Luuka 6 - UTESITAMENTI UMPYA

¹ Ulunge pasabati (pandongotsi va vuvili) vwu igenda panzila jya nsilimila sya ngano, pwu avakongi va mwene vakasulubula isisotso vakasigijya mmavoko vakalya.

² Pwu avange avapalisai vakata: Kwu muvomba kiki akalimwiko ukuvomba pasabati?

³ Umwene UJesu akanda akata: Nantsivweni mwa kalata ilyu avombile UNdaviti upwu jivavage inzala najujwa navale nave?

⁴ Upwu ingilaga nńumba jya Nguluve akatola isivanda isivalatse akalya, akavapa navene avale nave, isyu sikutsoni nalili lusiku ujyunge, isyu valitsaga vene va vateketsi?

⁵ Akavavula akata: Mańa namwene nusabati Uńamunu nkuludeva va mwene.

⁶ Lino pwu pasabati ujyunge pwu akatsikwingila nńumba jya kwisajilamwo akavavula inongwa. Mwu akambona ujyunge umunu uvi ikivoko kya mwene ikyandyo kyumile.

⁷ Avene avamańakalata navapalisai vakantegela vakata: Tulole vwu amponitse pasabati vakata pwu tutsivone itsa kunswikila inongwa.

⁸ Umwene akatsimańa itsu visagilaga pwu akatsova kumunu va kivoko ikyumu akata: Sisimukaga vwime pavuvalasu apa. Umwene akasisimuka akima pavuvalasu.

⁹ Pwu UJesu akavavutsa akata: Mumbulage uńe kinogye kiki pasabati nukuvomba innonu nukuvomba imbivi nukuvuponehetsa uvwumi nukuvujatsa?

¹⁰ Akalolesa akavalola voni. Pwu akambula untamu akata: Golosa ikivoko kyako. Umwene akakigolosa. Pwu kikanduka ikivoko kya mwene kikava ndikinine.

¹¹ Pwu gukavipa, vale ndavańalukwale, pwu vakatsitsovana itsa kungahila UJesu.

¹² Mmwaka gugwa pwu ilitsuva ilinge akatoga pakidugala kukisaja. Akisaja vukye.

¹³ Akavona vukye pwu akavilanga avakongi va mwene, akavahala kitsigo navavili. Vwu akavapa nilya vapositili ilitavwa.

¹⁴ Vwu va-Simoni uvi ampye nilya Petele, nu-Andileja ununave, nu-Jakobu nu-Johani nu-Pilipo nu-Balitolomai.

¹⁵ nu-Matai nu-Toma nu-Jakobu uńa-Alipai nu-Simoni uvi vatetsage vi Mwipukuluni

¹⁶ nu-Juta uńa-Jakobu nu-Juta uvi amendamaga.

¹⁷ Pwu akika navo avanu akatsikwima navo pantelamo. Vakava baho navene navakongi ikipuga vuvule navanu va vongosu sitso. Vwu vahumile mwoni mu-Jutai namu-Jelusalemu nikya pańanza ikya mu-Tili namu-Sitoni. Voni vitsile kupulika inongwa itsu atsovaga nakukupona uvutamu vwa vene.

¹⁸ Navene uvwu tsavagatatsaga imepo imbivi voni vakapona.

¹⁹ Mańa voni ikipuga kyoni vakata: Tumwabasage mumana umwene. Mańa vavwene amaka gihuma mumwene gikuvaponya voni.

²⁰ Pwu akavinamukila amiho avakongi va mwene akavalola akata: Nndivandugataluko ńyi vagatsu, mańa uludeva lwa Nguluve lwińo uńye.

²¹ Nndivandugataluko ńyi inzala jivava mańa nndigutaga. Nndivandugataluko ńyi mwilila ulwihotsi lino, mańa ndahekaga.

²² Nndivandugataluko vangave avanu vavasulile, vangave vikuvahumya namumpelela, vangave vikuvaduka, vangave ilitavwa lińo vitaga panzi vita livivi ulwakuva ndi vanu va Ńamunu.

²³ Pwu nkahekelage ilitsuva lilyo nkakinage, mańa pwu isya kuvahomba silava syongosu kukyańa. Mańa avadadajyavo vwu vagahile vuvule-vule ukuvakinila avańamalago.

²⁴ Muli viki ńyi vamosu, mańa mwitolye ṅani itsa kuvatsesa uńye.

²⁵ Muli viki ńyi mupakile lino, mańa jilavavaga inzala uńe, Muli viki ńyi mwiheka lino, mańa pwu ndasusuvalaga ndalilaga ulwihotsi.

²⁶ Muli viki vangave voni avanu vikuvatsova innonu, mańa avadadajyavo vwu vagahile vuvule-vule ukuvatsova innonu avańamalago va vunwasi.

²⁷ Lola uńe ńyi mupulihitsa itsu nditsova, ndikuvavula ndita: Mbaganage avatavangwa vińo, mbavombelage innonu avene avavasulile,

²⁸ mbasaje avikuvakotola, mbimile pakwisaja avikuvasaka.

²⁹ Uvi ikukutova ilipi palitama ilinge, vi umpetsage nilinine nalyene atovage. Uvi ipoka ikilundwa kyako, vi ulambelelaga nugwańingilitsa gwako.

³⁰ Voni avidova isya kudova kwave, vwu uvapetsage. Uvi ipoka isyako, vi ulantsigilaga.

³¹ Tsoni itsu mulonda ukuta avanu vavavombelage uńe, tsu navene mbavombelage tsitso nuńe.

³² Upwu ngave mbaganile avene avavaganile nuńe, pwu veni ate asane kwańe? Mańa navene navatulanongwa viganana avene vene.

³³ Ngave mukuvavombela innonu avene avikuvavombela innonu uńe, pwu veni ate asane kwańe? Mańa navene navatulanongwa vwu vigaha vuvule-vule.

³⁴ Ngave avanu mukuvatanila vwu muhuvila ndavuja mutola, pwu veni ate asane kwańe? Mańa navene navatulanongwa vikuvatanila avatulanongwa avajavo, vihuvila ukuta tutsitolaga umwu syavelye isitu.

³⁵ Pwu ndita: Mbaganage avatavangwa vińo, mbavombelage ninnonu, mbatanilage isya kuvatanila kitahuvila ukuta valavutsaga isinge, pwu nisya kuvahomba uńe silavetsaga syongosu vuvule, mbetsage vana va ju Nduti, ulwakuva umwene ndekedeke vuvule nakuvene uvwu navisana kumwene nakuvagalo.

³⁶ Mbetsage nikisa nduvwu umwene udadajińo ali nikisa.

³⁷ Kwu bako ukumiga umunu ujyunge, pwu nuńe nalavahige nujyunge. Kwu bako ukuntsova uvuvivi ujyunge umunu, pwu nuńe nujyunge nalavatsove uvuvivi. Mbaleke avanongwa tsińo, pwu nuńe valavaleka uvwu ndi ninongwa kuvene.

³⁸ Mbape isya kuvapa avanu, pwu valavapa sinine nuńe, Ndapevwa pavwambilo vwa nsabwa gwińo isya kigelelo ikinnonu ikisokele ikikiṅine ikiheleleka vuvule. Mańa ikegelelo ikyu mukuvagelela uńe avange kyu mugelelwa kikyo najyune.

³⁹ Akavavula ikihwanihitso akata: Ujyunge umbosu nda andongolelage mbulongolo umbosu ujyunge unine, navalagwe mwiguli vwu vavili?

⁴⁰ Nakuli unkongi uvi ikunduta uvuvaha umańisi va mwene. Uvi amalile ukugalavanika vwu ali ndumańisi va mwene vuvule.

⁴¹ Vwilola kiki akalagalila akali ndiho lya nino vwu iṅotsi ijili ndiho lyako uve navwilola?

⁴² Nda pwu utsovage ndeti kunnino pakuta: Vi njango leka ndivuse akalagalila akali ndiho lyako, vwu uve iṅotsi ijili ndiho lyako uve navwilola? Vi nwasi uve ngukwivusa tango iṅotsi ijili ndiho lyako uve, neke pwu ugelage humbe ukuvusa namwene unnino akalagalila aka ndiho lya mwene.

⁴³ Nagukuli umbiki unnonu ugwa kuhupa uluseke uluvivi. Nagukuli numbiki umbivi ugwa kuhupa uluseke ulunnonu.

⁴⁴ Gyoni imibiki mpamato-mpamato gimańivwa ugu paseke tsa gwene ugu paseke tsa gwene. Mańa iseke tsa nkuju umunu nitungula pantula, nagene namasilu umunu nitungula pandovo.

⁴⁵ Umunu unnonu isakula tsi nnonu umwu alundike vwu vunnonu munumbula jya mwene. Umwene umunu umbivi isakula tsi mbivi umwu alundike vwu vuvivi munumbula jya mwene. Mańa mundomo mwu itsova umunu itsilesuka munumbula jya mwene.

⁴⁶ Pwu mukunzova kiki mwita, nkuludeva nkuludeva kwane vwu namukonga itsu ndikuvavula?

⁴⁷ Uvi ikwitsa kwane ita nukupulika amameńu ugwu nditsova ita nukugamańa ukwi ndivavonyage uvi ndita ahwanine nave.

⁴⁸ Ali ndumunu uvi atsengaga ińumba, pwu akajava akaholonga sitso, ikikotsi akavika palunalavwe. Lino pwu vwu ludekile ulwongometso pwu nulugasi lukadudika pańumba iji nalukajihusanya napadebe, mańa jitsengilwe palunalavwe.

⁴⁹ Mańa uvi ibela ukukonga vwu apulike vi ali ndumunu uvi atsengaga ińumba pamanga vuvule kitatsenga pasi. Lino vwu ludekile ulugasi pwu jikagwa ṅani-ṅani, Pwu jikabatsuka vuvule.