Luuka 9 - UTESITAMENTI UMPYA

¹ Pwu akavalundamanya avakitsigo navavili akavapa ningusu namaka ga kulesehetsa imepo imbivi nukuponehetsa uvutamu vwoni.

² Akavasuṅa akata: Mbihage nkasimilitsage uludeva lwa Nguluve, nkavaponyage navatamu.

³ Akavavula akata: Ndavetsaga nasyo isinge munzila. Bako nulusonzo, bako numpako, bako nisinu nindalama, kwu bako ukuva nigyańingilitsa givili.

⁴ Ngave mukwingila nńumba mwu nkavetsage mumwa, mwu nkahumage vwu mwimile ukuvuja ukuvuka.

⁵ Voni uvwu navikuvupilila, vwu nkahumage mbutsenge vwa vene, nkatovelelage nakasumbe kumalunde, tsu tsive tsa kumańilamwo avene.

⁶ Pwu vakasisimuka ukuvuka, vakamala uvutsenge vwoni, vakatsitsova inongwa innonu mwoni-mwoni, vakavaponya avanu avatamu.

⁷ Pwu namwene nu-Heloti untwa akapulika tsoni itsu apelaga. Pwu akasama ulwakuva avwene avange vita vi vi Johani atsukile mbaswe.

⁸ Avange akavona vita vi vi Elija avonike. Avange akavona vita vi vi namalago ujyunge uva katale atsukile.

⁹ Umwene UHeloti vi akata umwene vi vi Johani vi ndintemile untwe. Umwene uju vi veni, uvi ndipulika ukuta ipelela tsitsitsi? Akata ndimmańe.

¹⁰ Pwu avapositili vakatsikwitsa ukwu avasuṅile vakambula tsoni itsu vavombile. Pwu umwene akajaga navo akatsikijekela navo mbutsenge uvunge uvwu vita mu-Betisaita.

¹¹ Mańa avene avanu vakambona pwu vakankonga ikipuga vuvule. Umwene akavupilila akavavula itsa ludeva lwa Nguluve. Navene avakuvaponya akavaponya. Vakavona vwu litengula ukusema ilitsuva,

¹² pwu vakahegelela kumwene avakitsigo navavili vakata: Uvatavulage avanu, vabihage mwoni mbutsenge mumbale, mwu vakagone vakalitsage isya kulya. Mańa tuli ndukungu umu.

¹³ Umwene akanda akata: Mbapetsage uńe isya kulya. Avene vakata: Natuli nasyu syongosu. Isivanda sihano nisomba ivili syu tuli nasyo vuvule. Ńage pange tubihage tuvagulilage isinu voni avanu ava.

¹⁴ Ulwakuva vali pavaelipu vahano (5000) avagosi. Umwene akavavula avakongi va mwene akata: Mbavule vatame ndukindi ndukindi, ulukinde ulunge imilevulu gihano (50) ulukindi ulunge imilevulu gihano.

¹⁵ Pwu voni vakatama pasi nduvwu avavulaga.

¹⁶ Pwu umwene akatola nisivanda sihano sisyo nisomba ivili, akalola kukyańa akasana. Pwu akameńulanya akavapa avakongi va mwene, vwu vakavapa avanu.

¹⁷ Pwu vakalya vakiguta voni. Vakalundamanya utumeńukila utwu vasigitse isidoto kitsigo nasivili.

¹⁸ Vwu avwene ijekye navakongi va mwene vwu isajile, pwu akavavutsa akata: Avanu upwu vikunzova uńe vita ndili na veni?

¹⁹ Avene vakambula vakata: Avange vita veve Johani umwotsi, avange vita veve Elija, avange vita vi namalago uva katale sitso atsukile.

²⁰ Umwene akata: Uńe lino mwita ndili ńa veni? Pwu akamwanda UPetele akata: Veve Kilisiti va Nguluve uve.

²¹ Pwu umwene akantanila sitso akalagila akata: Ndambulaga ujyunge umunu.

²² Akongeletsa akata: Uńamunu upita vi akuvilwagwe sitso. Navańivaha avenekivumbuko navateketsi avavaha navamańakalata valameka valambuda, mańa alatsukila palitsuva ilya datu.

²³ Pwu akavavula voni akata: Uvi ita aṅongage mumbele uńe, vi upita idulusage vuvule, atetsage nikidamiṅanye kya mwene itwikage sikutsoni, pwu aṅongage uńe.

²⁴ Uvi ita ndiponye uvwumi vwango, vi avwambutsihitse ṅani. Lweli uvi uvwumi vwa mwene ambuhitse mumwane, vi aponehitse ṅani.

²⁵ Nupwu angave umunu akikavaga kyoni ikilunga angave itagile mumwa, pwu kikumbumbulila kiki lino?

²⁶ Uvi iva nisoni kwane nakumameńu gango, namwene Uńamunu alava nisoni kumwene vwu ikwitsa mbuvaha vwa mwene nuvwa dadaje nuvwa vasuṅwa avavalatse.

²⁷ Jilweli ndikuvavula ndita: Ńi mwimile baha avange nandakumańe ukuswa vwu nanduvweni tango uludeva lwa Nguluve ukwitsa.

²⁸ Pwu vwu atsovile amameńu aga vwu vagonile nnana, pwu akatola nu-Petele nu-Johani nu-Jakobu akatoga navo pakidugala ikinge pakwisaja.

²⁹ Pwu vwu ali pakwisaja pwu vakakeńemuka nakumiho ikwanduka iva ponu vuvule, nunsabwa gwa mwene gwiva swe vuvule guṅala.

³⁰ Vakavona avanu vavili vitsova nave. Vakavona vwu va-Mose nu-Elija.

³¹ Vwu vakavonekela mbudwadwa. Vakatsova itsa kuhuma nkilunga umu umwene itsu avetsaga pakuhumila mu-Jelusalemu.

³² Avene va-Petele navanine itulu tsavalemile. Vwu vakasisimuka, pwu vakambona mbuvaha vwa mwene uvudwadwa vuvule, vakavona navanu vavili vimile nave.

³³ UMose nu-Elija vwu vimile upwu alipwo jujwa vwu vivuka, pwu UPetele akatsova nu-Jesu akata: Nkuludeva pannonu ukuva baha uvwe. Tutsengage ihema idatu apa. Ijyinge jive jyako, ijyinge jive jya Mose, ijyinge jive jya Elija. Ulwakuva nalumańili itsu atsovaga.

³⁴ Vwu ali pakutsova tsitsitsi pwu vakavona ilivingo likuvilikila. Pwu vakadwada vwu ilivingo livaganye.

³⁵ Pwu vakavona ilimeńu lihuma mwivingo umu lita: Uju vi vi nswambango ungane kwane, vi mumpulihitsage jujwa.

³⁶ Lino vwu lili pakutsova ilimeńu ili, pwu vakavona UJesu ali mwene vuvule. Avene tango vakava mye vuvule, vakaleka nukumbula ujyunge umunu itsu vatsivwene.

³⁷ Palitsuva lya kilavo vwu ikwika pakidugala pwu umwene akaganila navanu ikipuga kyongosu.

³⁸ Pwu vakakeńemuka umunu nkipuga umu ikuta ita: Vi mańisi nditekelesa kwave ndita ungandolelaga unswambango uju, mańa ndili nave jujwa mwene ludiga.

³⁹ Lola imepo jikumusanya, pwu umwene ikuta, pwu itsilika namahuve givoneka pandomo. Jihuma mola-mola vuvule vwu jimusitse.

⁴⁰ Nditekelise kuvakongi vako nditye: Muhumyage imepo iji, mańa valemilwe.

⁴¹ Pwu umwene UJesu akanda akata: Hi, kwu kutsilakwidika kuki avanu va lino ava, vwu vutsimu vuki! Ndisike ndaku ukuva nuńe, ndisike ndaku ukuta lya imaga sikutsoni! Ungege kunu unswambo.

⁴² Lino vwu ali pakuhegelela nave pwu imepo imbivi jikantwangulitsa pasi akatsilika. Pwu UJesu akatanila nimepo imbivi iji, akamponya undume akampa udadaje.

⁴³ Pwu voni vakaginzamuka mwitumbu uvuvaha vwa Nguluve. Lino vwu voni vali pakudega tsoni itsu apelaga, pwu umwene akatsova kuvakongi va mwene akata:

⁴⁴ Mudindulage vunnonu imbulukutu tsińo, mupulikage amameńu ugwu ndikuvavula. Ulwakuva Uńamunu viva pakuvapa mmavoko avanu.

⁴⁵ Avene vakalemwa ukutsivona itsu atsovaga, tsikasihama ukuta valatsivońaga. Nukudwada vakadwada ukumbutsa itsu atsovaga.

⁴⁶ Lukavoneka ulukani avene ulwakuta: Ino veni mbaha twivoni umwu tuvelye?

⁴⁷ Pwu umwene UJesu akatsimańa itsu visagilaga munumbula tsa vene, pwu akantola umwana akambika mumbale mmwene

⁴⁸ akavavula akata: Uvi umwana juju ikumwupilila mwitavwa lyango, vi ańupilye uńe. Mańa uvi ikuńupilila uńe, vi amwupilye uvi asuṅile uńe. Ulwakuva uvi avalutile ńivoni ulwisijo, vi avalutile uvuvaha.

⁴⁹ Pwu UJohani akambula akata: Vi mańisi tumbwene ujyunge uvi imepo imbivi atsihumihitse mwitavwa lyako, pwu uvwe tukambetsa ulwakuva tumbwene natwiva nave pakukukonga.

⁵⁰ Umwene UJesu akanda akata: Kwu mwale nakiki ukumbetsa? Mańa uvi natutegeṅana vi tuvelana nave.

⁵¹ Lola vwu amatsuva ga mwene ga kuvuja kuntola kukyańa umwene vwu gahegelye, pwu akalotsa amiho ku Jelusalemu mwu akata ndibihe.

⁵² Pwu akavasuṅa avakulongolo mbulongolo mwene. Vwu vakagenda vakatsisika mbutsenge uvunge uvwa va-Samalija mwu vakata tugahe apakuva.

⁵³ Avene avenevutsenge vakabela ukumwupilila ulwakuva vakavona amiho alotsitse mu-Jelusalemu ita mwu ndibihe.

⁵⁴ Vwu vatsivwene tsitsitsi avakongi va mwene ava-Jakobu nu-Johani pwu vakata: Nkuludeva, ndulungave vukwidika, pwu ndali tukugutsova umwoto ukuta guhume kukyańa vapitsage vasile.

⁵⁵ Pwu umwene akakilivuka akavatanila akata: O, namwimańili? Ndi vana va Mepo aliku?

⁵⁶ Mańa Uńamunu nitsili ukuvajatsa uvwumi avanu. Bako umwene itsye nkuvapoka. Pwu vakabiha mbutsenge uvunge.

⁵⁷ Lola pwu vwu igenda munzila pwu ujyunge umunu akatsova nave akata: Nkuludeva ndikukukongaga mwoni umwu vugenda.

⁵⁸ Umwene UJesu akanda akata: Vukumbona ndaku? Mańa natsene iṅeve tsili namaguli, nisyene isidege sili nuvuswa, umwene Uńamunu vi nali napo apakuhagulila untwe.

⁵⁹ Ujyunge akambula jujwa akata: Ṅongage. Pwu umwene akata: Nkuludeva ndita ndibihe ndikansile tasi udada.

⁶⁰ Umwene UJesu akata: Uvaleke avaswe vasilane vene. Uve bihaga ukavonye uludeva lwa Nguluve.

⁶¹ Ujyunge akatsova nave akata: Nkuludeva nuńe ndikukukongaga leka tasi ngavasimilitse avalukololwango.

⁶² Umwene UJesu akanda akata: Uvi ivika ikivoko palikumbulu, ivuja ikwima ukulola kumbele, vi nanogilikuludeva lwa Nguluve.