Luuka 24 - UTESITAMENTI UMPYA

¹ Mańa palitsuva ililongotsi ilya juma pwu vakalava vwu likanale ukuhuma ilitsuva ukubiha kuvuguli, vakagega nimituguva igyuvagahile.

² Vakavona iliganga libilwike pavuguli.

³ Pwu vakingila mbuguli vakavona ummana gwa Jesu nagumuli.

⁴ Pwu lino avene vwu visusuvala patsitsitsi pwu vakakeńemuka vakahegelela avanu vavili, vaswalile imisabwa igilengadika vuvule.

⁵ Pwu avene vakadwada sitso vakinamila pasi. Pwu avanu ava vakatsova navo vakata: Umwumi vi mwatye mundonde mbaswe umu?

⁶ Namuli umu bako atsukile. Nda nsamilwe itsu avavulaga vwu tango ali mu-Calilai

⁷ itsu atetsaga: Uńamunu upita atagivwagwe mmavoko ga vatulanongwa, upita atovelelwagwe pakidamiṅanye, mańa palitsuva lya datu alatsukaga-tsu musamilwe?

⁸ Pwu avadala vakakumbuhitsa amameńu ugwu atsovile UJesu.

⁹ Lino vwu vatsisike kuvutsenge vwu vahumile kuvuguli pwu vakavavula tsoni tsitsitsi avakitsigo numpamato navange voni.

¹⁰ Avene avadala avavavulaga avapositili tsitsitsi vwu va-Malija uvańina va Jakobu navange avadala avajiavo.

¹¹ Avene avapositili amameńu ga vadala gakava ndututsago ututsimu vuvule navakagavona.

¹² Pwu UPetele akasisimuka akanila ukubiha kuvuguli. Akatsigundama akatsikugivona imisabwa igyuvansilye. Pwu akabiha kuvutsenge akadega inongwa itsavonike.

¹³ Lino pwu palitsuva lilyo pwu avanine vavili vakahuma mu-Jelusalemu pilivabiha kuvutsenge uvwu vita mu-Emausi ilitavwa. Vakagenda akajila ka patupindo utulevulo ntananato.

¹⁴ Vwu vigenda pilivatsitsova tsoni inongwa itsavonike.

¹⁵ Vwu vikutsitsova tsitso pilivandana pwu vakakeńemuka uju UJesu ahegelye igenda navo.

¹⁶ Agene amiho ga vene gakavuta gaboswe, pange vammańe.

¹⁷ Umwene akavavutsa akata: Gwu mameńu maki ugwu mukwandana vwu mugenda? Pwu vakima vakasusuvala kumiho.

¹⁸ Pwu akanda ujyunge UKilyopa akata: Ulimmenza uve vimwene mu-Jelusalemu uve nutsimańili itsivonike umu itsu tugonile natso amatsuva?

¹⁹ Umwene akata: Iliku? Avene vakambula vakata: Itsa Jesu uva mu-Nasaleti, uvi avetsaga munu uńamalago uviavonekige namaka nakwa Nguluve nakuvanu aga kuvombela imbombo naga kutsovela inongwa.

²⁰ Uvivantagile avateketsi avavaha navamamajitu, vahigile nilya kumbuda nilya kuntovelela pakidamiṅanye.

²¹ Uvwe tuhuvilige tutetsige vi iva mbangi va Isilaeli. Lola ilelo lya datu vwu tugonilevwo ukuhuma upwutsitengwe.

²² Avange navajitu avadala vatukeńemwise vwu vabye kuvuguli vwu vuhenga

²³ navatsikumbweni vitsile vatye tuluvwene uluvoneko lwa vasunwa avita mwumi umwene.

²⁴ Pwu vabye navajitu avange kuvuguli vatsikutsivwene tsoni itsu vatsovile avadala umwene navambweni.

²⁵ Pwu umwene akata: Lola uńe ńi vatsilaluhala, ńi vańanumbula inzito pakwidika tsoni itsu vatsovile avańamalago.

²⁶ Ndita atsovelilwe ṅani UKilisiti ukuta akuvilwagwe agendelage jijyo pakwingila mbuvaha vwa mwene?

²⁷ Pwu akahuma navo pa-Mose napavańamalago voni akavavula tsoni itsikuntsova jujwa muvakalata.

²⁸ Vwu vasike kuvutsenge ukwu vabihaga umwene akavuta ilutiṅanya.

²⁹ Avene vakantekelesa vakata: Uvetsage nuvwe mańa lya kimihe lino nilitsuva vuhwe vuvule. Pwu umwene akingila nńumba vakavetsanya.

³⁰ Vwu atamile navo pakulya akatola ikivanda akasana akameńulanya akavapa.

³¹ Pwu gakadinduka baho amiho ga vene vakammańa. Umwene akańyemeluka vwu vilola.

³² Avene vakavulana vakata: Natsipili inumbula tsitu ngati vwu itsova nuvwe munzila vwu ikutudindulila avakalata ukuta tuvamańe.

³³ Pwu vakavuka pakavalilo kako vakavujila mu-Jelusalemu. Mwu vakatsivona valundamine avalikitsigo nampamato navange avali navo.

³⁴ Vwu vakata: Atsukile jilweli unkuludeva ambonekye USimoni.

³⁵ Avene vakavavula itsa munzila nupwu vammańilaga upwu avameńulilaga ikivanda.

³⁶ Vwu valipakutsova tsitsitsi pwu vakakeńemuka itsile jujwa imile pagati ita: Ulunotsehetso luve nuńe,

³⁷ Pwu vakakeńemuka sitso nuludwado lukavavona. Ulwakuva avene vatetsaga pange ugupepo tuguvwene.

³⁸ Pwu umwene akavavutsa akata: Mukeńemuka kiki ninisagilo tsitoga kiki munumbula?

³⁹ Ukwi mundolage namavoko namalunde-mumańage ukuta nene jilweli. Ukwi muńabasage mummana, mańa ugupepo nagwiva nummana nagwiva nisitsege isyu mumbwene ukuva nasyo uńe.

⁴⁰ Lino vwu atsovile tsitsitsi pwu akavavonya namavoko namalunde.

⁴¹ Vwu tango avene videga nduhekelo vwu videga vuvule pwu vakavona ita: Pange ndi natwo utunge utwakulya mumwa?

⁴² Pwu vakampa akameńukila ka somba inutsule.

⁴³ Pwu umwene akatola akalya vwu vilola.

⁴⁴ Pwu akavavula akata: Lola tsitsitsi tsu tsilya ndivavulage vwu tulitwivoni nuńe tsilya nditetsage: Upita tsitsage tsisilage tsoni itsikunzova une itsivigilwe namusimilitso tsa Mose nambańamalago namwa Kalata va ńimbo.

⁴⁵ Pwu akavadindulila uluhala ulwa kuvamańila avakalata.

⁴⁶ Akavavula akata: Vwu vavigye ṅani vuvule-vule vatye: Vwu upita UKilisiti akuvilwagwe vuvule-vule, upita atsukage kuvaswe palitsuva lya datu,

⁴⁷ upita avanu isivumbuko syoni vavavulilage mwitavwa lya mwene ukuta nkilivukage pwu ndavuvona uvusyikilo vwa nongwa, vatengule mu-Jelusalemu umu.

⁴⁸ Uńe ndi vakutsidikila tsitsitsi.

⁴⁹ Mulole uńe ndikuvasuṅilaga ukwu idike udada atye: Ndikukasuṅaga kwu kikuvitsilaga uńe, Uńe tango mbetsage mumbutsenge umu mukasikage lulwa ndikuvaswikilaga amaka ga kukyańa.

⁵⁰ Pwu akahuma navo akalotsa navo mu-Betanija. Akimya amavoko ga mwene akavasaja.

⁵¹ Lola vwu ikuvasaja pwu akigava kuvene akatoga akabiha kukyańa.

⁵² Pwu avene vakisaja kumwene. Pwu vakakilivuka ukubiha mu-Jelusalemu, vakahekela sitso.

⁵³ Sikutsoni vakava mwa Tempeli vakanginya Unguluve.