Luuka 4 - UTESITAMENTI UMPYA

¹ Umwene UJesu vwu adigile UMepo umbalatse, pwu akahuma mwa Jolitani, UMepo akatsikumbika ndukungu.

² Mwu akalinda amatsuva imilevulo gini. Pwu uńaliluso akangela. Ulwakuva nalitsage isinu amatsuva goni aga. Lino vwu galutile pwu jikavava inzala.

³ Pwu uńaliluso akatsova nave akata: Ungave uli mwana va Nguluve jilweli, pwu utsove niliganga ili sive sinu.

⁴ Pwu UJesu akanda akata: Umunu niva mwumi si sinu syene.

⁵ Pwu uńaliluso akatoga nave pakidugala ikitale, akambonya nkasige kapamato kene isilunga sya vakuludeva voni nkilunga umu.

⁶ Akambula uńaliluso akata: Ndikukupetsaga ukuva vi mwenenasyo syoni isi, ndikukupetsaga navu vudwadwa vwa syene vwoni, mańa vwango juńe ndikumpa vuvule uvi ndinogilwe ndimwene.

⁷ Vwisajage lino kwane, pwu sivetsaga syako syoni.

⁸ Pwu akanda UJesu akata: Livigilwe ilita: Vukisajaga ku kwa Nguluve unkuludeva vako, vukumbombelaga jujwa mwene.

⁹ Pwu akabiha nave mu-Jelusalemu. Mwu akatsikumbika pakyańa pa Tempeli akatsova nave akata: Ungave uli mwana va Nguluve jilweli pwu utsumbilage pasi.

¹⁰ Mańa livigilwe ilita: Alakulagililaga avasuṅwa va mwene ukuta vakwupililage,

¹¹ valakupimbaga mmavoko ukuta ulitovaga piganga ikilunde kyako.

¹² Pwu akanda UJesu akata: Nalyene livigilwe nilya kuta: Kwu bako ukungela Unguluve untwa vako.

¹³ Umwene uńaliluso vwu amalile lwoni ulugelo lwa kungela ulu, pwu akandeka akata lungave lusiku.

¹⁴ Pwu amaka ga Mepo gakankilivula UJesu ukuta avuje abihe mu-Galilai. Pwu akatsipulikika ikilunga kyoni umwu kitsungutye.

¹⁵ Pwu umwene akavavula inongwa nńumba tsa vene tsa kwisajilamwo, voni vakanginya.

¹⁶ Akatsisika namu-Nasaleti umwu akulye. Akingila nńumba jya kwisajila, vwu agahaga sikutsoni palitsuva lya sabati, akima pakutsova pakalata.

¹⁷ Vakampa kalata va Jesaja uńamalago, Lola vwu igubukula kalata pwu akavona upwu livigilwe ilita:

¹⁸ UMepo va nkuludeva ali pane, mańa ambakile ukuvavula inongwa innonu avagatsu. Ansuṅile nakuvibitwe ukuta ndivavule ukuta vavangwe, nakuvaboswe ukuta ndivavule ukuta valolage, nakuvabańilitsivwe ukuta ndivavopole,

¹⁹ asuṅile atye katsove numwaka gwa nkuludeva unnonu ukuta gwitsile.

²⁰ Pwu akagubika kalata, akampa undoleli akatama. Pwu amiho ga voni nńumba jya kwisajila gakandungamila jujwa.

²¹ Pwu umwene akatengula akata: Itsivigilwe apa tsitsile vuvule vwu mupulika ilelo iji.

²² Pwu voni vakidika vakata, bako itsova, vakadega amameńu amadekedeke agahumaga mndomo mmwene vakata: Nda namwana va Josepu uju?

²³ Akavavula akata: Uńe pange mukuṅumbuhitsaga akamenu akita: Vi ntuṅanya vwiponyage vimwene. Pange mwita utupelelage itsinge natwi va umwu vwaponye vwu tsitso tupulike ukuta apelile namu-Kapelinaumu.

²⁴ Umwene akavavula akata: Jilweli-lweli ndikuva vula ndita: Ujyunge uńamalago nikuvakelamwo avanu mmyave umwu akulye.

²⁵ Nditsova itsa jilweli ndita: Vale vongosu avadala avaswile mwa Isilaeli umu mmwaka gulya gwa Elija, upwu kukyańa kuvetsage kudinde vuvule imyaka gidatu nimyetsi ntanato, upwu inzala jigwitsage ńongosu ikilunga kyoni.

²⁶ Mańa nansuṅili kujyunge va umu Elija, bako akansuṅa mu-Salepita nkilunga kya Sitonija akata mwu ubihage kundala unswile va mumwa.

²⁷ Navene avańabuba vwu vale vongosu mmwaka gulya alekwo Elisa uńamalago. Mańa naponili ujyunge uvumwu. Mmwene ju Nahamani va mu-Sili vi akapona.

²⁸ Pwu gukavipa voni avale nńumba jya kwisajila vwu vapulike tsitsitsi.

²⁹ Pwu vakasisimuka vakamumya mbutsenge vakatsikumbika palugima lwa kidugala ikyu vatsengile uvutsenge vwa vene vakata: Tumbiluse ndugenge.

³⁰ Mańa umwene akatupa pagati pavene akabiha vuvule.

³¹ Pwu akika ukubiha mu-Kapelinaumu mbutsenge uvunge vwa mu-Galilai, mwu akatsikuvavula inongwa sikutsoni pasabati.

³² Pwu vakadega itsu avavulaga ulwakuva avonekaga vwu itsova ukuva vi vi mwenenatso jujwa.

³³ Mańa alemwo nńumba jya kwisajilamwo ujyunge umunu va mepo imbivi jya Setano. Vi akilanga ilimeńu ilivaha akata:

³⁴ Hi, tuli vuki nuvwe nuve vi Jesu va mu-Nasaleti! Vwitsile nkutujatsa! Ndikumańile mańa vi mbalatse va Nguluve uve.

³⁵ Umwene UJesu akatanila akata: Nunala uhume mmunu uju. Pwu imepo imbivi jikambamitsa vuvule pagati pakipuga umunu jujwa, jikahuma kitandematsa napange.

³⁶ Pwu uludwado lukavavona voni umwu vavelye, vakavutsanya vakata: Lyu limeńu liki ili? Mańa imepo imbivi ikutsilagila ilya vutwa ilya maka, itsene pwu tsihuma vuvule.

³⁷ Pwu umwene akapulikika ikilunga kyoni kya mbwipi umu.

³⁸ Pwu akahuma nńumba jya kwisajilamwo, akatsikwingila nńumba jya Simoni. Akatsivona unkwive va Simoni undala imungu jimbwene ńongosu sitso. Pwu vakambutsa vakata: Tugahage ndeti nave?

³⁹ Pwu umwene akatsikumwinamila akatanila nimungu pwu jikandeka. Pwu umwene undala akasisimukila ṅani akavagegela isinu.

⁴⁰ Mańa vwu lisema ilitsuva pwu voni avale navatamu uvutamu vwoni vakavagega kumwene. Pwu umwene akavavika amavoko uju mwene uju mwene akavaponya.

⁴¹ Natsene imepo imbivi tsikahuma mbanu avongosu, tsikilanga vwu tsihuma tsikata: Uve vi nswambe va Nguluve. Umwene akatanila akata: Mulanzovaga ukuta mumańile ukuva vi Kilisiti uńe.

⁴² Vwu vukye pavusiku pwu UJesu akasisimuka ukubiha ndukungu. Pwu avanu ikipuga kyoni vakandonda, vakatsisika upwu alepwo vakata: Tunkilivule alakimbilaga mmyavitu umu.

⁴³ Mańa umwene akavavula akata: Mańa inongwa innonu tsa ludeva lwa Nguluve tsitsitsi tsu upita nditsitsovage mbutsenge mwoni nambunge vuvule. Mańa tsu tsitso ndisuṅilwe.

⁴⁴ Pwu akatsikutsitsova mwoni nńumba jya kwisajilamwo nkilunga kya mu-Galilai.