Luuka 5 - UTESITAMENTI UMPYA

¹ Pwu ulunge vwu avanu ikipuga vuvule vamińine nave vita tupulikage ilimeńu lya Nguluve. Umwene vwu imile pakimwambo pańanza jya mu-Genesaleti,

² pwu akavona amaboti gavili vakwegye pakimwambo. Avene avalovi avenenago vatogile pakimwambo vihutsuga ińelo tsa vene.

³ Pwu akingila mwiboti lya Simoni akata: Kuluga vudandamale padebe pakimwambo. Pwu akatama mwiboti akavavula avanu inongwa.

⁴ Lino vwu amalile ukutsova inongwa pwu akambula USimoni akata: Lino bihaga pańanza pagati pwu nkalahe ińelo tsińo nkonze isomba.

⁵ Akanda USimoni akata: Nkuludeva twijumilitse vukye natukavili kinu, lola ulwakuva utsovile uve, pwu ndilaha ulwelo.

⁶ Lino vwu valahile nduvwu avavulaga, pwu vakavona valundaminye isomba ńongosu sitso nulwelo lwa vene lukadumuka.

⁷ Pwu vakavilanga avajavo ava mwiboti ilinge vakata: Mwitse ntutange. Avene vakatsikuvatanga. Pwu tsikadiga gwu gavili amaboti, gakapona nukutwivila.

⁸ Lino vwu atsivwene tsitsitsi USimoni Petele pwu akangwila mmalunde UJesu akata: Huma mwane umu nkuludeva, mańa ndili munu ndili ntulanongwa.

⁹ Mańa lwavavwene uludwado najujwa navale nave voni, ulwakuva tsale ńongosu isomba itsu vonzile.

¹⁰ Vuvule-vule nava-Jakobu nava-Johani avańa-Sebetai avanine va Simoni, navene uludwado lukavavona. UJesu akambula USimoni akata: Kwu bako ukudwada, mańa vutengula lino vulovaga avanu.

¹¹ Pwu vakagakwegela pakimwambo amaboti ga vene vakasileka baho syoni vakankonga jujwa.

¹² Ulunge vwu ali mbutsenge uvunge pwu akambona ujyunge umunu va buba umamna gwoni. Vi akavona ambwene UJesu pwu akagundama pasi akantekelesa akata: Nkuludeva ungave unogilwe pwu ulumańile ukumonya.

¹³ Pwu umwene akagolosa ikivoko akamwabasa mumana akata: Ndinogilwe uponage. Pwu ibuba jikajaga ṅani-ṅani.

¹⁴ Umwene UJesu akambula akata: ulambulaga ujyunge umunu bihaga ukivonye kunteketsi ukagege isya kwivalatsa isya pakuponela uve, isyu alagye UMose, syu sive sya kumańilamwo avene.

¹⁵ Pwu inongwa tsa mwene tsitsitsi tsikapulikika mwoni-mwoni. Pwu vakalundamana avanu ikipuga avakupulihitsa ilimeńu navakuponela uvutamu vwa vene.

¹⁶ Mańa umwene akuva ndukungu akisaja.

¹⁷ Ulunge umwene vwu ikuvavula inongwa vwu vatamile baho navene avapalisai navamańisandagilo avahumile mbutsenge vwoni vwa mu-Galilai nuvwa mu-Jutai namu-Jelusalemu pwu amaka ga nkuludeva gakava nave aga kuvaponya avanu.

¹⁸ Pwu avagosi vampimbile pavusaga unjavo uvi ale namasusa vakata: Tumwingitsage tukambike mbulongolo mmwene.

¹⁹ Vavwene lino navapili apakumwingitsa, mańa vale vongosuno avanu, pwu vakatoga pakyańa pańumba vakaswikula amaswikilo, vakamwisa lunine nuvusaga vwa mwene, vakambika pagati mbulongolo mwa Jesu.

²⁰ Umwene vwu aluvwene ulwidiko lwa vene pwu akambula untamu akata: Vimunu ndikusyikye inongwa tsako.

²¹ Pwu avamańakalata navapalisai vakisagila mwitumbu vakata: Vi veni uvi ikumelula Unguluve? Twi vanu nda pwale ujyunge umunu uvakunsyikila inongwa umunu unine? Mańa mwene Unguluve vi isyikila inongwa.

²² Umwene UJesu vwu atsivwene itsu visagilaga mwitumbu pwu akavanda akata: Mukisagila kiki munumbula tsińo?

²³ Lyu lyebepe liliku ukutsova nilyakuta: Ndikusyikye inongwa tsako nilyakuta: Ima gendaga?

²⁴ Lola pwu ndita mummańe Uńamunu ukuta isyikila inongwa nkilunga umu, pwu ndikukuvula uve ndita: Ima pimbaga uvusaga vwako, uvujage kuńumga jyako. Lyu akatsova kuva vutamu vwa masusa ili.

²⁵ Pwu umwene akima ṅani-ṅani vwu vilola voni, akapimba ukwu agonilepwo akavuja kuńumba jya mwene akanginya Unguluve.

²⁶ Pwu vakadetema voni vakanginya Unguluve. Lukavagwila uludwado vakata: Itsu tutsivwene ilelo iji tsu tsili ponu.

²⁷ Pambele vwu igenda pwu akambona ujyunge unsangutsi uvi vita vi Levi ilitavwa. Akavona atamile pavusangulilo amasango. Vi akamwilanga akata: Tsuvula uṅongage.

²⁸ Pwu umwene akasileka baho syoni akima vuvule akankonga.

²⁹ Pwu ULevi akantelekela isinu, akilanga ululyo uluvaha nńumba jya mwene. Vakabiha kwilya navo navasangutsi navange vuvule ikipuga ki kyongosu sitso.

³⁰ Avene avapalisai navamańakalata vakavatanila navakongi va mwene vakata: Kiki mwilya nukuńwa navasangutsi navatulanongwa?

³¹ Pwu akanda UJesu akata: Avadulusu vwu navikundonda untuṅanya, va vatamu lweli vwu vikundonda.

³² Nanditsili kukuvilanga va vagolosu ukuta nkilivukage, bako va vatulanongwa lweli vwu ndikuvilanga ndita nkilivukage.

³³ Avene vakambutsa vakata: Lola avakongi va Johani vita nukusileka kavili-kavili isinu vita nukwisaja, navene avakongi va vapalisai vwu vigaha vuvule-vule, avako vwu vita nukulya nukuńwa vuvule. Kyu kinu kiki?

³⁴ Umwene akanda akata: Avalyasinu sya pavutegulane pwu veni ate avumilitsage ukuta vasileke isinu vwu tango vali nave untegulandala?

³⁵ Mańa likwitsa ilitsuva lyavene ilyu valavona untegulandala ajagile, pwu valasilekaga isinu ilitsuva ili.

³⁶ Akavavula ikihwanihitso akata: Nakuli ujyunge uvi ilenga unsabwa umpya vwu ali pakupabikila ikipabikilo pansabwa undala. Mańa angave ate vwu ndigahe vuvule-vule, pwu ivona numpya gwiswa, ivona nagwene undala naguhwanana nikipabikilo kya nsabwa umpya.

³⁷ Nakuli nujyunge uvi iduda unńeke gwa masilu mmipako imilala gya masilu. Mańa angave umunu adudilemwo, pwu uńeke gulendula imipako gya masilu pwu namasilu gidudika nagyene nimipako givejangika.

³⁸ Bako unńeke gwa masilu upita umunu adudage mmipako imipya, pwu syoni sipona.

³⁹ Nakuli nujyunge uvi anogilwe ukuńwa unńeke gangave gadigile amalala amasilu. Mańa ita bako galutile uvunnonu ga malala.