Maliko 13 - UTESITAMENTI UMPYA

¹ Avwene vwu ihuma mwa Tempeli pwu ujyunge unkongi va mwene akata: Vi mańisi, amaganga aga nińumba iji uvunnonu!

² Umwene UJesu akanda akata: Nda ujivwene ińumba imbaha iji? Nilinge iliganga nalilalekwe piganga ilinine ilyu nalilamamulwe.

³ Vwu atsitamile pakidugala kya mono vwu ilola pa-Tempeli, pwu vakambutsa va-Petele nu-Jakobu nu-Johani nu-Andileja vwu vijekye nave vakata:

⁴ Ungatuvulaga, ilitsuva lya kwitsila tsitsitsi lyu liliku? Nikimańilo kya kumańilapwo ukuta pwu tsitsile tsoni tsisilile kyu kiliku?

⁵ Pwu akanda akata: Mbandikage mulole nujyunge alavatekaga.

⁶ Mańa valitsaga va vongosu valagendelaga mwitavwa lyane valatetsaga nene Kilisiti. Valavajatsa va vongosu.

⁷ Lungave lusiku ngave mupulike niligoha ningolo tsa ligoha, pwu ndakeńemukaga, mańa tsu upita tsilongolage ukuvoneka tsitsitsi, itsene itsa kuvusililo vwu tsikanale tango.

⁸ Mańa ikivumbuko ikinge kya vanu kilakihambukilaga ikinine, nunkuludeva va kilunga kipamato alamambukilaga unkuludeva unine va kilunga ikinge, nikilunga kilalindima pongosu nsilunga nsilunga ninzala jilagwa.

⁹ Tsoni tsitsitsi vwu vutengulilo vwa vusumbe. Pwu mbandikage, mańa valavavikilaga pavuhigilo inongwa tsa vene nanńumba tsa vene tsa kwisajilamwo ndatovwagwa, valavahilika nakuvavaha nakuvakuludeva ulwakuva ndi nilitavwa lyane. Tsu tsa kumańilamwo avene.

¹⁰ Inongwa innonu lweli tsu upita tango vapulikage voni avapanzi.

¹¹ Vangave vikuvakunga vikuvagega kuvahiganongwa, pwu ndisagilaga ṅani ukuta tutsovage kiki, bako itsu ngave mbwene avapye jujwa pakavalilo aka, pwu mutsovage tsitso vuvule. Ulwakuva nandatsove une, bako alatsova jujwa ju Mepo umbalatse.

¹² Navene navanamunu valalutasaga vene ukugegana ukwu vibudwa, namwene udadaje alangegaga uku umwana va mwene, navene navana valavahambukilaga avahotsi va vene valavabudaga.

¹³ Voni avanu valavasulaga uńe ulwakuva ndi nilitavwa lyane. Mańa uvi isindamala itsisika nakuvusililo vi iponaga.

¹⁴ Lungave lusiku ngave mbwene pavuvalatse vapalaṅitsivwe, vimike itsili mwiko umwu natsinogili,–uvi ikutsivona pakalata tsitsitsi vi alolage vunnonu,–pwu vakańilage nsidugala voni avali mu-Jutai.

¹⁵ Uvi ali pakyańa pańumba vi alikaga nkutola ikinge nńumba jya mwene.

¹⁶ Uvi ali pakulima nkilimila kya mwene, vi alakilivukaga kumbele nkutola ikilundwa kya mwene.

¹⁷ Muli viki ńi vadala pamwaka ugu ńi vańimali ńi mukwosa avana!

¹⁸ Mwisajage lweli itsa kukimbilila uńe ukuta tsilavitsilaga nammakya.

¹⁹ Uvusumbe vwa litsuva lilyo vulava vwongosu uvutavakwo nuvunine vuvule umwu atengulye Unguluve ukupela ikilunga ukutsisika nakulino kunu, uvutsilakuvakwo nuvunine nakumbele.

²⁰ Angave Unguluve alekaga ukugadumulanya amatsuva aga pwu ndili nakuli ujyunge umunu uvi ipona. Lola alagadumulanyaga amatsuva aga umwene, avahalilwe va mwene uvwu avahalye ṅani ukuta vaponage.

²¹ Ilitsuva lilyo ngave mbwene ujyunge ikuvavula ita: Lola UKilisiti uju kunu pange ulya uku, pwu ndidikaga.

²² Mańa valasisimuka nava-Kilisiti va vunwasi navańamalago va vunwasi valapelaga nisidego nisipelwa isya kuvagetsa ukuvajatsa navahalilwe.

²³ Mbandikage lweli. Lola nditengulye ṅani ukuvavula.

²⁴ Vwu vahumile pakukuvilwa uvukuvilwa vwa mwaka ugu avanu, pwu ilitsuva lilabosola numwetsi gulaleka ukuvala,

²⁵ natsene ninondwe tsilatumbukaga kukyańa, navene navamaka avali kukyańa valajunganikaga.

²⁶ Pwu valambonaga Uńamunu ukwitsila mmavingo vwu ikwitsa namaka nuvudwadwa vwu vwongosu.

²⁷ Pwu alavasuṅaga avasuṅwa va mwene, vwu valavalundamanyaga avahalwa va mwene, valahumaga navo kumakuluguta goni gwu gani, voni vuvule ukuhuma kuluvasu ulunge lwa pasi ukutsipela kuluvasu lwa kuvutandatse.

²⁸ Mutolele munkuju ikihwanihitso. Upwu amapagika ga gwene mwivona gwitoga uvwigu galembile amani, pwu mumańilaga baho ukuta iminga jihegelye jili mbwipi.

²⁹ Vuvulevule nuńe ngave mutsivwene tsoni tsitsitsi ukwitsa, pwu mumańilage baho ukuta itsile ali pandyango.

³⁰ Jilweli-lweli ndikuvavula ndita: Avanu va lino ava navalajage voni vwu natsipelilwi tango tsoni tsitsitsi.

³¹ Nikya kukyańa nikya pasi ikilunga syu silajagaga, amameńu gango gwu nagalajage.

³² Nalyene ilitsuva lilya nakavalilo kalya kwu nujyunge umunu nakamańili, navene navasuṅwa va kukyańa navakamańili, namwene nunswambe nakamańili, akamańile ju dada mwene.

³³ Mbandikage mbetsage miho mańa namugumańili umwaka.

³⁴ Ulwakuva tsigahile nditsa munu uvi iva pakugenda inzila, uvi ihuma nńumba jya mwene, uvi ikuvavika avakivaga va mwene ikuvapa imbombo tsa vene, uju itsa mwene, uju itsa mwene, namwene undolelandyango ikundagila sitso ita uve miho.

³⁵ Vwu mugahage vuvule-vule nuńe, mańa namumbweni umwu igelelaga umweneńumba ukwitsa, ukuta pange igelelaga pamihe, pange pakilo pagati, pange paṅongove vwu jivika, pange pavusiku.

³⁶ Ndita mbetsage miho nuńe, mańa pange mukeńemuke nahavili ukwitsa, avambulinye vuvule vwu ndi nitulu.

³⁷ Itsene itsu ndikuvavula une, tsu ndikuvavula voni vuvule ndita: Mbetsage miho.