Luuka 8 - UTESITAMENTI UMPYA

¹ Pambele patsitsitsi pwu umwene akagenda vuvule akamala uvutsenge vwoni nuvuvaha nuvudebe, akasimilitsa inongwa innonu tsa ludeva lwa Nguluve. Avakitsigo navavili vakava nave.

² Navene navadala avange vakagenda nave uvwu avaponitse nimepo imbivi nuvutamu vuvule. Va-Malija uvi vatetsage va mu-Magatala uvi tsahumilemwo mmwene imepo imbivi lekelakupamato,

³ nu-Johana undala va Kusa uńivaha va Heloti, nu-Susana navange vavongosu. Vwu vakavatanga ukuvasugila najujwa navakongi va mwene nikyuma kya vene.

⁴ Vwu valundamine avanu ikipuga avahumile mbutsenge mwoni-mwoni avatungaga, pwu akatsova ikihwanihitso akata:

⁵ Alikwo umunu uvi alahaga imbeju jya mwene. Vwu ali pakulaha pwu ijyinge jikatsigwa panzila jikakadwa, nisidege sya kukyańa sikahola sikamala.

⁶ Ijyinge jikatsigwa palunalavwe, jikaduṅupala ulwakuva najili nuvuńesu.

⁷ Ijyinge jikatsigwa pamitwińo, nigyene imitwińo vwu gimelile panine najyo gikahopotsa.

⁸ Ijyinge jikatsigwa pakilunga ikinnonu, jikamela jikahupa iseke imilevulu kitsigo. Vwu atsovile tsitsitsi pwu akata: Uvi ali nimbulukuto, vi apulihitsage.

⁹ Pwu vakambutsa avakongi va mwene vakata: Ikihwanihitso iki kyu kinu kiki?

¹⁰ Umwene akavavula akata: Uńe mupevilwe ukutsivona itsa kuvutitu itsa ndudeva lwa Nguluve. Avange vivulwagwa si sihwanihitso isyakuta nupwu vilola navikutsivona, nupwu vipulika navikutsimańa.

¹¹ Ikyene ikihwanihitso kyu iki: Imbeju lyu limeńu lya Nguluve.

¹² Avali munzila vwu vivona vapulike uńalilusu ikwitsa ukulińaga ilimeńu munumbula tsa vene ukuta valaponelaga ndwidiko.

¹³ Avali palunalavwe vwu vivona vapulike vikwupilila ilimeńu vihekela, igyene imilela naviva nagyo, navikwumilitsa ukwidika, lungave lusiku vigelwa navihava ukwileja.

¹⁴ Ijigwa mmitwińo vwu vivona vapulike vikisagila uvukavi nuvunnonu vwa nkilunga vwoni vukuvagoga, niseke natsisika.

¹⁵ Ijyene ijigwa pakilunga ikinnonu vwu vivona vapulike ilimeńu, avene viva nalyo munumbula innonu ingolosu, vwu vikwumilitsa nukuhupa iseke vatsilaluvipo.

¹⁶ Ińale angave umunu akotsitse, pwu nigubikila nindelema, nivika pasi pakitala. Bako ivika pakibatilo, voni avikwingila nńumba ukuta vajivone ukumulika.

¹⁷ Mańa twoni utwa kuvutitu tulavalaluka pavuvalasu lungave lusiku, twoni utwiswikile tulaswikulwagwa tulavonekaga pavuvalasu.

¹⁸ Mbandikage mpulihitsage vunou itsu mupulika. Mańa uvi ali nasyo isinge, vi ikwongeletsivwagwa ukupevwa nisinge syongosu. Umwene uvi niva nako nakange, vi kipokivwagwa nakene ihwana ali nako.

¹⁹ Pwu nuvańina navalukololwe vakabiha upwu alipwo, vakalemwa vwu vita twaganile nave ulwakuva ali pagati pakipuga.

²⁰ Pwu avanu vakambula vakata: Nuvańoko navalukololwo vimile mumbele mbanu vita tulole nuve.

²¹ Umwene akanda akata: Ujuva navalukololwango vwu avita nukupulihitsa ilimeńu lya Nguluve vita nukulikonga.

²² Ilitsuva ilinge akipaka mwiboti navakongi va mwene. Umwene akavavula akata: Tulovokage ińanza tubihage umwambo gulya. Pwu avene vakakuluga iliboti.

²³ Lino vwu ligenda iliboti pwu umwene akagona itulu. Pwu likavoneka ilikuluguta pańanza, namajiga gakavavukila mwiboti. Vakakuvilwa sitso.

²⁴ Pwu avene vakansisimula vakata: Nkuludeva, nkuludeva mańa tuli pakutwivila. Pwu umwene akasisimuka akatanila nalyo ilikuguta, akatanila nago namajiga ga magasi, pwu gakagataluka, kukanunala vuvule.

²⁵ Akavavutsa akata: Ulwidiko lwińo luli ndaku? Avene vakata nukudwada vakata nukudega, vakavutsanya vakata: Vi munu nki uju? Mańa ga makuluguta naga magasi gikumwidika itsu ilagila.

²⁶ Pwu vakalovoka vakatsisika pakilunga kya va-Gelaseni ikitegeṅine nikya mu-Galilai pańanza.

²⁷ Avwene vwu itoga pakimwambo, pwu akaganila numunu va mbutsenge mumwa uvi ali nimepo imbivi. Atengwe kakatale ukugenda vuvule kitaswala ugunge unsabwa nagonili nńumba akava mbuguli vuvule.

²⁸ Vi akakuta vwu ambwene UJesu, akangwila mmalunde akilanga akata: Tuli vuki nuńe nuve vi Jesu, vi nswambe va Nguluve unduti? Nditekelesa kwave ndita: Ulaniṅilaga.

²⁹ Ulwakuva umwene ajilagye imepo imbivi atye: Huma mmunu uju. Mańa atengulaga sikutsoni ukumusanya kwoni-kwoni. Avanine sikutsoni vakata tunkunge nimińololo nindegehe vakata tundindilile. Umwene akatsidumulanya itsa kunkungila, pwu imepo imbivi jikanswima mundukungo.

³⁰ Pwu UJesu akambutsa akata: Liliku ilitavwa lyako? Umwene akata: Nene Kipuga. Ulwakuva tsingye mmwene ńongosu imepo imbivi.

³¹ Pwu vakantekelesa vakata: Vlatutsovaga ukuta mwitagage ndugenge.

³² Lino pwukyale ikidimo ikivaha kya ngube, kikalya ilińasi pakidugala. Pwu imepo imbivi tsikantekelesa tsikata: Utupetsage ingube tsilya mwu twingilage. Umwene akidika.

³³ Pwu imepo imbivi tsikahuma mmunu jujwa tsikatsikwingila mungube. Pwu ingube ikidimo kyoni tsikańilila palugima tsikitaga muńanza, tsikumilwa vuvule.

³⁴ Avene avalume avadimaga ingube vwu vatsivwene tsitsitsi, pwu vakańila vakatsitsova mwoni-mwoni mbutsenge vwoni.

³⁵ Pwu avenevutsenge vakasisimuka ukubiha kukulola tsitso apelile. Vakatsisika upwu ale UJesu, vakatsivona umunu, uvi tsahumile mmwene imepo imbivi, atamile vunnonu kumalunde kwa Jesu, aswalile nimisabwa, anotsivwe vuvule. Pwu vakadwada.

³⁶ Avene avambwene vwu vakavavula itsa kumponya uva mepo imbivi vakata atye atye.

³⁷ Pwu avanu va nkilunga kya mu-Gelaseni ikipuga kyoni vakata: Ungahuma nkilunga kitu umu. Mańa uludwado luvavwene lwu lwongosu. Pwu umwene UJesu akipaka mwiboti akakilivuka ukwu ahumile.

³⁸ Umwene umunu, uvi tsahumile mmwene imepo imbivi, akantekelesa akata: Ndibihe nuve. Umwene akankilivula akata:

³⁹ Bihaga kuvutsenge vwako, uvavulage avanu itsu akupelye Unguluve. Pwu umwene akabiha akatsitsova mwoni mbutsenge itsu ampelye UJesu.

⁴⁰ Lino UJesu vwu atsisike pwu vakamwupilila avanu ikipuga. Ulwakuva voni vampulikilaga.

⁴¹ Pwu vakavona ihegelela upwu ale UJesu umunu, uvi ilitavwa lya mwene ale vi Jaili umańisi umbaha nńumba jya vene jya kwisajilamwo. Vi akabilukila mmalunde UJesu akantekelesa akata: Tubihage nńumba jyango.

⁴² Ulwakuva ale numwalive mpamato ludiga, uvi amalile imyaka kitsigo nagivili, vi ale pakutsilika. Umwene vwu ita ndibihe, pwu avanu vakakulugana nave ulwakuva kyale kipuga vuvule.

⁴³ Pwale numwene undala uvi ale nilimali imyaka kitsigo nagivili. Nikyuma kya mwene kyoni amalile mbatuṅanya, mańa ujyunge nalumańili ukumponya.

⁴⁴ Vi akahegelela mumbele akamwabasa kukilundwa kya mwene kumalunde. Pwu likuma baho vuvule ilimali lya mwene.

⁴⁵ Pwu UJesu akata: Veni ańabasitse baho? Vakabela voni. Pwu nu-Petele navali nave vakata: Nkuludeva ndanavwilola ukukulugana navo avanu ikipuga nukudidana navo?

⁴⁶ Umwene UJesu akata: Ujyunge ańabasitse. Mańa ndivwene amaka ukuhuma mumana mwane umu.

⁴⁷ Pwu lino undala vwu ivwene ukuta vikumbonaga, pwu akahegelela nukudetema, akabiluka pasi akambula itsampelye ukumwabasa akata tswu itsi, akatsitsova vwu vipulika voni avanu. Akambula nitsa kupona ṅani-ṅani akata: Nditye nditye.

⁴⁸ Umwene akambula akata: Vi mwana vango, lukuponitse lwu lwidiko lwako. Bihaga nulunotsehetso.

⁴⁹ Vwu ali pakutsova tsitsitsi, pwu akavoneka ujyunge uvi ahumile pambaha va vene va nńumba jya kwisajilamwo akambula akata: Umwalivo aswe. Ulamwumilitsaga umańisi.

⁵⁰ Umwene UJesu akapulika pwu akata: Uladwadaga vwidikage vuvule pwu ipona.

⁵¹ Vwu avye kusika nńumba, pwu akavakilivula voni avatetsage twingilaga nave. Akatola vene va-Petele nu-Jakobu nu-Johani nudadaje va mwana nuvańina vwu akingila navo.

⁵² Akavona voni vilila ukuswa kwa mwana. Pwu umwene akata: Kwu bako ukulila, mańa naswili, bako agonelye itulu.

⁵³ Pwu avene vakameka ulwakuva vambwene ukuswa umwana.

⁵⁴ Pwu umwene akavahumya voni nńumba, akamwibata ikivoko uminza akamwilanga akata: Vi mwana sisimuka.

⁵⁵ Pwu umwuja gwa mwene gukakilivuka ukwitsa mmwene, akasisimuka ṅani-ṅani, Umwene akavavula akata: Mumpetsage isinu alitsage.

⁵⁶ Pwu avahotsi va mwene vakagangaluka vuvule, Umwene akavalagila sitso akata: Ndambulaga ujyunge umunu itsu ndipelile.