Maliko 10 - UTESITAMENTI UMPYA

¹ Pwu akabiha. Akahuma upwu ale, akatsisika nkilunga kya mu-Jutai umwambo gulya gwa Jolitani. Pwu avanu vakitsa vakalundamana upwu ale. Umwene akavavula inongwa nduvwu agahaga sikutsoni.

² Pwu avapalisai vakahegelela kumwene vakata tungele. Vakambutsa vakata: Ndeti uve, nda kunnonu umunu ukungotola undala va mwene?

³ Umwene akavavutsa akata: UMose mundagilo itsu alagye atye ndeti?

⁴ Avene vakata: Umwene UMose vi idike atye mumbigilage kalata va kuta ndindekile, pwu mungotolage.

⁵ Pwu UJesu akanda akata: Ulwakuva avavwene uvutalamu inumbula uńe, pwu avavigye ululagilo ulu.

⁶ Apene pavutengulilo upwu apelage syoni Unguluve, pwu atye nungosi mpamato nundala mpamato vuvule ukuvapela.

⁷ Pwu umunu ikundekaga nudadaje nuvańina ikumbadamaga undala va mwene,

⁸ pwu vwu vavili ava pwu vipelage ukuva mmana mpamato gwene. Pwu valekile ukuva vavili, bako vipelile ukuva mmana mpamato gwene vuvule.

⁹ Ukwu angave avabadiṅinye Unguluve, kwu mwiko ukudadalulanya vi munu.

¹⁰ Kuvutsenge vakatsikumbutsa avakongi va mwene inongwa tsitsitsi.

¹¹ Umwene akavavula akata: Uvi ikumumya undala va mwene atole ujyunge, pwu aligwipe nundala va vange.

¹² Namwene undala angave ihuma pangosi angave ibiha kujyunge pwu aligwipe vuvule.

¹³ Pwu vakagega avana kumwene vakata avabasage mumana. Avene avakongi va mwene vwu vakavatanila navo avavagegile.

¹⁴ Umwene UJesu vwu avavwene pwu gukavipa akata: Mbaleke, avana vitsage kwane mukuvabetsa viki? Mańa uludeva lwa Nguluve lwa vene avali vuvule-vule.

¹⁵ Jilweli-lweli ndikuvavula ndita: Uvi uludeva lwa Nguluve nikulwupilila uta mwana vi nalingilemwo lusiku.

¹⁶ Pwu akavapagata akavavika amavoko akavasaja.

¹⁷ Avwene vwu ihuma nńumba vwu ita ndigende inzila, pwu ujyunge umunu akańilila mumana akasana kumwene akambutsa akata: vi mańisi vi nnonu, ndivombe kiki ikya kwingilila pavuhale vwa vwumi vwa sikutsoni?

¹⁸ Umwene UJesu akata: Vukunzova kiki uvunnonu une? Nda kwale ujyunge unnonu? Ndita unnonu ali mpamato vuvule, vi Nguluve mwene.

¹⁹ Indagilo utsimańile ndita: Nulwita ulabudaga, nulwita ulaligupaga, nulwita ulahitsaga, nulwita ulanwaṅilaga unnino, nulwita ulantekaga nujyunge umunu, nulwita umwimike udadajo nuvańoko.

²⁰ Pwu umwene akambula akata: Vi mańisi nditsikongile tsoni tsitsitsi ndihumile natso mbudebe.

²¹ Pwu UJesu akandola akangana akata kwukale akene akasigye. Bihaga ukagutse nikyuma kyako kyoni uvagavanye avagatsu vwu ukavile ikyuma kukyańa, pwu ukitse kwane uṅongage une.

²² Pwu umwene akasisiliṅana kumiho vwu apulike ili, akasusuvala akaluta. Ulwakuva ale mosu ikyuma ki kyongosu.

²³ Pwu akavalola avakongi va mwene akavavula akata: Kutalamu avańakyuma ukwingila ndudeva lwa Nguluve!

²⁴ Pwu avene avakongi vakakeńemuka ilimeńu lya mwene ili, Pwu UJesu akavuja akatsova akata: Ńi vajango, ńi vana vango kutalamu ukwingila kuludeva lwa Nguluve avihuvila pavumosu vwa vene.

²⁵ Ningamila ukwingila nkiho ka kahonelo numosu ukwingila ndudeva lwa Nguluve–kwebepe ukugenda ingamila nkalyango ka kahonelo.

²⁶ Pwu avene avakongi vakongeletsa ukujetuka mwitumbu vakata: Pwu veni ipona lino?

²⁷ Pwu UJesu akavavula akata: Avanu vwu viki vwu tsivalemile tsitsitsi, umwene Unguluve lweli vi natsindemili, ulwakuva Unguluve vi nakindemili kinu.

²⁸ Pwu UPetele akatsova akata: Lola uvwe tusilekile syoni isitu tukukongile uve.

²⁹ Umwene UJesu akanda akata: Voni avita nińumba tsa vene vita navalukololwavo vita navahatsavavo vita navavańinavo vita navadadajavo vita navana vita nisilimila, syoni vikusilekela mumwane namunongwa tsane–,

³⁰ vwu vivalilivwagwa imilevulo kitsigo pakapamato-kapamato ukwu vakalekile vikwupililaga namunkilunga kya pasi umwu: Vitetsaga ni-ńumba, vitetsaga navalukololwavo, vitetsaga navahatsavavo, vitetsaga navavańinavo, vitetsaga navana, vitetsaga nisilimila, vitetsaga nakwene nukuswimwa baho vuvule, namunkilunga ikikwitsa valupilila nuvwumi uvutsilakusila lusiku.

³¹ Vongosu avalongotsi ava valava va mumbele, vongosu navamumbele ava valava valongotsi.

³² Lola vale munzila vakatoga ukubiha mu-Jelusalemu. Umwene UJesu akalongola mbulongolo, pwu avene vakajetuka mwitumbu. Avene avakongaga mumbele vwu vakadwada. Pwu UJesu akavuja akavatola avakitsigo navavili akavavula itsavetsaga pakumwitsila akata tsu itsi tsu itsi.

³³ Akavavula akata: Lola, twitoga twibiha mu-Jelusalemu, mwu Uńamunu valavapetsaga avateketsi avavaha navamańakalata. Vwu valahigaga ilyakuta upita aswitsage, vwu valavapetsaga avapanzi.

³⁴ Vwu valamelulaga valambehelaga namati valantovaga nisonzo valambudaga. Mańa palitsuva lya datu pwu alatsukaga umwene.

³⁵ Pwu vakahegelela kumwene avańa-Sebetai nu-Jakobu nu-Johani vakata: Vi mańisi, tukatye tudove kapamato kwave ukwu vukutupa.

³⁶ Umwene akata: Kyu kinu kiki ikyu mudova kwane?

³⁷ Avene vakata: Tukatye pange twitse tutamanye nuve vwu vwitsile mbudwadwa vwako, mpamato kukivoko ikyandyo ujyunge kukivoko ikyaṅigi.

³⁸ Umwene UJesu akanda akata: Nantsimańili itsu mudova. Mbumańile ukuńwa ikinwelo ikyu ndiva pakuńwa une? Mbumańile ukwoga amagasi ugwu ndiva pakwotsivwa une?

³⁹ Vakata: Ena tuvumańile, Umwene UJesu akavavula akata: Ikinwelo kyane kyu kyiki kyu mwińwa, namagasi gango gwu giki gwu giki' gwu mukwotsivwagwa.

⁴⁰ Ukwene ukutama kukyandyo nakukyaṅigi kwane kwu nakavombo kango ukumpa umunu, bako pwu valatama uvwu avagahile jujwa.

⁴¹ Avene avakitsigo vwu vapulike tsitsitsi, pwu gukavavipila ava-Jakobu nu-Johani.

⁴² Pwu UJesu akavilanga akatsova navo akata: Mbamańile ava avitsovwa ukuva vakuludeva va vapanzi ukuta vikuvalesehetsaga ulwa vutwa avanu va vene, navavaha va vene mbamańile ukuta vavibite amaka avanu.

⁴³ Uńe ndavetsaga vuvule-vule, Bako uńe uvi ita ndivetsage mbaha nakuvajango vi upita ipelage vakuvavombela ńi vanine.

⁴⁴ Nuvi ita ndivetsage ndongotsi kuvajango vi upita avetsage nkivaga vińo ńi vanine.

⁴⁵ Mańa namwene Uńamunu nitsili nkulonda avakumbombela jujwa, bako itsye nkuvavombela avanu, itsye nkuvahomba uvwumi vwa mwene ukuta sive sya kuvavangila vavongosu.

⁴⁶ Pwu vakatsisika mu-Jeliko. Vavwene vwu vihuma mu-Jeliko najujwa navakongi va mwene navanu ikipuga ikyongosu, pwu vakavona umbosu UBalitimai-kwu kuta uńa-Timai–atamile panzila pambale idova isya kudova.

⁴⁷ Vwu apulike vi vi Jesu va mu-Nasaleti iluta pwu akilanga akata: Vi Jesu, vi ńa-Ndaviti undililage ikisa!

⁴⁸ Vakantanila avange avanu vakata: Nunala! Umwene pwu akongeletsa sitso ukwilanga akata: Vi ńa-Ndaviti undililage ikisa!

⁴⁹ Pwu UJesu akima akata: Mungege kunu. Pwu vakatsikungega umbosu vakata: Vwidulusage vuvule imaga, mańa atye mungege.

⁵⁰ Pwu umwene akataga ikilundwa kya mwene pasi, akima akabiha kwa Jesu.

⁵¹ Pwu UJesu akambutsa akata: Ndigahage ndeti nuve? Umwene umbosu akata: Ndingave ndalolaga amiho vi mańisi vango vi mbaha!

⁵² Umwene UJesu akata: Bihaga lukuponitse lwidiko lwako. Pwu umwene akalola ṅani-ṅani. Pwu akankonga munzila umwu agendaga.