Maliko 11 - UTESITAMENTI UMPYA

¹ Vavwene vwu vahegelye mu-Jelulsalemu vwu vatsisike mu-Betipage namu-Betanija vwu valotsitse pakidugala kya mono, pwu UJesu akasuṅa avakongi va mwene vavili

² akata: Mbihage mbutsenge vulya mulolana navwo. Vwu mutsisike pwu nankatsihave ukulivona ilyana lya ligodovwe-vakungile–ilyu nujyunge umunu nitogili lusiku. Lyu nkavopole mungegele kunu.

³ Ngave mbwene ujyunge umunu ikuvavutsa ita muvopola lyiki? Pwu nkatetsage, mańa unkuludeva ikulilonda. Pwu navakatsihave ukuvapa.

⁴ Pwu vakabiha, vakatsikulivona ilyana lya ligodovwe, likungilwe pa ndyango pa nzila–malekano, vakalivopola.

⁵ Vaninye va vanu avimile vakata, muvopola ilyana lya ligodovwe lyiki?

⁶ Vakavavula nduvwu UJesu avalagye, pwu vakavaleka valutage.

⁷ Pwu vakatsikumpa UJesu ilyana lya ligodovwe, vakatandika nisilundwa syavene pa ligodovwe, pwu umwene akitoga.

⁸ Avange avanu avongosu va-katandika isilundwa sya vene munzila. Avange vakadeńa amapagika ga mibiki, nagene vakatandika munzila.

⁹ Pwu navalongwe mbulongolo navakongaga mumbele vakupililanila ukwilanga vakata: Hosyana nsajivwa vuvule uvi ikwitsila mwitavwa lya nkuludeva!

¹⁰ Lusajivwa vuvule uludeva lwa dada lwa Ndaviti ulukwitsa. Hosyana kukyańa!

¹¹ Pwu UJesu akatsisika mu-Jelulsalemu akingila mwa Tempeli. Vwu alolile mwoni, pwu akavona vuhwe. Pwu akahuma akabiha mu-Betanija navakongi va mwene kitsigo navavili.

¹² Pavusiku vwu vahumile mu-Betanija, pwu umwene akavona jivava inzala.

¹³ Vwu aguvwene unkuju gwa mani amongosu pavutale, pwu akabiha akata ndilole vwu guhupile iseke. Vwu asike pwu akavona gulembile amani gene. Ulwakuva umwaka gwa kuhupa iseke imibiki gukanale.

¹⁴ Pwu UJesu akatsova kumbiki akata: Pwu sikutsoni nujyunge alalitsaga lusiku iseke pave. Avakongi va mwene vakapulika vwu itsova ili.

¹⁵ Pwu vakatsisika mu-Jelulsalemu. Umwene UJesu akingila mwa Tempeli, pwu akavahumya voni navagutsaga navagulaga mwa Tempeli akata nisitalati sya vene avananiaga indalama akata nisitamilo sya vagutsangundya akagwisa.

¹⁶ Akavakilivula avatetsaga tugende ija pa Tempeli vwu vapimbile isinge.

¹⁷ Akavamańisa akata: Ndita livigilwe mwa kalata ilita: Ińumba jyango jitsovwagwa ukuva ńumba jya kwisajilamwo voni avapanzi, uńe lweli mujipelile ukuta mako jya mińambuda.

¹⁸ Tsu vakapulika navateketsi avavaha navamańakalata tsitsitsi, pwu vakalonda itsa kumbudila. Vakata: Tugahe ndetinave? Vakadwada ulwakuva vavonaga avanu ikipuga kyoni tsinogye mwitumbu itsu atsovaga umwene.

¹⁹ Sikutsoni akavona vuhwe pwu akahuma mbutsenge umu, akatsigona mbunge.

²⁰ Pavusiku vwu viluta pwu vakavona unkuju gulya gwumile nagi milela.

²¹ Pwu akakumbuhitsa UPetele akata: Vi mańisi, lola unkuju gulya ugukotolage gwumile.

²² Pwu UJesu akanda akata: Muvetsaga nulwidiko lwa kumwidikila Unguluve.

²³ Mańa ndikuvavula ndita: Jilweli-lweli uvi itsova kukidugala iki ita: Vwipimbage vwitage muńanza, aleke nukwinana napadebe vwu itsova, bako alumańage vuvule ukuta tsikwitsaga itsu nditsovile tsikipelaga, vi alavonaga tsitsile jilweli.

²⁴ Pwu upwu ndikuvavula ndita: Syoni isyu mudova vwu mukisaja, mulumańage vuvule ukuta tukwupililaga, pwu mulupililaga jilweli.

²⁵ Ngave mwimile mukisaja, pwu munsyikilage umunu uvi ndi ninongwa nave, pwu namwene nudadajińo kukyańa ukuta avasyikilage nuńe itsińo inongwa.

²⁶ Ngave uńe namukuvasyikila inongwa avajińo, pwu namwene udadajińo kukyańa nalavasyikilaga ulumeno lwińo.

²⁷ Pwu vakavuja vakatsisika mu-Jelusalemu. Vwu itsungutila mwa Tempeli, pwu vakahegelela kumwene avateketsi avavaha navamańakalata navańivaha avenekivumbuko.

²⁸ Vakambutsa vakata: Itsu vuvomba vuvombela mmaka maki? Veni akupye amaka aga atye uvombage tsitsitsi?

²⁹ Umwene UJesu akanda akata: Leka nuńe ndivavutse ilinge ilimeńu. Ngave lyu mumbulile, pwu nuńe ndikuvavulaga amaka ugwu ndivombela tsitsitsi ukwu gahumile.

³⁰ Ulwa kwotsa kwa Johani lwahumile ndaku? Nda lwahumile kukyańa pange kuvanu vuvule? Mumbulage.

³¹ Pwu avene vakavulana vwu vikwegile vakata: Lola tungave twita lwahumile kukyańa alata: Pwu namumwidiki kiki?

³² Nda tutetsage lwahumile kuvanu vuvule? Bako!–Ulwakuva vavadwadaga avanu, ulwakuva voni vatye UJohani ale namalago jilweli.

³³ Pwu vakamwanda UJesu vakata: Bako natulumańili, Pwu UJesu akanda akata: Pwu nune nandikuvavulaga ukwu gahumile amaka ugwu ndivombela tsitsitsi.