvanza pwu ujyunge umunu va nteketsi umbaha undala akabiha upwu ale

⁶⁷ akavona UPetele ikwota umwoto, pwu akandola akata: Nuve vwavetsaga nu-Jesu va mu-Nasaleti ulya.

⁶⁸ Umwene UPetele akabela akata: Bako nanditsimańili itsu vwitsova nukutsivona nanditsivweni une. Vwu ita ndihume panzi vwu ali nńumba jya pandyango, pwu jikavika inongove,

⁶⁹ Umwene undala vwu ambwene, pwu akavuja akavavula avale baho akata: Umunu uju vwu vanine valya.

⁷⁰ Umwene UPetele akavuja akabela. Vwu valindile padebe, pwu vakavuja avale baho vakatsova nave UPetele vakata: Jilweli vwu vanino valya. Mańa uli va mu-Galilai.

⁷¹ Pwu umwene akikotola akata nukujiganika akata: Une nandimmańili lusiku umunu uvi mukuntsova.

⁷² Pwu jikavika ulwa vili inongove. Pwu UPetele akakumbuhitsa ilimeńu ilyu UJesu ambulile ilyu atye: vwu jikanale ukuvika kavili inongove vwu vwibelile kadatu kwane vwu utye nandimmańili. Pwu akisagila akalila.