Maliko 12 - UTESITAMENTI UMPYA

¹ Pwu akavavula ikihwanihitso akata: Kwale ujyunge umunu, vi akavyala ungunda gwa mwene gwa masilu, akata nuluvigo aka vigila, akata nińumba jya kukamilamwo amasilu akajava, akata nulukonze lwa kugulolela akatsenga, akavavikamwu navanu va kuvombela, pwu akabiha kukilunga ikinge.

² Vwu gwitsile umwaka gwa masilu, pwu akansuṅa unkivaga uva kuntolela itsinge iseke tsa masilu kuvene avavombelaga.

³ Avene vakamwibata vakantova vakankilivula vwu navampili kinu.

⁴ Pwu umwene akavuja akansuṅa ujyunge unkivaga. Vi vakamoma untwe namaganga, vakankilivula vwu vandemitse.

⁵ Umwene akavuja akansuṅa ujyunge. Vi vakambuda. Vwu vakagaha navo vuvule-vule navange va vongosu. Avange vakavatova, avange vakavabuda.

⁶ Pwu avetsaga nunswambe mpamato ludiga ungane sitso kumwene, vi akansuṅa mumbele akata: Umwene unswambango vi vitsikundwadaga.

⁷ Mańa avene avavombelaga amasilu vwu vakavulana vakata: Vi vi mwenevuhale uju, tsukwi tumbudage pwu tuvetsaga twi venevuhale uvwe.

⁸ Pwu vakamwibata vakambuda. Vakamumya mungunda gwa masilu vakantaga.

⁹ Alagaha ndeti navo umwenengunda gwa masilu? Alitsaga nkuvabuda avavombelamasilu ava alavapyanihitsa avange.

¹⁰ Apene pakalata namupavweni lusiku upwu ita: Iliganga ilyu valigilye avatsengańumba lyu lyipelile ukuva lya kwitotekapwo ińumba jyoni.

¹¹ Vwu agahile unkuludeva vuvule-vule, atye livetsage lya kudega uvwe vwu twilola.

¹² Avene vakata tumwibate, mańa vakadwada kuvanu avalundamine ikipuga kyoni. Ulwakuva vakivwene ikihwanihitso iki, vakata ikututsova uvwe. Pwu vakandeka baho vakavuka.

¹³ Pwu vakansuṅila avange navapalisai navańa-Heloti vakata vwu vangonelage ilimeńu mundomo.

¹⁴ Pwu vakatsitsova nave vakatsita: vi mańisi tuvwene vwitsova tsitsa jilweli upwu vwitsova, nisoni nuli natso kuvanu. Ulwakuva nujyunge umunu navukumalila mbunnonu kumiho, bako avanu vukuvavula ija jilweli inzila jya Nguluve. Pwu tukukuvutsa twita: Nda kunnonu ukusangula amasango kwa Kesali? Nda mwiko? Tugahage ndeti, nda tusangulage, nda tubelage ukusangula?

¹⁵ Umwene akavamańa uvunwasi vwa vene akata: Mumbonyage ulutalama lwa masango ndilole.

¹⁶ Pwu vakampa ulunge. Umwene akata: Ndeti ikihwanihitso iki kyani? Nuvuvige uvu vavigile vwani? Vakata: Vwa Kesali.

¹⁷ Pwu UJesu akanda akata: E humbe mumpetsage UKesali isya pavu-Kesali vwa mwene, namwene nu-Nguluve mumpetsage isya pavu-Nguluve vwa mwene. Pwu vakadega vuvule.

¹⁸ Pwu vakahegelela kumwene avasatukai avibela vita ukutsuka kwu nujyunge umunu nitsuka lusiku. Navene vakambutsa nilinge vakata:

¹⁹ Vi mańisi, lola UMose alagye mwa kalata va mwene atye: Angave ulukololwe va munu aswe, andekile undala va mwene vwu naholili numwana ujyunge, pwu upita ulukololwe amwingilage amolelage avana ulukololwe.

²⁰ Ulole pwuvale apa avanamunu lekelakupamato. Pwu umbaha akantola undala, akaluta pakuswa untsilamwana vuvule.

²¹ Pwu akamwingila uva vili. Namwene akaluta pakuswa untsilamwana vuvule. Namwene uva datu vuvule-vule.

²² Pwu vakakongana pakumwingila vuvule-vule voni vuvule vwu lekelakupamato, voni vakaswa avatsilamwana vuvule. Kumbele kuvoni pwu namwene undala akavakonga ukuswa.

²³ Lungave lusiku vwu vatsukile voni avanu, pwu avetsage ndala vaaliku? Mańa voni lekelakupamato vantolile.

²⁴ Pwu UJesu akanda akata: Ndita lwulu mujagile ulwu mutye nakalata namummańili, mutye namaka ga Nguluve namugamańili.

²⁵ Mańa pakutsuka vwu vatsukile kuvaswe, pwu nukutegulana navalategulane. Bako valava ndavasunwa vuvule va kukyańa.

²⁶ Ukwene ukutsuka avaswe namulivweni mwa kalata va Mose umwu ikutuvula itsa pakasitu palya, ilyu Unguluve atsovage nave ilyu atetsage: Nene ndili Nguluve va Abulahamu, ndili Nguluve va Isikaka, ndili Nguluve va Jakobu. Lyu nda namulivweni?

²⁷ Umwene Unguluve nda vi Nguluve va vaswe? Bako va vumi. Lwulu mujagile vuvule.

²⁸ Pwu akahegelela kumwene ujyunge umańakalata, uvi apulihitsage vwu vikaṅinana nave ulukani, uvi ambwene ukuvalema umwene, vi akambutsa akata: Ululagilo ululuti kundagilo tsoni lwululiku?

²⁹ Umwene UJesu akanda akata: Ululagilo ululuti kundagila tsoni ulwita: Pulika vi Isilaeli, mańa Unguluve untwa vitu vi nkuludeva jujwa mwene,

³⁰ vi unganilage ninumbula jyako jyoni numwuja gwako gwoni nukwisagila kwako kwoni namaka gako goni.

³¹ Ulunge ulunine ulwita: Namwene unnino unganage nduvwu vwiganile vimwene.

³² Pwu umańakalata akidika akata: Jilweli vi mańisi utsovile ugolwise upwu utye alikwo Jujwa mwene, nakuli ujyunge kuluvasu mmwene.

³³ Nupwu utye nulugano lwa kunganila Jujwa ninumbula jyako jyoni nukwisagila kwako kwoni namaka gako goni, nulugano lwa kungana unnino nduvwu vwiganile vimwene, –lwu lutsilutile uvunnonu inekelo tsoni vuvule,

³⁴ Umwene UJesu vwu ambwene ukwanda vunnonu vuvule itsa luhala pwu akambula akata: Uve navwiva patale paludeva lwa Nguluve. Pwu vakadwada ukumbutsa itsinge voni vuvule umwu vavelye.

³⁵ Umwene UJesu vwu ikuvamańisa mwa Tempeli, pwu akavavutsa akata: Lyu vatetsage vatsovage ndeti avamańakalata ilyu vita: UKilisiti ńa-Ndaviti?

³⁶ Mańa umwene UNdaviti upwu ikuntsovela mwa Mepo Umbalatse pwu ita: Unkuludeva atsovile kunkuludeva vango atye, tama kukivoko kyango ikyandyo ukasikage upwu avatavangwa vako ndikuvapelaga katamilo ka kuvikapwo amalunde gako.

³⁷ Lola UNdaviti ikuntsova ukuva vi nkuludeva va mwene. Pwu ate avetsage mwana va mwene ndeti? Avene avanu ikipuga kyoni umwu vavelye vakata: Nonu itsu itsova.

³⁸ Vwu ali pakuvamańisa pwu akatsova nalyene nilyakuta: Mbandikage avamańakalata aviswala igyańingilitsa imitale vwu vitsungutila mbutsenge, avita vatupembetsage avanu nduvanza,

³⁹ nanńumba tsa kwisajilamwo vita tutame pasitamilo sya vuvaha, nupwu vibiha pakutama pakulya isinu, napene vikihalila pakwimikivwa.

⁴⁰ Vivona valye vuvule inńumba tsa vadala avaswile, pwu viluta pakwisaja ińisajo inale itsa kuṅala. Vwu valutililaga ukuvungwa vwu vihigwa.

⁴¹ Pwu UJesu pakutama vakalolanaga nikihava ikya kulaha isya kulaha. Akavalola avanu vwu vilaha indalama tsa vene nkihava. Akavona avamosu va vongosu vilaha tsi ńongosu indalama.

⁴² Pwu undala mpamato unswile ungatsu akalaha utusenti utudebe tuvili utuli pakahela kapamato.

⁴³ Pwu UJesu akavilanga avakongi va mwene akavavula akata: Jilweli-lweli ndikuvavula ndita undala unswile ungatsu uju avalutile ukulaha voni avalahaga nkihava ikya kulahamwo.

⁴⁴ Mańa voni ava upwu vilaha pwu vitola vwu vavwene tsidigile, umwene uju lweli mbugatsu vwa mwene alahile isyu ali nasyo isya munzala.